29
Judah Kumpipa Hezekiah
(2 Kumpite 18:1-3)
1 Hezekiah sia kum 25 a phak kumin kumpi suak a, Jerusalem khua pan kum 29 sung uk hi. A nu sia Zechariah ii tanu Abijah ahi hi.
2 Ama in a taanghpupi David kumpipa ngamtatna zui in, Topa diksak nate seam hi.
Biakinnpi a Thiansuana
3 Hezekiah ii kumpi a sua kum a tha khat tha in ama in Biakinnpi kongpite hong kik in puuasak kik hi.
4 Ama in Biakinnpi nisuana sang leitual ah thiampite le Levi te pawlkhat khawmtua in,
5 thu son hi. Ama in “Levi te awng noma le noma a thiang tak ki aap vun a, na taanghpupite ii Pathian, Topa Biakinnpi thiangthosak vun. Biakinnpi a ninsak te theampo Biakinnpi pan heam vun.
6 Ih taanghpupite in Topa ih Pathian tungah thumaan ngawl a, Topa diksak ngawlte vawt uh hi. Amate in Topa nusia in ama teenna mun nungngat uh hi.
7 Amate in Biakinnpi kongkhate khakbil a, meivakte mitsak in, Israel te ii Pathian ii Biakinnpi sungah ngimnamtui hal nawn ngawlin; meihai biakpiaknate vawt nawn ngawl uh hi.
8 Tua hu in Judah le Jerusalem tungah Topa thin uuk mama a, amate tungah a vawt thute in a kuama po ingh in lausak hi. Tua thu na he tek uh hi.
9 Ih pate ngal sungah kithat in, ih zite le ih tate sia thongtaak tu in kipaipui uh hi.
10 “Hi bang teng ahikom ei tungah Topa Israel te ii Pathian sia a thin a uuk nawn ngawl natu in ama taw tu in thuciamna khat vawt tu in ka khensat zo hi.
11 Ka tapate awng, hun bothongsak heak vun. Note sia ama atu ngimnamtui hal tu le ama biakna ah mipite lampui tu in, Topa tealsa mite na hi uh hi.”
12-14 A nuai a Levi te sia tua munah om hi:
Kohath bee le phung pan Amasai ii tapa Mahath le Azariah ii tapa Joel
Merari bee le phung pan Abdi ii tapa Kish le Jehallelel ii tapa Azariah
Gershon bee le phung pan Zimnah ii tapa Joah le Joah ii tapa Eden
Elizaphan bee le phung pan Shimri le Jeuel
Asaph bee le phung pan Zechariah le Mattaniah
Heman bee le phung pan Jehuel le Shimei
Jeduthun bee le phung pan Shemaiah le Uzziel
15 Hi mite in Levi mipuite khawmtua in amate le amate a zeksa om bang kithiangsak siat uh hi. Tua zawkciang kumpipa thupiak bangin Topa Thukham zui in a zeksa om bangin Biakinnpi thiansua tu kipan uh hi.
16 Biakinnpi thiansua tu in a sungah thiampite tumin a zeksa taw kisai in a thiangtho ngawl vanh theampo biakinn leitual ah pusua uh hi. Tua mun panin Levi te in tua vanhte la a, khuapi pua sang Kidron Kuam ah tua siat uh hi.
17 Amate nasep sia tha masabel, a ni masabel ni in kipan a, ni liat ni in, biakinn sung tumna inndoi zongh kihel in zo siat hi. Tua zawkciang amate in a dang ni liat sung ma seam a, tua tha ni sawm le ni luk ni in biakna vawt natu in Biakinnpi puuakhol uh hi.
Biakinn Ki aap kik
18 Levi te in Hezekiah kumpipa tungah a nuai a bangin thu zaaksakna nei hi: “Biakinnpi buppi, meihal biakpiak natu in biaknatau anluum thiangtho koina sabuai le vanhzakte theampo a zeksa om bangin ka thiansua siat zo uh hi.
