22
1 Vantunglalang in, Pathian le Tuuno kumpi tokhum kung pan hong luang suk, crystal suang bangin a tee vakil nuntakna nguntui sia hong lak a, Ref 22:1 Eze 47:1; Zec 14:8
2 khuapi sung lampi laizang ah luangsuk hi. Ngun ii a lang le lang ah nuntakna thingkung khat veve po a, tua thingkung sia, tha simin khatvei veu kum khat in sawm le niivei nga hi. Tuaciangin a thingteete sia minamte ciidamsak natu ahi hi.Ref 22:2 Pian 2:9
3 Pathian haamsiatna nuai ah a om peuma, khuapi sungah kuama a kimu buatu hi.
Pathian le Tuuno ii kumpi tokhum sia khuapi sungah om tu a, a naseamte in ama bia tu uh hi.Ref 22:3 Zec 14:11
4 Amate in ama ii maitang mu tu a, amate talki tungah a min ki at tu hi.
5 Zan a om nawn buatu a, amate in meiinn le nitaang kisamh nawn ngawl tu uh hi, banghang ziam cile Topa Pathian sia amate khuavak hi tu a, amate in a tawntung a tawntungin ukna nei kumpite bangin a maang tu uh hi.Ref 22:5 Is 60:19; Dan 7:18
Jesus Hong paina
6 Tua zawkciang vantunglalang in, kei tungah, “Hi kammalte sia maan a, muan taak hi. Kamsaangte tungah a Thaa a pia Topa Pathian in hai ngawlin hong piang tu thute, a naseamte tungah lak tu in a vantunglalang sawl zo hi.”
7 “Ngai vun! Kei, hong pai pal tu khi hi. Hi laibu sungah sonkholnate a zuite in mihing hamphate ahi uh hi,” Jesus in ci hi.
8 Keima John in hite theampo ka za zo a, ka mu zo hi. Tuaciang ka zaak zawkciang le ka mu zawkciangin, vantunglalang peang ah ka bok a, hi nate hong lak vantunglalang sia bia tu in ka kipan hi.
9 Ahihang ama in kei tungah, “Kei hong bia heak in! Keima in nangma le na suapuite ahi kamsaangte le hi laibu sungah a om thute a zuite theampo taw naseam khawm khat ka hi hi. Pathian bia in!” hong ci hi.
10 Tuaciang vantunglalang in kei kungah, “Hi laibu sung a ki at thute a tun tu hong nai zo ahikom, iimcip heak in” hong ci hi.
11 A ngilo sia in a ngitlo bangin paisuak tahen a, a kiihuai sia in a kiihuai bangin zom suak tahen; a kuama po mihing phate in phatna vawt suak tahen a, a thiangthote in a thiangtho in om suak tahen,” hong ci hi.Ref 22:11 Dan 12:10
12 Jesus in, “Ngai in! Kong pai pal tu hi. Mihing sim tungah ama ii sepna bangin, ka piak tu thamante kong keng tu hi.Ref 22:12 Is 40:10; 62:11; Ps 28:4; Jer 17:10
13 Kei sia a masabel le a khakbel, a kipatna le a tawpna ka hi hi,” ci hi.Ref 22:13 Tpl 1:8; Is 44:6; 48:12; Tpl 1:17; 2:8
14 Nuntakna thingnga neak thei natu le khuapi sungah kongkha kaantan in pai thei natu in a puantual a sawp thiangte in mihing hamphate ahi uh hi.Ref 22:14 Pian 2:9; 3:22
15 Ahihang lampialte, bum le ai toaite, a paktatte, mihing thatte, milim biate, leilot kampauna le ngamtatna taw ngualtheam theite khuapi puasia ah om tu uh hi.
16 “Keima Jesus in, hi thute pawlpi sung note tungah a thangsak tu in ka vantunglalang kong paisak zo hi. Kei sia David ii zung le a suan ka hi hi; keima in nikonghong aksi taang sia ka hi hi,” ci hi. Ref 22:16 Is 11:1,10
17 Thaa le a Mothak in, “Hong pai ta'n!” hong ci hi.
A zate theampo zongh in, “Hong pai ta'n!” ci si hen.
A dangko theampo hong pai tavun; nuntakna tui a dei peuma in, tua nuntakna tui letsong in saang tavun.Ref 22:17 Is 55:1
Thukhupna
18 Keima John in, hi kamsaanna laibu sungah a kikhumte a sim peuma tungah kidop natu thu ka pia hi: Khat pawpo in a belap le, Pathian in hi thubu sungah a kison ama ii daante tungah ngimnate belap thua tu hi.Ref 22:18-19 Thkna 42:2; 12:32
19 Tuaciang khat pawpo in hi laibu sungah kamsaanna kammalte a dok le, Pathian in ama sia hi laibu sungah a kison nuntakna thingkung nga le Khuapi Thiangtho pan a nga tu tel teng taansak tu hi.
20 Hi thute theampo tetti a pang pa in, “Hi hi, maan hi! Kong pai pal tu hi!” ci hi.
Na ci bangma hi tahen. Topa Jesus awng, hong pai ta'n!
21 Topa Jesus ii thuthiamna sia a kuama po tungah hong om tahen.