3
Pawlpi sung Lampuite
1 A maan kam teptee khat sia: Pasal khat in pawlpi lampui khat hi tu a uuk le, ama in nasep pha mama khat lungngul ahi hi.
2 Pawlpi lampuipa khat in sit baanna nei ngawl ahi tu kisamh hi; ama in zi khat bek a nei, thinpha a nei, ama le ama a ki uk zo, a cilngil ahi kul hi; zindo thiam, ngual a hil thei ahi tu kisamh hi.Ref 3:2-7 Tit 1:6-9
3 Ama sia zukham thei le a ngoltol hi ngawl het tu a, cinghin ngual taw kilem thei tu hi; ama in sum bek ngaisun ngawl het tu hi;
4 ama in a bangkua sung pha takin uk thei tu a, a tate in zatakna takpi taw a thu a nitsak thei tu kisamh hi.
5 Banghang ziam cile pasal khat in ama ii bangkua a uk natu zia a he buale Pathian ii pawlpi bangbangin keam thei tu ziam?
6 Ama in kiphatsakna taw a kidim Doaimangpa bangin pua vawkna a thuak ngawl natu in, upna sungah a khanthin sa khat hi tu hi.
7 Ama in mindai in Doaimangpa thaang sungah a awk thak ngawl natu in, pawlpi puasia a om mihingte ii zatak khat hi tu hi.
Pawlpi sung Upate
8 Pawlpi upate zongh ngamtat pha nei tu a, a citakte ahi tu kisamh hi; amate in sapittui tam lei ne ngawl tu a, sum lam sangah duhop ngawl het tu hi;
9 amate in upna thumaan a kipualaakte thinsung thiangtho taw kholet tu hi.
10 Amate kisinsak phot tu a, a kisinna a ong le seam tak tu hi.
11 A zite uh zongh, ngamtat pha nei tu a, ngual ngen ngawl tu hi; amate in na theampo sungah thutuumin thumaan tu hi.
12 Pawlpi upa khat in zi khat bek nei tu a, a tate le a bangkua sia pha takin uk zo tu hi.
13 Pawlpi upa nasep pha takin a seamte in amate atu dinmun pha khat nga hi a, Jesus Christ sungah a upna hangsan takin son ngam tu hi.
A lian Thuku
14 Hi lai kong at laitakin no kungah hong pai in hong mu pal tu, ci in lametna ka nei hi.
15 Ahihang kong hai tha le hi laithakin a nungta Pathian ii pawlpi, thumaan thutak ii dinna le a panpui ahi Pathian bangkua sungah ih ngamtat natu hong hesak tu hi.
16 Eite biakna in a lian thuku khat a hina sia kuama in, a nial thei buatu hi:
Ama in mihing mealin
hong kilangh a,
Thumaan hi ci in Thaa in lakin,
vantunglalangte in a mu uh hi.
Ama sia minamte sungah
a thu kihil a,
leitung theampo in ama umin,
tuaciang vantung ah