3
Tapidawte Ngamtatzia
1 Ngamukte le thuneite thu zawpin a thu a nit natu le thupha theampo vawt tu in a kingin khol natu na mihingte na phawksak in.
2 Kuama siat son ngawlin, ngual taw kilem a, a kuama theampo tungah, cikna thiamna a lak tawntung natu na son in.
3 Banghang ziam cile, eima zongh khatvei lai in, a mawmaw, thu ni ngawl le a khial thei mi ih hi ngei hi. Ci le sa deina le nopsakna namcin ii sila ih hi ngei hi. Ih nuntakna sia hazatna le eenna taw ih zangh hi; ngual in hong ensan a, tuaciang ei zongh in ih ensan hi.
4 Ahihang ih Ngumpa Pathian ii cikna le itna hong pualaak ciang,
5 ama in ei hong ngum hi. Tua in eite ii naphate ih sep hang hi ngawl a, pianthakna le nuntakna thak hong pia Thaa Thiangtho tungtawnin, ama hong hesuakna taw hong ngup ahi hi.
6 Pathian in Jesus Christ ih Hunpa tungtawnin, Thaa Thiangtho sia a kicing takin, eite tungah hong buak hi,
7 tuasia ciangin ama ii thuthiamna taw, eite sia Pathian taw thutang suak thei in ih lamet ahi tawntung nuntakna hong neisak hi.
8 Hisia in a maan thu sonna ahi hi.
Pathian umte in mihing khat sim atu thinbot thei a, a manphate sep natu in a hun uh a piak thei natu in hi thute na thupi laak tuam tu in ka dei hi.
9 Ahihang a mawmawthuai kam kinial nate, taanghpupite khang simna saute, kihauna le thukham huvau khat le khat kinialna te na pial tavun. Tuate sia phattuamna om ngawl a, man nei ngawl hi.
10 Pawl kikhenna a piangsak mihing khat ii tungah a kidop thei natu, niivei peuma na hil tavun, tua zawkciang ahile, ama taw na kipee nawn heak vun.
11 Tuabang mihingte sia a lal hi a, a mawnate in ama a khial hunlam kilanghsak ahi sia na he hi.
A khakbel Hilnate
12 Artemas ahibuale Tychicus sia nang kungah kong puak ciang, kei kung Nicopolis ah nong pai natu in hong hanciam ta'n, banghang ziam cile, phalbi hun sia tua munah zak tu in ka khensat zo hi. Ref 3:12 Sawl 20:4; Eph 6:21-22; Col 4:7-8; 1 Tim 4:12
13 Sitnipa Zenas le Apollos khualhaw hong kipat thei natu in na hu in a, a kisap tu theampo ahithei za in na vaihawmsak in. Ref 3:13 Sawl 18:24; 1 Cor 16:12
14 A kitaangsamh tatak teng a piak thei natu in mihingte in a hun uh sia thupha vawtna in a zak thei natu a sin uh kul tu hi; amate in a nuntak nate man nei ngawlin zangh heak hen.
15 Ka ompui theampo in, hong paupui tek uh hi. Upna sungah ih lawmte theampo tungah nuksetna kam na sonsak in.
Pathian ii thuthiamna sia note theampo taw hong om tahen.