34
Judah Kumpipa Josiah
(2 Kumpite 22:1-2)
1 Josiah in kum liat a phak ciang Judah kumpi suak a, Jerusalem panin kum 31 sung uk hi.Ref 34:1 Jer 3:6
2 Ama in Topa diksak nate vawt a; a taanghpupi David ngamtatna zui in Pathian ii thukham theampo pha takin zui hi.
Josiah in Doai Biakna Do
3 Josiah a kumpi sua zawk kum liat a phak kumin khangmoi mama lai ahihang ama in a taanghpupi David kumpipa ii Pathian a biak kipan hi. Kum li zawkciang ama in doai sepna munte, Asherah numeipathian limte le a dang milimte theampo a suksiat kipan hi.
4 Ama ii thupiak bangin a mite in Baal biakna biaknataute sutham in a kungah ngimnamtui halna biaknataute pheltham hi. Amate in Asherah milimte le a dang milimte theampo suuvui in, a vui teng sia tua milimte sangaw biakpiakna a pia mite ii thaan tungah the uh hi. Ref 34:6 2 Kum 21:3; 2 Khang 33:3
5 Ama in doai seam thiampite ii ngu teng amate ii biaknataute tungah hal hi. Hi bang teng taw Josiah in Judah le Jerusalem sia a zeksa ngeina om bangin thiansua kik hi. Ref 34:5 1 Kum 13:2
6 Ama in khuapite sung le Manasseh ngam, Ephraim ngam le Simeon ngamsung a zawna mun theampo, tuaciang saksang ah Naphtali dongin tuabang ma in vawt siat hi.
7 Saksang kumpi ngam theampo ah ama in biaknataute le Asherah limte sutham in milimte suuvui a, ngimnamtui halna biaknataute theampo sem tham hi. Tua zawkciang ama Jerusalem ah heak kik hi.
Thukham Laibu Kimu
(2 Kumpite 22:3-20)
8 Josiah kumpipa in a kumpi maan zawk kum sawm le kum liat kumin, a ngam le Biakinnpi sia doai biakna a bosakna taw a thiansua zawkciang ama in Topa Pathian Biakinnpi puua kik tu in pasal thum paisak a: Azaliah tapa Shaphan, Jerusalem a uk mangpa Maaseiah le ulian khat ahi Joahaz ii tapa Joah ahi hi.
9 Levi biakinn cingte ii Biakinnpi sung pan a khon sum teng Thiampi Lianbel Hilkiah tungah ki aap hi. Tua sumte sia Ephraim mi, Manasseh mi le a taanglai Saksang kumpingam mite, Judah mi, Benjamin mi, Jerusalem mite tung pan a kikhonte hi.
10 Tua sum teng biakinn puua kikna a ukte thum tungah ki aap a, amate in
11 Judah kumpite ii a muatsak innte puua natu a kizangh suang le thing lei natu in lettamate le inn sate a piak tu ahi hi.
12 Tua na a seamte thumaan tatak hi. Amate sia Levi mite li ahi Merari bee le phung pan Jahath le Obadiah, Kohath bee le phung pan Zechariah le Meshullam te in uk uh hi. Tua Levi te sia a vekpi in music thiam uh hi.
13 A dang Levi te in vanh nawn na le nasep dang tuatuam a seamte uk in, a dangte sia thu tepteena a keamte ahibuale a cingte ahi uh hi.
14 Vanh kholna inndoi sung pan sum a laak laitakin Hilkiah in Moses tungah Pathian piak Thukham, Topa Thukham laibu sia mu hi.
15 Ama in Shaphan munah, “Hi Biakinnpi sungah Thukham laibu mu khi hi,” ci hi. Ama in tua laibu Shaphan pia a,
16 Shaphan in kumpipa kungah paipui hi. Ama in, “Nong sawl theampo ka seam siat zo uh hi.
17 Biakinnpi sungah a kep sum teng ka la zo uh hi, tuasia naseamte le a ukte tungah ka pia zo uh hi,” ci in son hi.
18 Tuaciang ama in, “Hi sungah Hilkiah ii hong piak laibu khat om hi,” ci lai hi. Tuaciang ama in tuasia kumpipa tungah nging vazak in sim hi.
