3
Ni Tawpkhak Nite
1 Ni tawpkhak hun ciangin hun haksa hong om tu hi, ci in na ciamtee in.
2 Mihingte sia duhop, kaangsung he, kisathei, kiphasak tu hi; amate in ngual langin, nu le pa thu ni ngawlin, lungdamna he ngawl, biakna nei ngawlin hong om tu hi.
3 Amate sia dikna nei ngawl, hesuakna sel, ngual min siasak, ngoltol, kiitakhuai, a phate ensan,
4 muan thamman ngawl, lopthop, tuaciangin kisak theina taw kidim tu uh hi. Pathian sangin pumpi nopsakna deizaw tu uh hi.
5 Amate in ih biakna sia a pua zuunna in nei tu a, ahihang a vaangletna tatak sia nial tu uh hi. Tuabang mihingte kung pan kiheam ta'n.
6 Tuate sung pan pawlkhat sia ngual inn sungah tumin mawna vanhngit a pua, deina ukna tuatuam a nei numei thaneamte,
7 sin nuam he nuam tawntung leei ahihang thumaan thutak a tel zo ngawl numeite, amate ii upna sangah zo uh hi.
8 Jannes le Jambres in Moses a langpan uh bangma in — hi mihingte in thumaan thutak langpan uh hi. Amate sia a khua ngaisutna uh naseam ngawl a upna sangah a lel ahi uh hi. Ref 3:8 Pu 7:11
9 Ahihang amate sia mainawt ngawl tu hi, banghang ziam cile mihing theampo in amate mawmawtna hong mu tu a, Jannes le Jambres te ii thuak bangma ahi hi.
A khakbel Hilnate
10 Ahizong nangma in ka hilna hong zui a ka ngamtatna hong zui in, nuntakna sungah ka tupna nong zui hi. Ka upna, ka thinsauna, ka itna, ka thuak zawkna,
11 hong kivawtsiatna le ka thuak thute theampo nong mu zo hi. Antioch, Iconium le Lystra ah vawtsiatna nasia mama ka thuak sate theampo na he zo hi. Ahihang, Topa in tuate theampo pan hong suatak hi. Ref 3:11 Sawl 13:14-52; 14:1—7:8-20
12 A kuama po Jesus Christ taw kipawlin, Pathian dei bang nuntakna a nungta nuamte sia kivawtsia tu hi.
13 Tuaciang mihing ngilote le a kimealsealte in, phat ngawlna pan, phat ngawl seseam na ah zuan tu uh a, ngual theamin amate le amate dongin theam thuak tu uh hi.
14 Ahihang nang na hile hong kihil sa, kho takin na upna thumaan thutakte na zomto suak in. Na Syate sia a kuate ziam ci in na he hi.
15 Jesus Christ ih upna tungtawnin ngupna thu sungah hong lampui ciimna hong pia thei Lai Thiangtho sia na no ciang a, na heaksa thu ahi hunlam ciamtee ta'n.
16 Laithiangtho sia a vekpi in Pathian hu mop ahi hi. Thumaan thutak hil natu, teih natu, khialna pua natu, a maan a nuntakna tu in hil natu sung theampo ah manpha hi.
17 Tua ahikom, Pathian na a seamte in naphate theampo a vawt natu in, kicinna a cingin a nei thei natu ahi hi.