16
Timoti in Paul le Silas Pawm
1 Paul paisuak lai-in Derbe khua tung a, tua panin Lystra khua a tung hi. Tua Lystra khua-ah Timoti a kici thu um mi khat om a, a nu zong thu um Jew mi hi a, a pa pen Grik mi ahi hi.
2 Lystra khua le Ikonium khua-a om thu um mite in Timoti pen a zahtak mahmah uh mi khat ahi hi.
3 Paul in Timoti tonpih nuam ahih manin a vun a atsak hi. Tua gam a om Jew mi khempeuh in Timoti’ pa pen Grik mi ahih lamtak theikim uh ahih manin tua bangin a atsak ahi hi.
4 Thuhilhin a paina uh khua khempeuha thu um mite kiangah Jerusalem khua-a om sawltakte le upate in zuih dingin a khensat uh ngeinate gen kawikawi uh a, tua ngeinate a zuih nadingun a hanthawn uh hi.
5 Tua ahih manin pawlpi mite a upna uhah kip semsemin, a nini-in mi a kibehlaplap hi.
Paul in A Maang ah Masedonia Mi Mu
6 Asia gam sungah thu a hilh ding uh Kha Siangtho in phal lo ahih manin Frigia le Galatia gam sungteng ah a zin uh hi.
7 Mysia gamgi a tun uh ciangin Bithynia gam sungah lut dingin kithawi uh a, ahi zongin tua gamah a pai ding uh Jesuh’ Kha Siangtho in phal lo hi.
8 Tua ahih manin Mysia gam nawkin pai uh a, Troas khua-ah a tung uh hi.
9 Troas khua-ah a tunni zanin Paul in maang mu a, Masedonia gammi khat in ama kiangah, “Masedonia gamah hong pai inla, kote hong huh in,” ci-in a thum hi.
10 Paul in maang a muh khit phetin, tua lai-a om mite kiangah Lungdamna Thu a hilh dingin Pasian in eite hong sam hi, ci-in ngaihsun ka hih manun Masedonia gamah a pai dingin ka kithawi pah uh hi.
Lydia A Kikheelna
11 Tua ahih manin Troas khua panin teembaw tuangin Samothrasia tuikulh ka tung uh a, a zing ciangin Neapolis khua ka tung uh hi.
12 Tua khua panin khe tawh pai-in Masedonia gam sunga om Rom mite a tenna Filippi khua ka tung uh a, tua khua-ah ni tampi sung ka taam uh hi.
13 A Sabbath ni ciangin Jew mite’ thungetna mun om ding hi, ci-in ka upna uh khua pualama gun gei-ah ka pai uh a, tua lai-ah tu-in a kikhawm numeite tungah thu ka hilh uh hi.
14 Tua ka thuhilhna uh a za mite lakah Thiatira khuami, a manpha mahmah puansan a zuak, Lydia kici numei khat a om hi. Tua nu pen Pasian a bia numei khat hi a, Paul’ thugente a sang thei dingin Pasian in a lungsim a honsak hi.
15 Amah le a innsunga om mi khempeuh tui kiphum uh a, “Topa thu a um mi taktak hi, ci-in na hong ngaihsut nak-uhleh hong pai unla, ka inn-ah hong tung un,” ci-in hong samin a hong zol hi.
Filippi khua-a Thongkiatna
16 Nikhat, thungetna mun a zuan dingin ka pai laitakun mailam thu a gen thei dawivei nasem numei khat in kote hong dawntuah hi. Tua numei in mailam thu a genna tawh a tote adingin sum tampi a ngahsak hi.
17 Tua numei in Paul le kote hong zui-in, “Hih mite, A Lianpen Pasian’ nasemte ahi uh hi. Note a hong kihotkhiat theih nading thu a hong gen uh ahi hi,” ci-in a kiko hi.
18 Tua bangin ni tampi sung awng ngitnget ahih manin a sawtna ciangin Paul in nawngkaisa ahih manin kihei-in a dawi kiangah, “Hih numei sung panin na pai khiat nadingin Jesuh Khrih min tawh thu kong pia hi,” a cih khit phetin, tua numei sung panin dawi a pai khia pah hi.
19 Tua numei’ tote in a sumngah nading uh beita hi, ci-in a phawk uh ciangin Paul le Silas man uh a, thukhente omna sumbuk tualah a kai uh hi.
