10
Topa in Hutkhiat natu Kamciam
1 Khaal kipat hunin Topa tungah nguatui ngen vun. Ngua a paai meeikaai hong puak a, ngua zusak in, kuama theampo atu lote a hingsak pa sia Topa ahi hi.
2 Mite in milimte le aisaan theite thu dongh ahihang a zo kiknate sia leilot thu le luithawthong thu veu hi. Pawl khat in mangkhia a, ahihang tuate in nang hong lampialsak bek hi; amate hong piak thinnopna in man nei ngawl hi. Tua ahikom tuu bote bangin tua mite vakthap uh hi. Amate in lampui nei ngawl ahikom ngim nga uh hi. Ref 10:2 Mt 9:36; Mk 6:34; 10:9-10
3 Topa in, “Ka mite a uk ngamdangmite tungah ka thin uuk a, daan ka pia tu hi. Judah mite sia keima aa hi, tuaciang keima Vaanglianbelpa Topa in amate ka keam tu hi. Amate sia a thahat ka ngal siphute hong hi tu uh hi.
4 Amate sung panin ka mite a uk tu ngamukte, lampuite le ngalkap maangte hong piang tu hi.
5 Judah mite in a ngalte lampi buan sungah a siikcil ngalkapte bangin ngalzo tu uh hi. Topa in amate panpui ahiciang amate in ngalsim tu uh hi, amate in a ngalte siphu ngalkapte ngawngawn zo tu uh hi.
6 “Keima in Judah mite
ka hatsak tu hi;
Israel mite ka suatak tu hi.
Keima in amate khuangaihuai
ka sa tu a,
a vekpi in inn ah
ka ciapui kik tu hi.
Amate sia ka nial ngeingawl
mite bang hi tu hi.
Keima in Topa, a Pathian ka hi hi;
A thungetnate ka zo tu hi.
7 Ngalkapte bangin Israel mite
thahat tu uh hi.
Sapittui ne te bangin
lungdam tu uh hi.
Topa nasepna hangin
a suan a paalte in
hi zawna phawk in,
8 “Ka mite ka sam tu a,
ka kaikhawm tu hi.
Amate ka suatak tu a,
a ngei bangin ka tamsak mama tu hi.
9 Minam tuatuamte sungah
amate thethaang hi kaleng,
a khualana pan ngawngawn in
kei hong phawk tu uh hi.
Amate le a tate nungta lai tu a,
inn ah cia khawm tu uh hi.
10 Egypt le Assyria panin
amate inn ah ka ciapui tu a,
amate ii mun le ngam ah
ka teangsak tu hi.
Amate Gilead le Lebanon
zongh ah ka teangsak tu hi;
ngam bup sia mihing taw
kidim tu hi.
11 Amate in ngimna tuipi
a kaan uh ciang,
keima Topa in tuihualte
ka saat tu a,
Nile ngun thuk nate ko tu hi.
A kiphasak Assyria
kiniamsuksak tu a,
a thahat Egypt in
a thahatna taan tu hi.
12 Keima in ka mite
ka hatsak tu hi;
amate in kei hong bia tu a,
ka thu hong mang tu hi,” ci hi.
Topa in ci zo hi.