10
1 Suapuite awng, ka minamte ngupna a nga natu in ka thinsung theampo taw deisak in Pathian tungah thu ka ngetsak hi!
2 Amate sia Pathian thu sungah a kipia mama ahi hunlam tetti ka pang hi; ahihang amate kipiakna in heakna tatak bulphu ngawl hi.
3 Pathian mai ah mihingte thutang a suasakzia he ngawl a, lampi tuam dang khat sial tu hanciam uh hi. Tua ahikom amate in Pathian ii mihingte thutang a suasakna sungah a ki aap bua uh hi.
4 Banghang ziam cile a umte theampo Pathian mai ah thutang a sua natu in Christ in thukham bosak zo hi.
Ngupna in Mihing Theampo atu
5 Pathian tungah a thutang na sua natu in, Thukham nitna taw kisai in, Moses ii lai at in hi bang ahi hi: “Thukham sawl bangin a ngamta theampo in tua taw nungta tu hi.”Ref 10:5 Thiam 18:5
6 Ahihang upna hang a Pathian mai ah thutang suana taw kisai in laithiangtho in hi bangin ci hi. “Noma le noma vantung ah akua kaato tu ziam?” ci in kidongh heak vun. Tuasia Christ khiaksukna, a cinopna hi.Ref 10:6-8 Thkna 30:12-14
7 “Akua leinuai ah tuaksuk tu ziam?” ci in kidongh heak vun. Tuasia in Christ thina pan a thawsak kikna, a cinopna hi.
8 Hi bangin ci zaw hi: “Pathian hong piak kammal sia na kung nai ah om a, na muk tung le na thinsung ah om hi.” — Tua in upna thu ka hil uh sia ahi hi.
9 “Jesus in Topa hi ci in na kam taw pualaak a, na thinsung panin, Pathian in ama sia thina pan thosak kik hi ci in na um le ngupna na nga tu hi.
10 Banghang ziam cile ih thinsung pan ih up ciangin thutang ih suak a, ih kam taw ih pualaak ciangin hong kingum hi.
11 Laithiangtho in, “A kuama theampo ama a umte in a thin a kiam buatu hi,” ci hi.Ref 10:11 Is 28:16
12 Hi thu in a kuama po huam siat hi. Banghang ziam cile Jew te le Gentile te kilaklaw ah lamdanna a om bua hi. Pathian in mihing theampo ii Topa hi a, ama tungah a ngen theampo atu in a kicing takin thupha pia hi.
13 Laithiangtho ci bangma in Topa tungah huna a ngen theampo kingum tu hi.Ref 10:13 Jol 2:32
14 Ahihang ama a um bua uh le amate in bangbangin huna ngen thei tu ziam? A thupha puak a za bua uh le, amate in bangbangin um thei tu ziam? A thupha a kithangsak buale amate in bangbangin za thei tu ziam?
15 Thuhil tute a kipaisak buale a thupha bangbangin kithangsak thei tu ziam? Laithiangtho ci bangma in, “Lungdamna thupha puak a hong paite peang sia bangza in etlawm ziam?”Ref 10:15 Is 52:7
16 Ahihang amate theampo in Lungdamna Thupha saang thei ngawl uh hi. Isaiah mama in, “Topa awng, ko thupuakte akua in hong um ziam?” ci hi.Ref 10:16 Is 53:1
17 Tua ahikom upna in a thu zaakna pan piang a, a thu zaakna in, Christ ii thuhilna pan piang ahi hi.
18 Tua ahile amate in a thu za ngawl hi tu ziam?, ci in kong dongh hi. Za hi — laithiangtho in hi bangin ci hi:
“Leitung theampo ah
amate ii aw theng hi;
Amate ii kammal
leimong dong theng hi.” Ref 10:18 Ps 19:4
19 Tua ahile: Israel mite in he ngawl ziam? ci in kong dongh kik hi. Moses ama mama in hong zo phit hi: Ref 10:19 Thkna 32:21
“Minam in a kisim ngeingawl mihingte in,
eenna thin hong neisak tu hi.
A mawmaw minam khat zanghin
na thin uh kong uuksak tu hi.”
20 Isaiah in hangsan seseam in
hi bangin ci hi.
“Hong zong ngawlte in
kei hong mu hi;
Hong kan ngawlte tungah
ka kilak hi.”Ref 10:20 Is 65:1
21 Ahihang Israel taw kisai in ama in, “Thu ni ngawlte le hong langpante tungah nitangtum in muakin ka khut ka thaak hi,” ci hi.Ref 10:21 Is 65:2