20 Rom ulian thukhente kiangah paipih uh a, “Hih mite, Jew mi hi a, i khua sungah nawngkaina hong piangsak hi.
21 Amaute in kote’ ngeina tawh kituak lo thute hong hilh uh a, kote Rom mi ka hih manun amau thugente ka sang thei kei uh a, ka zui thei kei uh hi,” a ci uh hi.
22 Mihonte in zong amau tegel vuakpih ngeingai uh a, uliante in Paul le Silas’ puan balkeksak uh a, tua mi tegel a sat nading uh thu a pia uh hi.
23 Nakpi takin a kisat khit ciangin thong sungah koihsak uh a, limtakin tawh a kalh nadingin thongcing pa kiangah thu a pia uh hi.
24 Tua bangin thu a ngah ciangin thongcing pa in thong sung tawngnungah amaute koihin, singkol lianpi sungah a khe uh a gakcipsak hi.
25 Zankim laitakin Paul le Silas in Pasian kiangah thu ngenin la sa uh a, thongkia dangte in amau’ thungetna le lasaknate a ngai uh hi.
26 Thakhatin nakpitakin zin hong liing a, thonginn a bulpi dongin a lok gawp hi. Thakhatthu-in thong kongkhak khempeuh kihong a, thongkiate a kikhihna sikkhau khempeuh a kiphel khia hi.
27 Thongcing pa zong khanglo a, thong kongkhakte a kihong a muh ciangin thongkia mi khempeuh tai khia mangkhin hi, ci-in ngaihsun ahih manin a namsau dokin a mahmah a kithat dingin a kithawi hi.
28 Ahi zongin a aw neihzah tawh Paul kiko a, “Bangmah kicih kei in! Ka vekpi-un kim ung!” a ci hi.
29 Thongcing pa in zong meivak a la dingin mi khat sawl a, thong sungah tai-in laukawm liingkawmin Paul le Silas khe kiang va kidenna-in a va boksuk hi.
30 Tua ciangin amaute pusuahpih a, “Tote aw, hotkhiatna ka ngah nadingin bangci gamtat ding ka hi hiam?” ci-in a dong hi.
31 Amaute in, “Topa Jesuh um in. Tua hileh nang le na innkuanpihte in hotkhiatna na ngah ding uh hi,” ci-in a dawng uh hi.
32 Tua ciangin amaute in amah le a innsunga om mi khempeuh tungah Topa’ thu a hilh uh hi.
33 Tua zankim lai takpi mahin thongcing pa in amaute’ liammate sawpsiangsak a, amah le a innkuanpih mi khempeuh a kituiphum pah uh hi.
34 Tua ciangin a inn-ah amaute ciahpihin an a pia hi. Tu-in Pasian thu um uh ahih manin amah a kipan a innkuanpih khempeuh a lungdam mahmah uh hi.
35 A zingsang ciangin Rom thukhen uliante in palikbute samin, “Tua mite va khah un,” a ci uh hi.
36 Tua ahih manin thongcing pa in zong Paul kiangah, “Thukhen uliante in nang le Silas kong khah nading uh thu hong piakhin ahih manin lungnuam takin na ciah khia theita ding uh hi,” a ci hi.
37 Ahi zongin Paul in palikbute kiangah, “Kote in khialhna bangmah gamta lo napi-in mihon mai-ah hong kisat gawp hi. Kote pen Rom gammi hi ung! Hong kisat khit ciangin thong sungah hong kikoih lai hi. Tu-in kuama theih lohin kote hong khahsim nuam ahi uh hiam? Tua bang mawk hithei peuhmah lo ding hi. Rom thukhen uliante mahmah hih lai-ah hong pai uh henla, kote hong khah khia tahen,” a ci hi.
38 Palikbute in zong Rom thukhen uliante kiangah hih thu va ko uh hi. Paul le Silas pen Rom gammi ahih lamtak a phawk uh ciangin lunghimawh uh a,
39 amau mahmah va pai-in a va thum khit uh ciangin thong sung panin khah khia uh a, tua khua panin a pai khiat nadingun a thum uh hi.
40 Paul le Silas zong thong panin pai khia-in Lydia’ inn a zuan uh hi. Tua lai-ah thu um mite tawh kikhawm uh a, hanthotna kam a gen khit uh ciangin tua khua panin a ding khia uh hi.