24
Jew mite in Paul a Mawhsakna
1 Tua khit ni nga ciangin siampi lianpen pa Ananias le upate, amau’ thu a gensak ding Tertullas a kici mipa tawh Jerusalem khua panin Sisaria khua-ah hong tung uh a, menzipa Feliks kiangah pai-in Paul a mawhsakna uh thute a va gen uh hi.
2 Thugen dingin Tertullas a kisawl ciangin hih a nuai-a bangin mawhsakna thu a gen hi:
“A Lian Menzipa! Nangma makaih siamna hangin hun saupi sung nuamtakin ka omkhin uh a, kote’ gam sung a hoih nadingin puahphatna zong tampi tak kibawl khin hi.
3 Hih thute hangin nang tungah mi khempeuh ka lungdam mahmah uh hi.
4 Na hun tampi tak hong beisak nuam lo ka hih manun, thu a tom theithei a kong gennate uh hehpihna tawh nong ngaih nadingin kong thum uh hi.
5 Hih mipa, buaina a piangsak, a kihtakhuai mi ahihna ka mu uh hi. Mun khempeuh a om Jew mite lakah buaina piangsak a, Nazareth mipawl a kicite a makai pa ahi hi.
6 Biakinn nangawn thusim loin min siatsak sawm ahih manin amah ka man uh hi. (Komau’ thukham tawh kizui-in ama tungah thu khen ka sawm uh hi.
7 Ahi zongin galkap mangpa Lysias hong pai-in kote kiang panin amah hong kai khia hi.
8 Tua ciangin amah a mawhsakte, nangma kiangah hong pai nadingin Lysias in thu a pia hi.) Tu-in hih mipa thu sit lecin, ka mawhsakna uh thu khempeuh nangmah in na thei ding hi,” a ci hi.
9 Jew mite in zong panpih uh a, hih a gen khempeuh a man mah ahi hi, ci-in a gen uh hi.
Jew mite’ Mawhsaknate pan Paul Kiphel
10 Paul in thu a gen nadingin menzipa in a khut tawh a lah ciangin Paul in,
“Hih minamte tungah thukhenin sauveipi na om khitna thu ka hong thei hi; kei hong kimawhsaknate nangma mai-ah phel theih nading hun ngah ka hih manin ka nuam mahmah hi.
11 Nang mahmah in na theih ding mah bangin, Jerusalem khua-ah Pasian bia dingin ka paina pen ni sawm le ni nih khawng pha pan hi.
12 Biakinn sung ahi a, kikhopna inn sung ahi a, khua sung mun khat peuhpeuh ah ahi zongin mi khat peuhpeuh tawh ka kitotna ahi a, mihon in thusia a bawl nadingin ka hanthotna ahi zongin, hih Jew mite in hong mu het lo ding uh hi.
13 Tu-a kei hong mawhsaknate uh zong a manna thu hong lak thei het lo ding uh hi.
14 Ahi zongin nangma kiangah kong pulaknop thu in: Amaute in man lo hi, a cih uh tua Thu zui-in kote’ pu le pate’ Pasian ka bia hi. Moses’ Thukham laibu sunga a kigelh thu khempeuh le kamsangte’ laibu sunga a kigelh khempeuh zong ka um hi.
15 Amaute’ up le lamet mah bangin, Pasian in miphate le misiate a kibangin sihna panin hingkiksak khawm ding hi, ci-in umin ka lamen hi.
16 Tua ahih manin Pasian mai le mite mai-ah lungsim kisuanna a om het lo dingin a tawntungin ka gamta hi.
17 “Jerusalem panin kum tampi sung ka pai khiat khit ciangin ka mipihte a kihuhna sumte a puak ding le gan go-in Pasian a bia dingin Jerusalem-ah ka pai hi.
18 Biakinn sungah keimah kisiansuahna ka bawl khit ciangin amaute in kei hong mu uh a, buaina zong bangmah om lo hi.Ref 24:17-18 Sawl 21:17-28*
19 Tua laitakin Asia gam panin a hong pai Jew mite pawlkhat om uh hi. Kei mawhsak nading thu a neih uhleh amaute mahmah hong pai-in nangma mai-ah hong gen ding uh a kilawm ahi hi.
20 Tua ahih kei leh zong, uliante mai-ah thusitna thuakin ka om laitakin ka mawhna bang mu uh ahi hiam, cih thu hih mite gensak in.
21 Amaute’ mai-ah, ‘Mi site hingkik ding hi, ci-in ka upna hangin kei tungah thu nong khen uh hi,’ ci-in ka gen sim loh amaute’ heh nading bangmah om lo hi,” ci-in thu a gen hi.Ref 24:21 Sawl 23:6*
Paul Kikhumcip Lai Phot
22 Tua ciangin tua Thu paizia teltakin a thei Feliks in a thusitna hialbawl a, “Galkap mangpa Lysias hong tun ciangin na thu uh kong khensak ding hi,” ci-in a gen khit ciangin,
23 Paul cin ding tavuan a la bupa kiangah thu pia a, “Paul hoihtakin cingsak inla, ahi zongin a lawmte in a kisapna peuhpeuh a piak theih nadingun kimuh theih nading hun pia zel in,” ci-in a vaikhak hi.
24 Tua zawh a sawt loin Feliks le Jew mi ahi a zi Drusilla, Paul a kikhumna-ah hong pai-in amah sam khiasak uh a, Paul in Jesuh Khrih upna thu a gennate a nupa-un a ngai uh hi.
25 Ahi zongin Paul in thu gengenin, a hoihin a gamtat nading, pumpi ki-uk zawh nading le hong tung ding Thukhenna Hunte a gen tohtoh ciangin, Feliks hong lau a, “Va paikik phot in. Hun ka ngah ciangin kong samkik ding hi,” ci-in a gen hi.
26 Paul in sumgolh zong hong pia thei leh ci-in ngaihsunkawm ahih manin Paul kiangah va pai zelin a kiho zelzel uh ahi hi.
27 Ahi zongin tua zawh kum nih hong bei ciangin Feliks sepna pen Porsias Festas in hong laih hi. Feliks in Jew mite’ pahtak ding ut ahih manin thong sungah Paul a omsak suak hi.