14
Absalom hong heakkik natu Joab in Vaihawmsak
1 Kumpipa David in Absalom ngai mama hi ci in Joab in he hi,
2 tua ahikom ama in nupi pilvang khat Tekoa ah a teang sia samsak hi. Ama hong thet ciang Joab in ama munah, “Kikhuangaisak in; na khuangai puante silh in a, na sam pot heak in. Khuangei mama khuangai in a omsa nupi khat bangin kithoai in.
3 Tuaciang nupi nu sia kumpipa kungah va pai ta'n a, ci a kong sawl teng va ci ta'n,” ci hi. Tua zawkciang Joab in a pau natu teng hil hi.
4 Numei nu kumpipa kungah pai in, zatak piakna in lei ah bok hi, tuaciang hi bangin ci hi, “Hong hu ta'n, Kumpipa awng!”
5 “Bang dei ni ziam?” ci in ama in dongh hi.
Tua nu in, “Kei sia a zawng meingong nu khi hi, topa awng. Ka pasal sia thi zo hi.
6 Topa awng, keima in tapa nii ka nei a, ni khat ni ciang kuama a khen tu a om ngawlna lo sungah kihau in, khat in a dang khat sia thatlum hi.
7 Tuaciang tu in, topa awng, ka mealheakte theampo in hong langpan hi, a suapuipa a thalup hu in ama zongh a thalup thei natu in ka tapa sia amate khut sungah aapin hong sawl hi. Hi bangin amate hong ngamta le tapa nei nawn ngawl tu khi hi. Amate in ka lam etna a khakbel sia hong suk siatsak tu a, ka pasal min kilaw natu zongh tapa om nawn ngawl tu hi,” ci hi.
8 Kumpipa in, “Inn ah cia kik ta'n, keima in hi thu kong thintoisak tu hi,” ci in zo hi.
9 “Kumpipa awng, bang po na vawt zong, hi thu tungtaang ah kei le ka bangkua in mawsiat thuak taw ung; nang le kumpi innkuan sia maw ngawl tu nu hi,” ci hi.
10 Kumpipa in, “Khat po in hong tawng le keima kungah ama hong paipui ta'n, tua hile ngim hong pia kik ngeingawl tu hi,” ci in zo kik hi.
11 Ama in, “Kumpipa awng, nong hesuakna in, Topa na Pathian tungah ka mealheakte ka tapa thi huvau phulam natu vaipuak nei sia in ka tapa a om lai sia a thalupna taw khialna lianzaw lai a vawt ngawl natu in thu hong ngetsak ta'n,” ci hi.
“A nungta Topa min taw kamciam hong pia khi hi, na tapa sia tawmno zongh bangma tat ngawl tu hi,” David in ci hi.
12 “Kumpipa awng, nong hesuakna in, kam khat hong pausak lai ta'n,” nupi nu in ci hi.
Ama in, “Son in,” ci in zo hi.
13 Nupi nu in ama munah, “Banghangin Pathian mite tungah tuabang khialna vawt ni ziam? Nangma zongh na tapa sia lei dangah a peamna pan cia kiksak ngawl ni hi, tua ahikom tu mahiat a na pau teng taw nangma le nangma mawpu kisua ni hi.
14 Ei ih vekpi in thi tu hi hing; ei sia lei ah tuibua taw kibangin, kiluak kik thei ngawl hi. Pathian ngawngawn in a thisate nungtasak kik ngawl hi, ahihang kumpipa in peamta in a om mihing khat sia a nobel in a cia kik natu lam zonsak thei ni hi.
15 Tu in, kumpipa awng, nang kungah hong pai a hi bangin thu kong sonna sia, tua mite in kei hong tawn hang hi, tua ahikom nangma tungah hong son leng kong nget sia hong vawtsak tu ci in keima le keima lametna nei kisa khi hi.
16 Pathian ii a mite a piak ngam le lei pan kei le ka tapa hong heam nuamin ko thalup hong sawm sia kung pan zong nangma in kong son teng hong ngai a, hong hun tu um khi hi.
