7
Nupa Kiteenna taw Sonteena
1 Suapuite awng, thukham huvau tel siat na hi uh ciang, son tu a kong kipat thu zongh tel mama tu nu hi. Mihing khat a nuntak laiteng bekma in thukham in uk hi.
2 Sonteena in numei pasal nei khat sia, a pasal nuntak lai teng bekma in thukham in khii hi; ahihang a pasal a thi le a zi sia tua pasal taw a kikhii khawm tua thukham panin suakta hi.
3 Tua ahikom a pasal nungta nginge lai in, numei in pa dang khat taw a teang le a pasal palngul hi kici tu hi; ahihang a pasal a thi le, thukham panin a suakta numei hi a, ngualdang khat a teenpui hangin ama in palngul mawna vawt ahi bua hi.
4 Ka suapuite awng, note zongh tua taw kibang nu hi. Thukham tungtaang ah note zongh thi zo nu hi, banghang ziam cile note in Christ ii pumpi khen khat veu na hi tek uh hi; tuaciang tu in Pathian tungah a taktai sepnate ih nei thei natu in thina pan a, a kitho kiksak Pa ii neisate na hi uh hi.
5 Banghang ziam cile mihing pianzia bangin ih nuntak laitakin Thukham ii holna taw maw nopnate in ih pumpi sungah na hong seam a, tuaciang thi theina nasepna sungah eite ih kiva mama hi.
6 Bangpo ahizong, tu in eite Thukham taw ih kipeal zo hi, banghang ziam cile khatvei lai a hong luangtasak tua Thukham ih thi san zo hi. A ki at thukham ngeina lui bangin na ih seam nawn bua a, Thaa ii ngeina thak bangin ih seam hi.
Thukham le Mawna
7 Tua ahile bang ih ci tu ziam? Thukham mama pha ngawl hi ih ci tu ziam? Hi ngawl het hi! Thukham in mawna a ci sia hong hesak hi zaw hi. Thukham in, “Ngual khat ii neisa na dungawk heak vun,” ci buale dungawk ci sia bang ziam ci in ka he buatu hi.Ref 7:7 Pu 20:17; Thkna 5:21
8 Thupiakna ii sawl hu in mawna in ka sungah dungawk nopna tuatuam hong piansak natu hunpha nga hi. Thukham om ngawlna munah mawna sia a thi ahi hi.
9 Keima ma zongh khatvei lai in thukham ngawl taw ka nungta ngei hi; ahihang thupiakna a om hunlam ka heak tak ciangin, maw nopna hong thahat a,
10 tuaciang kei ka thi hi. Tuasia ciangin nuntakna a piangsak tu thupiak sia kei atu thina ahi hi.
11 Mawna in hunpha nga in thupiakna tungtawnin na hong seam a, kei hong theam in hong thatlum hi. Ref 7:11 Pian 3:13
12 Tua ahikom Thukham in thiangtho a, thupiakna zongh thiangtho in pha a, tang hi.
13 Tua ahile hi bangin a pha thu khat in, kei thina hong piangsak hi ci tu hi ziam? Hi ngawl hi! Hong thisak sia in mawna hi, mawna in a pianzia tatak sia a kilangh natu in a pha khat hong zangh a, kei tungah thina hong piangsak ahi hi. Tua ahikom thupiakna a om hu in mawna ii a lauhuai a phat ngawlna kician seseam hi.
Thinsung Buaina
14 Thukham sia thaa taw kisai hi ci in ih he hi; ahihang keima in a thithei mihing hi a, mawna sungah sila bangin a kizuak sa ka hi hi.
15 Ka sep ka vawt sia bang ziam ci in ka tel bua hi; banghang ziam cile ka vawt nopte ka vawt bua a, ka vawt nop ngawl teng ka vawt hi.Ref 7:15 Gal 5:17
16 Ka vawt nop ngawlte ka vawt ciangin, Thukham sia maan hi ci in ka thukimpuina hong kilangh hi.
17 Tua ahikom hite a vawt sia in kei tatak ka hi bua hi; ka sung a teang mawna sia ahi hi.
18 Mihing ka hina sungah — a pha bangma om ngawl hi ci in ka he hi. Banghang ziam cile a pha vawt nopna ka sungah a om bel hangin ka vawt thei bua hi.
19 A pha ka vawt nopte ka vawt bua a, ka vawt nop ngawl a siate ka vawt zaw hi.
20 Ka vawt nop ngawlte ka vawt le tuabangin a vawt sia kei ka hi bua hi. Ka sung a teang mawna in vawt ahi hi.
21 Tua ahikom ngeina khat om hi ci in ka phawk hi. A pha khat ka vawt nop ciangin, a sia vawt tu bek teal theina ka nei hi.
22 Ka sungah a nungta sia in Pathian thukham diksa hi.
23 Ahihang ka pumpi sungah ngeina dangkhat in na hong seam hi — ka thinsung ii dik a sak ngeina sia a langpan ngeina khat sia ahi hi. Ka pumpi sung a na hong seam mawna taw kisai thukham ii thongtaakpa hong suaksak hi.
24 Bangza in a thinngim mihing khi ziam! Thina sung hong zotpui hi pumpi panin akua in hong suatak tu ziam?
25 Ih Topa Jesus tungtawnin hong suaktasak Pathian tungah lungdamko tawng!
Tua ahikom ka dinmun sia hi bang hi: keima hantang in ci leang Pathian thukham sia ka thinsung bek in zui zo a, ka mihing pianzia ahile mawna ngeinate zui hi.