9
Sheba Kumpinu Khualhawna
(1 Kumpite 10:1-13)
1 Sheba kumpinu in Solomon kumpipa minthanna za a thudokna haksate taw ama ze et tu in Jerusalem ah haw hi. Ama in a lalangte honpui khat le hel namtuite, suangmanphate le khamh tam mama a pua kalaoh te keng hi. Solomon taw a kimu uh ciang ama in a thu ngaisut thei theampo dongh hi.
2 Solomon in tuate zo thei siat hi; ama ii a zo kik tu in thu haksa leih bangma om ngawl hi.
3 Sheba kumpinu in Solomon ii ciimna he a, a sak sa kumpi inn zongh mu hi.
4 Ama in kumpi sabuai tungah a kilui ante, a uliante teenna innte, kumpi inn sung a naseamte omzia le a kibang a puansilhte, poai vawt ni in ama a cing a naseamte ii puansilhte le Biakinnpi ah a piak biakpiaknate mu hi. Tuate ama in lamdang sa in ingh liang hi.
5 Ama in kumpipa tungah, “Ka ngam panin na ciimna le na thu ka zaakte maan hi!
6 Keima mama hong pai in ka mu matengin ngual ii hong sonte ka um bua hi. Na ciimna ii a lang zongh a za ngawl khi hi. Ngual hong sonna sangin ciimzaw lai ni hi.
7 Nangma taw omkhawm tawntungin na hong sepsak mite, ciim kam na pauna a zate sia bang zata in hampha ziam!
8 Topa na Pathian pok in! Ama min suangin a uk kumpipa hong suasak ciang nang tungah ama bangza in lungkim ziam ci in hong lak hi. Ama in a Israel mite it a, a tawntungin a kep nopna hu in, thukham le thutang khenna na kipsak thei natu in nangma sia amate ii kumpi hong suaksak zo hi,” ci hi.
9 Ama in Solomon kumpipa tungah a ken letsongte: khamh kilogramme 4,000 vaal le hel namtuite le suangmanpha tam mama pia hi. Sheba kumpinu ii Solomon kumpipa tungah a piak hel namtuite sangin a phazaw dang om ngeingawl hi. Ref 9:1-9 Mt 12:42; Lk 11:31
10 Ophir pan khamh hong paipui Hiram kumpipa le Solomon kumpipa ii mihingte in juniper thing le suangmanpha te zongh paipui uh hi.
11 Solomon in tua thingte sia Biakinnpi le ama kumpi inn keallei vawtna, music thiamte atu tengtongh le liamlo te vawtna in zangh hi. Tua masia in Judah ngam sungah tuabang te kimu ngeingawl hi.
12 Solomon kumpipa in Sheba kumpinu ii a nget theampo pia hi. Hite sia Sheba kumpinu ii ama a piak letsongte a thukna in a piakte ahi hi. Tua zawkciang ama le a lalangte Sheba ngam ah heak kik uh hi.
Solomon Kumpipa ii Nei le Lam
(1 Kumpite 10:14-25)
13 Solomon kumpipa in kum simin khamh kilogramme 23,000 dektak nga a,
14 sumvawtte le sumbukte ii phiangshia a piakte ban ah a nga ahi hi. Arabia kumpite le Israel ngamkhen ukte zongh in ngunn le khamh puak uh hi.
15 Solomon in ngaldalna lumlian 200 vawtin lum khat ciangin a kiseak khamh kilogramme 7 bang taw tuam hi,
16 tuaciang ngaldalna lum a no zaw 300 vawt a, khat ciangin a kiseak khamh kilogramme 3 bang taw tuam hi. Ama in tuate a vekpi in Lebanon Thingtaam Khaanpui sungah koi hi.
17 Kumpipa in kumpi tokhum lian mama khat zongh vawt hi. Tua tokhum khen khat sia saiha taw kituam a, a dang teng sia khamh ciitak taw kituam hi.
18 Tua tokhum tungah a kaa natu in keallei dawl luk pha khat kidaw a, khamh taw a kituam dinpha khat kibel in om hi. To khum lang le lang ah khut ngakna om a, tawpi lim khat veve dingsak hi.
19 Keallei dawl luk te khat sim ii lang le lang ah tawpi lim 12 om hi. Hi bang kumpi tokhum sia kumpi ngam mundang peuma ah om ngeingawl hi.
20 Solomon kumpipa ii zak haite theampo khamh taw kivawt a, Lebanon Thingtaam Khaanpui sungah a kikoi vanhzak kuang le keau te theampo sia khamh ciitak veu hi. Solomon hun lai in ngunn sia a man nei in kingaisun ngawl hi.
21 Solomon in Hiram kumpipa ii teambawte taw a paikhawm tuipi teambaw honkhat nei hi. Kum thum simin ama teambawte hong heak kik ciang khamh, ngunn, saiha, mei nei ngawl zawngpuite le zawngte hong pua uh hi.
22 Solomon kumpipa sia leitung kumpi dangte sangin ciimzaw a hauzaw hi.
23 Pathian ii a piak ciimna thu he nuamin tua kumpite theampo in ama thu dongh hi.
24 Amate khat simin Solomon atu letsongte — khamh, ngunn, puantualte, ngalhiamte, hel namtuite, siphute le laate puak hi. Kum khat zawk kum khat tuabangin kizom suak hi.
25 Solomon kumpipa in a siphu ngalleang le a siphute koi natu in siphu khawk 4,000 le siphu ngalkap 12,000 zongh nei hi. Tuate pawlkhat sia Jerusalem ah keam in a taanglai teng khuapi dangte ah koi hi. Ref 9:25 1 Kum 4:26; 9:26; Pian 15:18; 1 Kum 4:21
26 Ama sia Euphrates Ngun panin Philistia le Egypt ngamngi dong a om kumpi theampo a ukpipa ahi hi.
27 Ama kumpi in a maan lai in Jerusalem ah ngunn sia suang bangin tam a cedar thingkung sia Judah mualpeangte ah a om sycomore thingkung thawthongte bangin tam hi.
28 Solomon in siphute Musri le ngamdang theampo panin lei hi. Ref 9:28 Thkna. 17:16
Solomon ii Kumpi Maanna Tomsonna
(1 Kumpite 11:41-43)
29 Solomon ii taanghthu dang teng sia a kipat pan a tawpna dong Kamsaang Nathan Taanghthu sung, Shiloh khua mi Ahijah ii Kamsaanna sung le Kamsaang Iddo ii Mukholnate sungah kiciamtee a, tua te Israel kumpipa Jeroboam ii kumpi maanna thu taw zongh kizom hi.
30 Solomon in Israel ngam buppi sia Jerusalem khua panin kum sawmli sung uk hi.
31 Ama thi a, David Khuapi sungah kiphumin a tapa Rehoboam in a kumpi za laih hi.