19 Kumpipa in laibu a kisim na bang a zaak ciang, thin nop ngawlna taw a puansilh lai eaukeak a,
20 tuaciang Hilkiah, Shaphan tapa Ahikam, Micaiah tapa Abdon, zum thuzeakpipa Shaphan le kumpipa cing pa Asaiah te tungah hi bang thupia hi:
21 “Pai tavun a, kei taang le Israel le Judah ah a om lai mite taangin Topa ii thu dongh tavun. Hi laibu ii hilnate hong kan tavun. Ei tungah Topa thin uuk hi, banghang ziam cile ih taanghpupite in Topa kammal zui ngawl a, hi laibu ii sep hamtang tu a cite seam ngawl hi,” ci hi.
22 Kumpipa thupiak bangin Jerusalem ii a khen khuathak mun khat sungah a teang Huldah a kici numei kamsaang khat munah thu dongh tu in, Hilkiah, Ahikam, Achbor, Shaphan le Asaiah te pai uh hi. Tua nu ii pasal sia, Tikvah ii tapa, Harhas ii tupa Shallum hi a, ama in biakinn puantualte a keam pa hi. Amate in thupiang teng ama munah son uh hi,
23 tuaciang ama in kumpipa kungah amate pai kikin sawl a,
24 A nuai a Topa thupiak teng puak hi: “Keima in Jerusalem le a mite theampo kumpipa tungah a kisim laibu sia sungah a ki at haamsiatna te taw daan ka pia tu hi.
25 Amate in kei hong nial a, pathian dangte tungah sangaw biakpiaknate pia ahikom a ngamtatna theampo panin ka thin uukna piang hi. Ka thin uukna sia Jerusalem tungah tu hi, tuaciang tua sia veng ngawl tu hi.
26 Kumpipa mama atu in hi bangin kei, Israel ii Topa Pathian in ci khi hi: Nangma in laibu sungah a ki at teng nadon ni hi,
27 tuaciang Jerusalem le a mite daan piak tu ka tawnna na zaak ciang kiniamkhiakna le kisii kikna taw ka mai ah na puansilh eaukeak in kap ni hi. Na thungetna hong za zo khi hi.
28 Tuaciang Jerusalem ka piak tu daan sia na thi zawk ciang mateng in tungsak ngawl tu khi hi. Thinnuam in kong thisak tu hi,” ci hi.
Tua pasalte hi thupiak teng taw Josiah kumpipa kungah heak kik uh hi.
Josiah in Topa Thu nit natu Thuciamna Vawt
(2 Kumpite 23:1-20)
29 Kumpipa Josiah in Judah le Jerusalem lampui teng sam a,
30 tuaciang amate a pai uh ciangin, thiampite le Levi te in tonpui in, a taanglai mi theampo taw a hau a zawng kibangin Biakinnpi ah paikhawm tek hi. Kumpipa in amate ii mai ah Biakinnpi sungah a kimu thuciamna laibu bup a ngingin sim hi.
31 Ama in kumpi khuam sia kungah dingin Topa thu a ni tu, a thukham te le a thupiakte sia a thin theampo le a ngaisutna theampo taw a keamcing tu, tuaciang thuciamna taw a kithua tua laibu sungah hong tangkal theampo a seam a vawt tu in ama taw thuciamna khat vawt uh hi.
32 Ama in tua thuciamna a zui kik natu in Benjamin mite le Jerusalem ah a om dang teng theampo kiciamsak hi. Tuabangin Jerusalem mite in a taanghpupite ii Pathian taw a vawt sa thuciamna ii dei nate zui tek hi.
33 Josiah kumpipa in Israel te neisa a ngam sungah a om a kiihuai milim theampo susia hi, tuaciang ama nuntak lai teng mipite in amate taanghpupite ii Pathian, Topa na seamsak hi.