TITUS
Tungah Paul ii Laithak
(Paul's Letter to Titus)
A tuanin a ngamtat pha ngawl Crete mite tam mama ii omzia a et ciangin, Pawlpi lampuite in bangbang ngamtatna nei le pha ziam ci in, a phawksakna sia thu masa ahi hi. Tua zom a Titus munah, pawlpi sungah pawlkhen tuatuamte, pasal khanghaamzawte le, nupi khanghaamzawte (tuate in numei khangmoizawte hil sawn tu hi) khangnote le silate a hil tu dan ngaisutna pia hi. A khakbel in lai atpa in, Titus munah, Tapidawte ngamtatzia tu taw kisai, a tuanin kilem tu le kipawlvawt tu a kulna, tuaciang pawlpi sungah ki etsatna, kam kinialna, kikhenthap nate pial thei natu ngaisutna pia hi.
1
1 Pathian ii naseampa le Jesus Christ ii sawltakpa, keima Paul in lai kong thaak hi.
Kei masia Pathian teal sate upna khantosak natu le, ih biakna ii hil thumaan thutak ah, a lampui tu in hong kiteal a, hong kipuak hi.
2 Tua thumaan thutak sia tawntung nuntakna lametna tungah kiphut hi. A leilot ngawl Pathian in hi nuntakna sia, ei atu in, hun kipat pan ma hong kamciam zo a,
3 tuaciang a hun hong tun tak ciangin, ama ii hong puak thu sungah hong pualaak hi. Hi thu sia kei hong ki aap a, tuaciang ih Ngumpa Pathian hong thupiakna taw ka thangsak hi.
4 Ih nei khop tek upna sungah ka tapa tatak ahi Titus tungah lai kong at hi.
Pathian le ih Hunpa Christ Jesus in, thuthiamna le thinnopna hong pia tahen. Ref 1:4 2 Cor 8:23; Gal 2:3; 2 Tim 4:10
Crete ah Titus ii Nasepna
5 Sep tu a kitaangsamh lai teng, ahi tu bangin a vaihawmsak tu le khuapi simin pawlpi upate na koi thei natu in, Crete ah nang hong nusia ka hi hi. Kong vaithakte na phawk tan:
6 pawlpi upa khat sia sitbaang ngawl tu hi; ama in zi khat bek a nei hi tu a, tuaciang, a tate sia thu um mi hi tu hi, a uuk po ngamtate le thu ni ngawlin a minthangte hi ngawl tu hi. Ref 1:6-9 1 Tim 3:2-7
7 Banghang ziam cile Pawlpi lampui khat sia Pathian ii nasepna a uk ahikom, ama sia paubanna nei ngawl tu hi. A ma sia a kihisak, a thintom, zukham thei, a ngoltol, ahibuale sum lamsang a duhop hi ngawl tu hi.
8 Ama in zindo thiam tu a, a phate dei tu hi. Ama le ama ki uk zo tu a, thutangin, thiangtho in, phinciing tu hi.
9 Ama in up tu thubul taw a kisi, a muan thamman thu sia kho takin len tu hi. Tuabang hile thumaan hilcianna taw ngualdangte hanthawn thei tu a, tuaciang, tua thumaan kihilna a nalhte ii khialna zongh lak thei tu hi.
10 Banghang ziam cile, tuabang mihing tam mama om a, a tuanin Jew biakna sung pan hong kikhealte in, amate ii thu nawnsante taw ngual langpanin theam uh hi.
11 Maizum maw in sum nga nopna bek taw, a kilawm ngawl thute a hilna uh taw, innkuan bubup buaisak ahikom, a thuson ih khaktan kul tu hi.
12-13 Amate ii kamsaang khat ahi thumaan a son Crete mipui khat ma in, “Crete mite sia a leilot tawntungte, ngamsa ngilote le a datham antuangte hi,” ci hi. Hi thu hu in, amate nasia takin teih lete amate in a maan upna nei tu hi.
14 Tuaciang Jew te ii phuatawm taanghthute le thumaan thutak a nial mihingte ii thupiakte amate in len nawn ngawl tu hi.
15 Thinsung thiangtho mihingte atu in, na theampo thiangtho hi; ahihang a ninnoite le a um ngawlte atu in, bangma a thiangtho om ngawl hi, banghang ziam cile amate thinsung le a khua ngaisutnate ninnoi hi.
16 Amate in Pathian ka he uh ci ahihang, amate ngamtatnate taw kileebul hi. Amate sia ki etsatna taw kidim a, thu ni ngawl ahiciang a pha khat zongh seam tu in kiphu ngawl hi.