15
Mihing dangte Diksak tu in Ngamta zaw vun
1 Upna sungah a thahat eite in, upna note vanh ngit dawnin ih hu natu ahi hi. Eima nop bek ih zong buatu hi.
2 Tua hi ngawlin eite khat simin ih suapuipa phattuam natu le upna sungah ih khantosak natu in, ama diksak tu in ih ngamta tu hi.Ref 15:3 Ps 69:9
3 Banghang ziam cile Christ in ama ii nop a kizui bua hi. Tuabang hi ngawlin, laithiangtho ci bangin, “No hong selnote ii hong selnona sia kei tungah hong tu hi,” a ci bangin ngual atu in nungta hi.
4 Eite thin sauna le hanthotna tungtawn a, upna ih nei natu in, Laithiangtho sungah a ki atte theampo in eite hong hil natu a ki at ahi hi.
5 Thuak zawkna le hanthotna ii a naak ahi Pathian in, Jesus Christ zia na zuina uh taw note sungah tuabang khua ngaisutna hong piangsak tahen.
6 Note theampo in aw khat sa in, ih Topa Jesus Christ ii pa ahi Pathian na pok vun.
Gentile te atu Lungdamna Thupha
7 Pathian minthan natu in Christ ii note hong saan bangma in, note zongh khat le khat na kisaang vun.
8 Banghang ziam cile Pathian in thumaan a, amate ii pute pate tungah a kamciamte tungsak tu ahikom,
9 Gentile te ngawngawn zongh in Pathian ii hesuakna a pok thei natu in Christ in Jew te naseampa suak hi kong ci hi. Laithiangtho in,
“Tua ahikom Gentile te sung pan
ka lungdamna nang tungah kong ko tu a,
pokna la ka sa tu hi,” ci hi.Ref 15:9 2 Sa 22:50; Ps 18:49
10 Hi bangin ci thua hi,
“Gentile te awng,
Pathian mite taw lungdam vun!” Ref 15:10 Thkna 32:43
11 A ci kik na panin,
“Topa pok vun, Gentile theampo awng;
Pok vun, mihing theampo awng!”Ref 15:11 Ps 117:1
12 Isaiah zongh in,
“Jesse suan khat hong piang tu a;
ama in Gentile te a uk tu in hong pai tu hi,
tuaciangin amate in ama tungah,
lametna nei tu hi,” ci hi.Ref 15:12 Is 11:10
13 Thaa Thiangtho thahatna taw, na lametna sungah na khanto natu in, lametna ii naak ahi Pathian in ama na upna uh hu in, lungdamna le thinnopna taw hong kidimsak tahen.
Paul ii Hangsan takin Lai a at Ngamna
14 Suapuite awng, note phatna taw kidim tu in kong um a, heakna ci theampo zongh nei in, khat le khat kihil thei tawntung tu in kong um hi.
15 Ahihang kong phawksak ngei thute tungtawnin hi laithak sungah ka hangsan mama hi. Tuabangin ka han ngawpna in banghang ziam cile Pathian in hunpha hong pia a, Gentile te atu a diang tu in,
16 Jesus Christ ii naseampa hong suasak hang ahi hi. Thaa Thiangtho ii a aap Gentile te, Pathian ii saan thamman biakpiakna ahi thei natu in Pathian tung panin hong pai Lungdamna Thupha hil in thiampi khat bangin ka diang hi.
17 Jesus Christ taw pumkhat ka hina hangin Pathian nasep ka sepna huvau ah ka kisuangtaak thei hi.
18 Gentile te ii Pathian thu a nit natu lamhil tu in Christ in kei tungtawnin na hong sepna sa hang bekin hang takin ka pau ngam hi. Tua nasepna sia kammal le ngamtatna taw hong seam zo a,
19 nalamdang lakna le a lamdang nate ii vaangletna le Pathian Thaa ii vaangletna taw hong seam zo hi. Tua ahiciang Jerusalem pan Illyricum ah khualhaw in ka paina ah Christ huvau Lungdamna Thupha a cingin ka thangsak zo hi.
20 Ka tup ka sawm sia in, ngualdang khat po ii cian sa phungkawngte tungah inn a sa ka sua ngawl natu in Christ min a kiza ngeingawlna munte bek ah Lungdamna Thupha thansak tawntung tu ahi hi.
21 Laithiangtho zongh in,
“A thu a kihil ngeingawl mite in
ama a mu tu hi,
tuaciangin a za ngeingawlte in
a tel tu uh hi,” ci hi.Ref 15:21 Is 52:15
Paul ii Rome khua Haw tu A sawmna
22 Hi bangin note kungah kong pai tu tamvei ma hong kikhak zo hi.Ref 15:22 Rom 1:13
23 Ahihang tu in hi ngamkhente sungah ka nasepte ka man zo a, kum tam mama note taw kimu tu in hong pai nuam top ka hi hu in,
24 tu in hong pai thei tu in ka kilamen hi. Spain ngam ah ka pai lamin note taw ka kimu nuam a, tawmvei kong taam zawkciangin, tua munah ka pai natu hong hu le uhte ka uk hi.
25 Ahitazong, tu laitak Jerusalem ah a om Pathian mite atu seam tu in ka pai tu hi.Ref 15:25-26 1 Cor 16:1-4
26 Banghang ziam cile Macedonia le Achaia pawlpite in Jerusalem ah Pathian mi a cimawte huna tu sum pia tu in, amate thu in khensat zo uh hi.
27 Hisia amate mama ii khensat ahi hi; ahihang a tatakin ci leang amate in tua mizawngte a hu tu sia a sep tu ahi hi. Jew te in thaa lam sangah thuphate Gentile te a hop bangma, Gentile te zongh in Jew te sia a leitung neisate taw a hu kik kul hi.Ref 15:27 1 Cor 9:11
28 Hi nasep ka man zawkciang amate atu a kikhon sumte a bup in, amate tungah ka aap zawkciang Spain ngam ah ka pai tu a, ka pai lam in kong baang tu hi.
29 Kong pai ciangin Christ thupha a kicing taw kong pai tu sia ka he hi.
30 Suapuite awng, ih Topa Jesus Christ hang le, Thaa ii hong piak itna hu in, Pathian tungah kei atu in nasia takin thu nong nget pui natu in kong thuum hi.
31 Judea ngam thu um ngawlte khut sung pan hong kep natu le Jerusalem ah ka nasepna in Pathian ii mihingte atu a kisaang thei ahi natu in thu hong ngetsak tavun.
32 Tua hi a, lungdam in note kungah kong pai tu a, Pathian ii deina ahile, thathak laakna in note kungah kong haw tu hi.
33 Ih thinnopna ii naak ahi, Pathian in note theampo taw hong om tahen. Amen.