27
Philistine te sungah David
1 David in ama le ama hi bangin kici hi, “Ni khat teteei ciang Saul in kei hong thatlum tu hi. Kei ngamtat natu a phabel sia Philistia ah tai in ka suatak tu ahi hi. Tuasia ciang Saul in kei Israel ngam sungah hong zon sia kheal tu a, ka ngammuang tu hi.”
2 Tua ahikom David le a mite 600 sia thakhat ma in Gath kumpipa Maoch ii tapa Achish kung zuan uh hi.
3 David le a mite sia a innkuanpuite taw Gath ah peam uh hi. David taw a kop a zite nii sia Jezreel pan Ahinoam le Carmel pan Nabal ii zi meingongnu Abigail ahi uh hi.
4 Saul in David Gath ah a tai a zaak ciang David a zon tawntung kheal hi.
5 David in Achish munah, “Nang ka lawm na hile ka teen natu khuano khat hong ngasak ta'n. Topa awng khuapi sungah nang taw ka teenkhop tu sia kisam ngawl hi,” ci hi.
6 Tua ahiciang Achish in Ziklag khua pia a, tua hu in Ziklag sia Judah kumpite neisa hi top hi.
7 David in Philistia ah tha sawm le tha luk teang hi.
8 Tua hun sung tengin David le a mite in tua Geshur, Girzi, le Amalek ngamkhente sungah khuangeipi a teang sa mite sim uh hi. Ama in amate ii ngam sia Shur dong, Egypt paina lamdung theampo simsuk hi,
9 a pasalte le a nupite that in, a tuu, a khui, a laa le a kalaoh te le puan ngawngawn laaksak uh hi. Tua zawkciang Achish kung veu ah cia kik hi,
10 tua pa in, “Tutung koisungah ngal sim ni ziam?” ci in dongh bul a, tuaciang David in, Judah thangsang ngam, ahibuale Jerahmeel bee le phungte ngam, ahibuale zong Ken te ii teenna ngamte ka sim hi ci hi.
11 David in, ama le a mite ii ngamtatna sa teng kuama ii Gath ah cia in a son thei ngawl natu in, pasal le numei theampo thatlum siat hi. Hisia in Philistia ah a teen sung tawntung David ngamtatna ahi hi.
12 Ahihang Achish in David muang a, ama le ama hi bang kici hi, “Ama sia a mipui Israel te in ensan mama ahiciang a nuntak tawntung keima na hong sepsak tu hi,” ci hi.