29
Philistine te in David Nial
1 Philistine te in a ngalkap theampo Aphek ah hong paipui uh hi, tua laitakin Israel te sia Jezreel Kuam sungah a om cik ah ngiaphual saat uh hi.
2 Philistine kumpi nga teng in amate mi tek a za pawl, a tul pawl taw kuan uh hi; David le a mite, Achish kumpipa taw a nungsang pan kuan uh hi.
3 Philistine ngalkap maangte in amate mu in, “Hi Hebrew te, hi sungah bang hong hi ziam?” ci uh hi.
Achish in, “Hi sia David hi, Israel kumpipa Saul ii ulian khat hi. Tu in ama sia kei taw khuangeipi ma omkhawm zo khu hi. Ama kei kung hong zot pan kipan ka mawsak natu a ngamtatna bangma mu ngawl khi hi,” ci in zo hi.
4 Ahihang Philistine ngalkap maangte in Achish tungah thin uuk in, ama munah, “Tuasia pa na piaksa khua ah puak kik in. Ngal kidona phual ah ei taw kuansak heak in; ngal kido sungin ama in ei hong langpan kik thei tha tu hi. A topa ii maipha a nga kik natu in ih mite thina sangin ama atu a phazaw dang bang om ziam?
5 A tatakin ci leang, ama sia David hi a, numeite laamin lasa a, ‘Saul in a tul a tul in that a, David in a tulsawm, a tulsawm in that hi,’ a ci sia pa hi ngawl ziam?” ci uh hi. Ref 29:5 1 Sa 18:7; 21:11
6 Achish in David sam a, “Israel ii a nungta Pathian taw kiciam hi tong, nang sia kei tungah hong thumaan ni hi; hi kidona sungah kei taw kikop in ngal hong simsak leng lungkim tu khi hi. Kei kung nong zot ni pan kipan nang tungah mawna kong sot tu bangma om ngawl hi. Ahihang kumpi dangte in hong thukimpui ngawl hi.
7 Tua ahikom inn ah thinnuam takin cia kik ta'n a, amate lungkim ngawl tu bangma vawt heak in,” ci hi.
8 David in, “Bang ka sep khial om ziam, topa awng. Na ci bangin nang kung kong zot a kipan na na ka sepna sungah sep khial vawt khial nei ngawl ka hile, nang ka topa le ka kumpipa taw kuankhawm in na ngalte hong dosak ngawl tu khi ziam,” ci in zo hi.
9 Achish in, “Na ci teng thukim khi hi, nang sia Pathian vantung mi khat za in hong thumaan hi ci in kong ngaisun hi. Ahihang kumpi dangte in nang sia ngal sungah ko taw kuan khawm thei ngawl tu hong ci hi.
10 Tua ahikom David awng, Saul nusia in, kei kungah hong pai note theampo sia zing ciang, thopal in khuavak po ciang nong nusiat uh kul tu hi,” ci hi.
11 Tuabangin David le a mite, a zing ciang zing tuungin Philistia zuan kik a, Philistine te sia Jezreel ah paitan uh hi.