17 Keima le keima tungah ka kicina pan, topa, na kamciamna in keima hong ngammuangsak tu hi, banghang ziam cile kumpipa sia Pathian ii vantung mi taw kibangin a pha le a sia khentel thei hi. Topa na Pathian nang taw omkhawm tahen!” ci hi.
18 Kumpipa in, “Thu khat hong dongh tu khi hi, tuaciang ahi babangin hong son nanak tu ni hi,” ci in zo hi.
Tua nu in, “Kumpipa awng, nong dok nop po hong dongh ta'n,” ci in zo hi.
19 Ama in, “Tu a bang teng nong sep sia Joab ii hong sawl ahi ziam?” ci in dongh hi.
Tua nu in “A thiangtho nate theampo taw kiciam khi hi, Kumpipa awng nong thudok sia ka pial thei natu mama a lam om ngawl hi. Na ulianpa Joab in ka sep tu le ka pau tu teng hong son takpi hi.
20 Ahihang ama in hi vai teng thiangsak nuam ahi hu in a vawt ahi hi. Kumpipa nang sia Pathian ii vantunglalang bangin ciim a thupiang theampo he ni hi,” ci hi.
21 A zawkciang kumpipa in Joab munah, “Na dei bangin sep tu ka khensat zo hi. Va pai ta'n a tua khangno Absalom sia hi sungah hong ciapui ta'n,” ci hi.
22 Joab in David ii mai ah zatakna taw kileisee sukin, “Pathian in thupha hong pia tahen, Kumpipa awng! Tu in kei tungah nong lungkim hunlam sia kong nget teng nong piak ciangin ka he hi,” ci hi.
23 Tua zawkciang ama thoto in Geshur ah pai a, Absalom sia Jerusalem ah ciapui hi.
24 Ahihang kumpipa in Absalom sia kumpi inn sungah a teen ngawl natu in thupia hi. Kumpipa in, “Ama mu nuam ngawl khi hi,” ci hi. Tua ahikom Absalom sia ama inn ah teangin kumpipa mai ah kilaak ngawl hi.
Absalom le David Kilem kik
25 Israel ngam sungah mealphatna lam sang Absalom bangin a minthang kuama om ngawl hi; a lu pan a peang dong sit baanna nei ngawl hi.
26 A sam saa mama a, sau leih in a ngit leih ciang kum sim khatvei veu tan hi. A sam ngitna sia kumpi khaiteena taw tee ciang, kilogramme 2 vaal pha hi,
27 Absalom in tapa thum le Tamar kici tanu khat nei a, a mealpha mama numei khat ahi hi.
28 Absalom sia kumpipa taw kimu ngawlin kum nii sung Jerusalem ah teang hi.
29 Tua zawkciang ama vai in Joab sia kumpipa kung paisak nuam a, samsak hi; ahihang Joab hong pai ngawl hi. Khatvei ma Absalom in Joab samsak kik ahihang Joab pai nuam peang ngawl hi.
30 Tua ahikom Absalom in a naseamte munah, “En vun, Joab ii lo sia keima taw kingizawng hi, tuaciang a sungah mangtaang kiciing hi. Pai tavun a va hal tavun,” ci hi. Tua ahiciang amate pai in tua lo hal uh hi.
31 Absalom inn ah Joab pai in, “Banghangin na naseamte in ka lo hong halsak ziam?” ci in dongh hi.
32 Absalom in, “Banghang ziam cile kong sam sasak hang nang hong pai ngawl ni hi. Kumpipa kungah pai in, kei taangin thu hong doksak lete oai khi hi: ‘Banghangin Geshur nusia in hi sungah hong pai kana khi ziam? Tua munah om po leng phazaw tu hi ve,’ ci hi. Absalom in zom to a, “Kumpipa taw ka kimu natu hong vaihawm ta'n, tuaciang kei maw ka hi le hong thatlum tahen,” ci hi.
33 Tua ahikom Joab sia Kumpipa David kungah pai a, Absalom ii ci teng son hi. Kumpipa in Absalom samsak a, ama pai in kumpipa mai lei ah hong kun suk hi. Kumpipa in ama muakin namh hi.