11
Paul le Sawltak Kineihkhemte
1 Ka hai ahi phial zongin ka haina mah hong thuakpih le-uhcin ka ut hi. Hong thuakpih taktak ta un.
2 Pasian in hong aam mahmah bangin note ka hong aam mahmah hi. Nungak le tangval nupa dingin a kigawm mah bangin khat bek ahi Khrih tawh a kigawm dingin nungak siangtho bang na hi uh hi.
3 Ahi zongin gulpi in ama zuau ngian tawh Eve a khemzawh bangin na lungsim uh kihei-in Khrih tungah na kipiaknate uh na nusiatkhak ding uh ka lunghimawh hi.Ref 11:3 Pian 3:1-5, 13
4 Bang hang hiam cih leh kote’ hilh a hi lo adang Jesuh’ thu a hilh hong pai ciangin lungdam takin na sang pahpah uh a, kote’ hong hilh Kha Siangtho le lungdamna thu tawh a kibang lo kha thu le lungdamna thu hong hilh a om ciangin na sang pahpah uh hi.
5 Note in sawltak thupi mahmahte hi, ci-in na ngaihsut uh mite sangin themkha zong a neu zaw-in ka kingaihsun het kei hi.
6 Thugen siamna le pilna thuk ka nei kei kha mah ding hi. Hih thu tawh kisai-in ahihleh, a tawntungin na khempeuh ah ka hong gensa uh ahi hi.
7 Note kiangah Pasian hangin Lungdamna Thu kong hilh ciangin note tung panin thaman bangmah ka hong ngen het kei a, note a thupi na suah ding uh ka deihna-in kei ka kiniamkhiat hi. Hih thu tawh kisai-in a sialamin kei hong lehngaihsut zawsop na hi uh hiam?
8 Note kiangah na ka sep laitakin pawlpi dangte in kei hong vak uh ahih manin, note huh nadingin midangte’ na a kisut ahi hi.
9 Note lakah na ka sep laitakin Masedonia gam panin a hong pai pawlpi mite in ka sapna khempeuh hong puak uh ahih manin note khat beek ka hong gimsak kei hi. A beisa hunah note ka hong gimsakkhak loh mah bangin mailam hunah zong ka hong gimsakkha het kei ding hi.Ref 11:9 Fil 4:15-18
10 Khrih thuman keima sungah om ahih mah bangin no Akhaia gam sungah hih ka kisialhna thu mah kizom paisuak ding hi, ci-in ka kiciam hi.
11 Hih bangin kam ka pau ciangin note ka hong it loh man ahi hiam? Note ka hong itna hang hizaw hi. Hih thu Pasian in thei hi.
12 Tua sawltak dangte in, “Kote in zong amau’ sepzia mah bangin ka sem uh hi,” ci-in a kisialh theih loh nadingun tuhunin nasep thaman bangmah kong lak loh mah bangin mai lamah zong ka hong la kei ding hi.
13 Amaute pen sawltak taktak hi loin, sawltak a kineihkhemte hi uh a, a nasepna uhah zong zuau-in, Khrih’ sawltak taktak a bat theih nadingun a mel kiseel ahi uh hi.
14 Tua pen lamdangsak ding hi lo hi. Satan nangawn Pasian’ vantungmi tawh a kibangin kibawltawm thei hi.
15 Tua ahih manin Satan’ sawltakte pen thuman nasem bangin a kibawl manin lamdangsak ding hi lo hi. Hun bei ni ciangin amau gamtatna bangun thuak ngawn ding uh hi.
Sawltak Hihna tawh Paul’ Thuaknate
16 Kuamah in mihai-in hong ngaihsun kei hen, ka ci kikkik nuam hi. Ahi zongin a hai-in hong ngaihsun na om uhleh zong tawmkhat ka hong kisialh theih nadingin ka haisapi mahin hong sang veve un.
17 Tu-in kong gen ding thute pen Topa’ hong sawl hi lo hi. Tu-a kisialhna kam ka hong pau ciangin mihai taktak mah bangin a pau ka hi hi.
18 Mi tampi in hih leitung ngeinate kisialhpih thei uh ahih manin kei zong ka hong kisial ding hi.
19 Note pil kisa mahmah na hih manun lungdam takin mihaite na sang pahpah uh hi.
20 Note, sila-in hong bawlin, note hong thangsiahin, na haina uh nuamtaksa-in hong hih thopthopin, note hong simmawh bawlin, na paang uh a hong bengbengte na sang uh hi.
21 Tua bangin na om uh zumhuai mahmah hi. Kote ahihleh note tungah ka hong tuaci gamtat ngam kei uh hi.
Ahi zongin a kisial ngam om ahihleh kei zong mihai bangin ka hong kisial ngam ding hi.
22 Amaute Hebru mi ahihleh kei zong Hebru mi mah ka hi hi. Amaute Abraham’ suan Israel mite ahihleh kei zong Abraham’ suan Israel mi mah ka hi hi.
23 Amaute Khrih nasem ahihleh kei zong hong hai pau mai ning. Khrih nasem a hoih zaw pekpek ka hi hi. Amaute sangin na ka nak sep zaw a, satna tamvei ka thuak zaw a, sih dektakna tamvei ka tuak zaw hi.Ref 11:23 Sawl 16:23
24 Jew mite’ khut sungah sawmthum le kua vei satna nga vei tak ka thuak hi.Ref 11:24 Thkna 25:3
25 Rom mite in thumvei hong sat a, khatvei suang tawh hong deng uh hi. Teembaw siatna thumvei ka tuak a, sun khat le zan khat tawntung tui tungah ka laam ngei hi.Ref 11:25 Sawl 16:22; 14:19
26 Khual ka zinzinna lamin tuikhang lauhuaina, misuamte lauhuaina, ka mipihte’ suk ding lauhuaina, Gentail mite’ suk ding lauhuaina, khuapi sung le gamlakah lauhuaina, tuipi tungah lauhuaina, lawm man lote’ hih ding lauhuaina a tuamtuamte ka phukha hi.Ref 11:26 Sawl 9:23; 14:5
27 Nasem silbawlin ki-om tawntung a, ihmu man lo liangin zong ka om zel hi. Gilkial dangtakin ka om zel a, annek ding nei lo, giah nading om lo, puansilh ding nei loin ka om hun tampi a om hi.
28 Tua bang haksatna a tuamtuam ka thuak banah nisimin pawlpi a tuamtuamte adingin lunghimawhin ka lunggimpih lai hi.
29 A thaneem a om ciangin lungkhampihin kei zong ka thaneem a, mawhna-ah a pukkha a om ciangin dahin ka lunggimpih hi.
30 Ka kisialh leh zong ka ginat lohna hong kilangsak nate hangin ka kisial bek hi.
31 Topa Jesuh’ Pa Pasian in thupha ngah tawntung tahen. Amah in ka zuau hetloh lamtak a hong thei hi.
32 Damaskas khuapi sungah ka om laitakin Kumpi Aretas khutnuai-a gam ukpa in kei hong mattheih nadingin Damaskas khuakulh kongpi cingsak a,
33 ahi zongin kulh tawlet vang panin hong kikhai khia suk ahih manin ama khut sung panin ka suakta hi.Ref 11:32-33 Sawl 9:23-25