AMOS
(The Book of Amos)
Thupatna
Amos pen Lai Siangtho sungah a thugen a kitam ciamteh masa pen kamsangpa ahi hi. Amah pen Judah gam khuapi khat sunga a piang hinapi-in B.C. zagiatna kimtan pawlin leilu lam Israel kumpi gam sungah thu a hilh hi. Tua hun pen mi a cihtheih mahmah laitak, biakna thu a kihahkat mahmah laitak le lungmuang hithiat-a mi a om laitak ahi hi. Ahi zongin tua cihtheihna pen mi tawmno khat bek in ngah a, thuman lopi-in mizawngte’ neihsa suhna tawh a kihau ahihna thu Amos in a mu hi. Biakna thu zuihna pen lungsim takpi tawh hi lo a, lungmuanna zong a taktak hipha lo hi. Pasian in gimna pia ding hi, ci-in lunggimna le lungsim hanna tawh thu a hilh hi. Thuman thutang luitui luang bangin a luan zuahzuah ding deih a, tua bang hileh, “Topa in hih minam a nungta sunte hong hehpih thei kha ding hi,” ci-in 5:15 sungah a gen hi.
1
Israel-te’ Kiima Om Minam Dangte tungah Thukhenna
1 Tekoa khua-a a teeng tuucingte lakah Amos a kici mi khat om hi. Uzziah pen Judah kumpi hi-in Joash’ tapa Jeroboam in Israel kumpi a sep laitak, zinlin ma kum nih hun laitakin Pasian in Amos tungah hih thute kilangsak hi.Ref 1:1 2Kum 15:1-7; 2Khang 26:1-23; 2Kum 14:23-29.*
2 Amos in,
“Zion Mual panin
Topa hong hawksuk a,
Jerusalem khua panin
hong awngkek hi.
Tua ahih manin
lonona gam teng keu gawp a,
Karmel mualdawn dum dide teng
kausan ta hi,” a ci hi.Ref 1:2 Joel 3:16.*
Syria Mite
3 Topa in hih bangin ci hi:
Damaskas khuamite
thumvei a khialh khit,
a liveina hangin
pel loin amaute gim ka pia ding hi.
Bang hang hiam cih leh amaute in
an gawina suang tawh gawizan bangin,
Gilead gammite
gawi gawp uh hi.
4 Tua ahih manin
Hazael innkuante
mei tawh ka hal dinga,
a meikuang in
Kumpi Benhadad’ munmuanhuaite
kaangtum ding hi.
5 Damaskas khuakulhpi zawlte
ka sutan dinga,
Aven Kuam a teeng mi khempeuh le
Betheden Kuam sungah a om
gam ukte khempeuh
keimah in ka susia dinga,
Syria mite ahihleh
Kir gamah salin kipaipih ding hi.Ref 1:3-5 Isa 17:1-3; Jer 49:23-27; Zek 9:1.*
Filistia Mite
6 Topa in hih bangin ci hi:
Gaza khuamite
thumvei a khialh khit,
a liveina hangin
pel loin amaute gim ka pia ding hi.
Bang hang hiam cih leh amaute in
minambup khat sal dingin manin,
Edom mite tungah ap uh hi.
7 Tua ahih ciangin Gaza khuapikulh
ka kaangsak dinga,
a munmuanhuai teng
a kaangtum mang ding hi.
8 Ashdod khuapi-ah a teeng mite
ka la khia dinga,
Ashkelon khuapi ukte
ka beisak ding hi.
Ekron khuapi ka su gawp dinga,
Filistia mi a omlaite si ding uh hi.Ref 1:6-8 Isa 14:29-31; Jer 47:1-7; Ezk 25:15-17; Joel 3:4-8; Zefa 2:4-7; Zek 9:5-7.*
Taia Mite
9 Topa in hih bangin ci hi:
Taia khuamite
thumvei a khialh khit,
a liveina hangin
pel loin amaute gim ka pia ding hi.
Bang hang hiam cih leh amaute in
minambup khat
Edom mite tungah ap uh a,
lawmta dinga a thuciamna uh
zui lo uh hi.
10 Tua ahih ciangin Taia khuapikulh
ka kaangtumsak dinga,
a munmuanhuai teng
kaangtum mang ding hi.Ref 1:9-10 Isa 23:1-18; Ezk 26:1-28:19; Joel 3:4-8; Zek 9:1-4; Mat 11:21-22; Luk 10:13-14.*
Edom Mite
11 Topa in hih bangin ci hi:
Edom mite thumvei a khialh khit,
a liveina hangin
pel loin amaute gim ka pia ding hi.
Bang hang hiam cih leh amaute in
a sanggam uh Israel-te
namsau tawh delh uh a,
hehpihna lungsim nei lo uh hi.
A hehna uh damsak ngei lo uh a,
a tawntungin heh niloh uh hi.
12 Tua ahih ciangin
Teman gam sung khempeuh
ka kaangtumsak dinga,
Bozrah khuapi munmuanhuai teng
kaangtum ding hi.Ref 1:11-12 Isa 34:5-17; 63:1-6; Jer 49:7-22; Ezk 25:12-14; 35:1-15; Oba 1-14; Mal 1:2-5.*
Ammon Mite
13 Topa in hih bangin ci hi:
Ammon mite
thumvei a khialh khit,
a liveina hangin
pel loin amaute gim ka pia ding hi.
Bang hang hiam cih leh amaute in
huaihamin gam
a deihthuah manun
Gilead gam sim gawp uh hi.
14 Tua ahih ciangin
Rabbah khuapikulh ka haltum dinga,
a munmuanhuai teng khempeuh
kaangtum ding hi.
Galdo a kikona aw ging dinga,
tua kidona awging
khuapi huihnung bang ding hi.
15 A kumpipa uh le a uliante uh
salin kiman ding hi.