8
Mipite in Kumpipa khat Ngen
1 Samuel a huai ciangin, a tapate Israel thukhenmang seamsak hi.
2 A u min sia Joel hi a, a nau zaw sia Abijah hi; amate sia Beersheba ah thukhen hi.
3 Ahihang amate in a pa nasep bangin a seam bua uh hi; amate in sum vawt tu bek kin ahikom, sumnguk ne in thumaan thutang taw thu a khen bua uh hi.
4 Tuasia ciang Israel lampui theampo kikhawmtua in, Ramah ah a om Samuel kungah pai a,
5 “En in, nang sia haam vaial zo a, tuaciang na tate sia nang sul hong zui ngawl hi. Tuabang ahikom ngamdangte ii nei bangin, ko hong uk tu kumpipa khat hong tealsak ta'n,” ci hi.
6 Samuel sia amate ii kumpipa khat a ngetna huvau lungkim ngawl hi; tua ahikom ama in Topa tungah thungen hi,
7 tuaciang Topa in, “Mipite ii nang tungah hong son theampo ngai in. Amate ii nial sia nang hi ngawl ni hi; keima sia a kumpipa ka hina hong nial hi.
8 Egypt panin amate ka pusua pui pan kipan, amate in kei hong nusia in pathian dangte bia uh hi; kei tungah hong vawt tawntung teng tu in nang tungah hong vawt hi. Ref 8:5 Thkna 17:14
9 Tuabang ahikom, amate thu ngai in a, ahizong a kumpipate in amate bangbangin vawt tu ziam ci sia a kidop khol natu a pha tatakin son in,” ci hi.
10 Samuel in kumpipa khat a ngen mipite tungah, Topa ii ama tungah a ci teng son siat hi.
11 Samuel in, “Hisia in na kumpipa ii no hong vawt tu dan ahi hi. Ama in na tapate ngalkap suaksak tu hi; pawlkhat sia a siphu ngalleang te uksak tu hi, a dangte sia siphu ngalkap suaksak tu a, tuaciang pawlkhat sia siphu ngalleangte ii mai ah taisak tu hi.
12 Ama in pawlkhat te sia mihing tulkhat ukin koi tu a, pawlkhat sia mihing sawmnga uk in koi tu hi. Na tapate in ama lote a thawsak uh kul tu a, a an laaksakin, a ngalhiamte le siphu ngalleang sungah a kizangh vanhte vawtsak tu hi.
13 Na tanute sia ama ii sathau namtui vawtsak in, a anhuan, a moh emte hisak tu hi.
14 Ama in noma lo phabel te, sapithuante le olive kungte la in a uliante pia tu hi.
15 Noma lo an sawm a khat le na sapit uh sawm a khat la in, a kumpi inn sung uliante le zum naseam dangte hawmsak tu hi.
16 Ama in na naseamte, na khui phabelte le laate la tu a, na seamsak tu hi.
17 Na tuu honte sung pan sawm a khat ama in la tu hi. Tuaciang noma mama zongh ama ii silate na suak tu uh hi.
18 Tua hun hong thet ciang, noma ii tealsa na kumpipa hangin nasia takin na phun na mau tu uh hi, ahihang Topa in na phun na mauna uhte hong ngai ngawl tu hi,” ci in sonthiang hi.
19 Mipite in Samuel nadon ngawlin, “Phamaw bo!
20 Ngamdangte taw ka kiban natu in ko zongh kumpipa khat dei khu hi, ko hong uk tu le ngalmai si in a do tu kumpi tuam dei khu hi,” ci uh hi.
21 Samuel in amate ii son theampo ngai a, tua zawkciang pai a, Topa tungah son hi.
22 Topa in, “Amate dei bangin vawt in a, kumpipa khat amate pia ta'n,” ci in zo hi. Tua zawkciang Samuel in Israel mite theampo a inn uh ah cia kikin sawl hi.