2
Pathian Thukhenna
1 Note in ngual tungah thukhen hi ngawl nu ziam? Akua po na hi uh zong na paulap tu om ngawl hi. Banghang ziam cile ngual tungah thu na khen uh ciangin noma zongh amate ngamtat bangma in na ngamta veve uh le noma le noma thu kikhen na suak uh hi. Ref 2:1 Mt 7:1; Lk 6:37
2 Pathian in hi bang a ngamtate tungah thu a khen ciangin thutang taw thukhen hi ci in ka he uh hi.
3 Ahihang no, ngual tung a thukhente awng, noma zongh in amate ngamtat bangma in ngamta na hi uh hi! Pathian thukhenna taw kipeal thei tu ki um na hi uh ziam?
4 Tua ahibuale ama ii cikna, thiamna le dual zawknate zawnsak vawt na hi uh ziam? A tatakin Pathian cingh mama hi, banghang ziam cile na kisiik kik natu in ama in hanciam in lam hong pui hi.
5 Ahihang note na thin uh pui in na lungtang uh sak hi, tua ahikom Pathian sia thin uukna le thutang taw thu a khen Ni ciangin na daan khak tu uh sia a nasia seseam in hong kilangh tu hi.
6 Banghang ziam cile Pathian in mihing sim in a sep a vawt bangin thaman a pia tu hi.Ref 2:6 Ps 62:12; Pau 24:12
7 Mihing pawlkhat in nasep pha seam zomin minthanna, upatna le thi mawk nuntaknate Pathian kungah zong uh hi. Tuate tungah Pathian in tawntung nuntakna pia tu hi.
8 Midangte ahile amate atu bek ngaisun in, thumaan nial in a maan ngawl thu zui uh hi; tuate tungah Pathian in a thangsiatna le a thin uukna buak tu hi.
9 Siatna a vawt mihing theampo tungah thuakna le natna hong om tu a, Jew te masa phot tu a tua zawkciangin Gentile te zongin thuak tu hi.
10 Ahihang Pathian in minthanna, upatna le thinnopna sia thupha vawtte theampo tungah, Jew te masa photin Gentile te zongh pia tu hi.
11 Banghang ziam cile Pathian in mihing khat sim tungah a kibang khaiteena taw thukhen hi.Ref 2:11 Thkna 10:17
12 Gentile te in Moses Thukhamte a nei bua uh hi; amate in Thukham puasia ah om in, mawna vawtin mangthang uh hi. Jew te in Thukham nei uh hi; amate maw a Thukham in amate thukhen hi.
13 Banghang ziam cile Pathian mai ah thutang suana in Thukham zaakna taw piang ngawl a Thukham sawlnate zuina taw piang hi.
14 Gentile te in Thukham nei ngawl hi; ahihang Thukham sawl bangin ngamta tu in amate le amate in a thinsung uh ah a khensat uh simin Thukham nei suak uh hi. Thukham nei ngawlte hi phot ahihang a neite suak uh hi.
15 Amate ngamtatna in Thukham sawlnate a thinsung ah ki at hi ci in lak hi. A thinsung uh ah, kithasun theina le kithutangsak theina a nei theina zongh in, hi thu maan hi ci in lak hi.
16 Tua ahikom Lungdamna Thupha ka hilna bangin ci leang, mihing theampo ii a thimtham ngaisutnate tungah Jesus tungtawnin Pathian in thu a khen Ni ciang, tu a ih son bangin hong piang tu ahi hi.
Jew te le Thukham
17 No, Jew te ka hi uh a cite awng, note sia Thukham suangin Pathian huvau ah a kisuangtaakte na hi uh hi;
18 Pathian in bangbangin ngamta le hong oai ziam ci in na he uh a, Thukham panin a maan le a maan ngawl thute teal thei natu na sin zo uh hi;
19 note in mittawte lamlak tu, khuazing sung a omte atu khuavak,
20 a mawmawte atu a hilpa, khuatel ngawlte atu syapa na hi uh hi. Thukham sungah thumaan le heakna kicing in om hi ci in a kholette na hi uh hi.
21 Ngual zongh hil thei na hi uh le noma le noma banghangin kihil ngawl nu ziam? “Nguta heak vun,” ci in na hil uh hi. Ahihang noma mama in na ngu uh ziam?
22 “Palngul mawna na vawt heak vun,” na ci uh hi — Noma in palngul mawna na vawt uh ziam? Milim biakna na ngaimaw uh hi — ahihang, biakinnte zawthawk thu taw na phuul uh ziam?
23 Pathian Thukham nei hing ci in kisuangtaak nu hi — ahihang a thukham na paltanna uh taw Pathian min na paansak uh ziam?
24 Laithiangtho in, “No Jew te hu in Gentile te in Pathian sonsia hi,” ci hi. Ref 2:24 Is 52:5
25 Thukham na tang uh le na vunteap atna in man nei hi; ahihang Thukham na tang bua uh le na vunteap at bua le uhte phazaw hi.
26 Gentile mite vunteap a at ngawlte in Thukham thupiakna a ni uh le Pathian in vunteap atte bangma in ngaisun ngawl tu ziam?
27 Tua ahikom Thukham nei a vunteap at napi in, tua Thukham a zui ngawl no Jew te sia vunteap at ngawl napi thukham a zui Gentile te in hong ningkhiin tu hi.
28 Vunteap ki at takpi a, Jew tatak a kicite sia akua bangte hi peuma tu ziam? A puatham bek Jew hi a vunteap atna in cii le sa bek ahite Jew tatak kici ngawl hi.
29 Jew tatak a kicite sia a sungsang Jew hi a, a thinsung vunteap a ki at, tua zongh Pathian Thaa ii sepna taw a ki at hi in, thukham ii sep le vawt ahi ngawlte hi. Hi bang mite in mihingte pokna hi ngawlin Pathian pokna saang uh hi.Ref 2:29 Thkna 30:6