31
Saul le A tapate ii Thina
(1 Khangtaanghthu 10:1-12)
1 Gilboa Mual ngal kidona ah Philistine te in Israel te do uh hi. Israel te tam mama tua munah thi in, a taang laiteng, Kumpipa Saul le a tapate zongh tai uh hi.
2 Ahihang Philistine te in amate pha in Saul ii tapate thum, Jonathan, Abinadab le Malchishua te that uh hi.
3 Saul ii kiim ah nasia tak ngal kidona om a, Saul ama mama ngalte thaltangte in kha in, nasia liam mama hi.
4 Ama in a ngalhiam pua tangvalpa munah, “Pathian sel Philistine te ii selno a hong thalup ngawl natu in, na namsau dokin hong that ta'n,” ci hi. Ahihang tangvalpa in tuabang a ngamtat tu lau mama hi. Tua ahikom Saul in ama namsau ma la in tua dawnah ama le ama kisep hi.
5 Tangvalpa in Saul thi zo ci in a mu ciang, ama zongh ama ii namsau dawn ma ah kisepin Saul taw thi khawm hi.
6 Tuabangin Saul, a tapate thum le tangvalpa thi uh hi; Saul ii mite theampo tua ni in thi siat uh hi.
7 Jezreel Kuam ii langkhat Jordan ngun nisuana sang a om Israel te in, Israel ngalkaphonpi taikeak zo a, Saul le a tapate kithat zo ci a zaak uh ciang amate a khua uh nusia in tai uh hi. Philistine te pai in tua khuate la uh hi.
8 Ngal kido khuavak ni in Philistine te a thite vanh laaksak tu in hong pai uh ciang Saul le a tapate thum ii luang Gilboa Mualvum ah a kisial mu uh hi.
9 Amate in Saul ii ngawng tan in, a ngal dalna teng suut a, tuate taw kamtaite Philistia ngamsung tangciing amate ii milimte le a mite tungah a lungdamna thu taangko tu in paisak hi.
10 Tua zawkciang amate in Saul ii ngalhiamte a Astarte numeipathian biakinn sungah koi in, a luang sia Beth Shan khuapi luphung tungah kilh uh hi.
11 Gilead ngam Jabesh mite in Saul tungah Philistine te ngamtatna a zaak uh ciang,
12 pasal hangbel teng hong kipanin Beth Shan ah zankhuateak a pai uh hi. Amate in Saul le a tapate ii luang teng luphung tung pan la in, Jabesh ah ciapui kik a, tua munah hal uh hi.
13 Tuaciang a ngu teng la a, khua sung makeang thingkung nuai ah phum in ni sali sung an tang uh hi.