19 Ahaz kumpipa ii Topa tungah a thumaan ngawl hun sungin a laak vanhzakte theampo zongh paipui kikin, Pathian tungah ka aap kik zo uh hi. Tuate theampo Topa ii biaknatau mai ah om hi,” ci hi.
20 Hezekiah kumpipa in haisaang ngawlin khua sung lampuite kaikhawm a, Biakinnpi ah paikhawm tek hi.
21 Amate in kumpi bangkua le Judah mite mawphel biakpiak natu le Biakinnpi thiansua natu in khuital sali, tuu sali, tuuno sali le keal sali paipui uh hi. Kumpipa in tua ngannote biaknatau tungah sangaw biakpiakna in piak tu in Aaron suan le paal thiampite sawl hi.
22 Thiampite in a masabel in khuitalte ngo a, tua zawkciang tuute le tuunote ngoin khat sim ii chi veu biaknatau tungah the uh hi.
23 A khakbelin amate in kealte, kumpipa le biakna a vawt dangte kungah paipui in tua kealte tungah a khut uh nga tek hi.
24 Tua zawkciang Israel mite theampo atu in meihal biakpiakna le mawphel biakpiakna a vawt tu in kumpipa in thupia ahikom thiampite in kealte ngo a, a chi sia mipite theampo mawmai natu in biaknatau tungah sung uh hi.
25 Topa in David kumpipa atu in a kamsaangpa Gad le kamsaang Nathan tungtawnin a piak hilnate kumpipa in zui hi; ama in Levi te Biakinnpi sungah tengtongh le daalkopsai te,
26 David kumpipa ii zaksa tumtheite taw panmun lasak hi. Thiampite zongh lemle taw tualai ah ding hi.
27 Meihal biakpiaknate piak natu in Hezekiah in thupia a; biakpiakna a kipat ciang mipite in Topa pokna lasa in music thiam te in lemle le tumthei dang theampo tum uh hi.
28 Tua munah a om mi theampo in biakna vawt khawmin lasakna le a dang tumtheite zongh sangaw biakpiaknate a kihal siat dong kizom suak hi.
29 Tuasia ciang Hezekiah kumpipa le mipite theampo khupdin in Pathian bia uh hi.
30 Kumpipa le ngam lampuite in David le kamsaang Asaph ii a phua pokna late Topa tungah a sak natu in Levi te sawl uh hi. A sawl bangma in a kuama po in lungdamna lianpi taw khupdin in lasa a, Pathian bia uh hi.
31 Hezekiah in mipite tungah, “Tu in note a zeksa om bangin thiang zo na hi uh ciang Topa tungah lungdamko biakpiakna in sangaw biakpiakna hong paipui tavun,” ci hi. Amate zongh thuni in vawt a, pawlkhatte in meihal biakpiak natu in amate thu in nganno ngaw tute paipui uh hi.
32 Amate in Topa tungah meihal biakpiak natu in khuital 70, tuu 100 le tuuno 200 paipui uh hi;
33 amate in mipite neak tu in sangaw biakpiakna in khuital 600 le tuu 3,000 zongh paipui uh hi.
34 Nganno hiza a ngo tu in thiampite kicing zo ngawl ahikom Levi te in nasep a man dong hu uh hi. Tuasia hunin thiampite a tamzaw a zeksa om bangin kithiangsak zo hi. A zeksa kithiansakna thu ah thiampite sangin Levi te thumaan zaw uh hi.
35 Pum bup hal sangaw biakpiakna ah a piak banah mipite neak tu in sangaw biakpiakna pan ngan ii thaute a hal tu le meihal biakpiakna taw a kipia sapittui a sung tu sia thiampite ii nasep ahi hi.
Tuabangin Biakinnpi ah biakna vawt kipan kik hi.
36 Pathian huna taw hi nasep theampo manlang takin zo ahikom Hezekiah kumpipa le mipite lungdam hi.