21
1 Jehoshaphat thi a, David Khuapi sung kumpi thaan ah kiphumin a tapa Jehoram in a kumpi za laih hi.
Judah Kumpipa Jehoram
(2 Kumpite 8:17-24)
2 Judah kumpipa Jehoshaphat ii tapa Jehoram in suapui pasal luk nei a: Azariah, Jehiel, Zechariah, Azariahu, Michael le Shephatiah ahi hi.
3 A pa in amate khamh, ngunn le a neisa na manpha tam ma pia a, Judah ngamsung kulh taw a ki uum khuapite khat tek uksak hi. Ahihang Jehoram sia a lianbel ahikom Jehoshaphat in ama za laihsak hi.
4 Jehoram in a kumpi ngamukna a kip ciang, a suapui pasalte teng le Israel uliante pawlkhat zongh thatsak hi.
5 Jehoram sia kum 32 a phak kumin kumpi suak a, Jerusalem khua pan kum liat sung uk hi.
6 Ahab ii tanute khat a teenpui hu in ama in Ahab kumpipa le Israel kumpi dangte ii seksol ngamtatna zui hi. Ama in Topa tungah mawna khialna vawt hi,
7 ahihang Topa in David taw thuciamna khat vawt zo a, David suan le paalte in ngam uk tawntung tu hi ci in kamciam ahikom Topa in David ii kumpi khangngui susia nuam ngawl hi. Ref 21:7 1 Kum 11:36
8 Jehoram ii kumpi maan sungin Edom ngam in Judah ngam leedo in, a suakta kumpi ngam khat suak hi. Ref 21:8 Pian 27:40
9 Tuabangin Jehoram le a ngalkap bute in siphu ngalleang taw kuanin Edom ngamsung tumin sim uh hi. Tua munah Edom te ngalkaphonpi in amate kiim uum a, ahihang zanin amate pusuak thei in suakta uh hi.
10 Tua hun pan kipan Edom sia Judah khut sung pan suatakna nga hi. Jehoram in a taanghpupite ii Pathian, Topa a nusiat hu in hi hun sung mama in Libnah khuapi zongh in leedo hi.
11 Ama in Judah ngam mualsaangte tungah doai sepna munte ngawngawn vawtin, Judah le Jerusalem mite Topa langpanin mawna sung then hi.
12 Kamsaangpa Elijah in Jehoram laithak a, a lai sungah: “Na pa Jehoshaphat kumpipa ahibuale na pu Asa kumpite ii lamlakna bangin na zui ngawl hu in na taanghpupi David ii Pathian, Topa in nang hong puavawk hi.
13 Israel kumpite lamlakna zuizaw in Ahab le ama za a laih te ii Israel te sia thumaanna panin a pialpui bangma Judah le Jerusalem mite Pathian tungah thumaan ngawl tu in lam na pui hi. Nangma sangin mi phazaw na suapuite ngawngawn na suamlum hi.
14 Tua ahikom Topa in na mite, na tate le na zite nasia takin daan pia tu a, na neisate susia tu hi.
15 Nangma mama in ngilzang natna khat na nga tu a, ni khat sangin ni khat nasia vaial tu hi,” ci in at hi.
16 Philistine te le Arab te pawlkhat sia Ethiopia te pawlkhat teenna tuipi dung teng ah teang uh hi. Tua mite sia Jehoram a sim tu in Topa in thawn hi.
17 Amate in Judah ngam simin kumpipa inn phuul a, a tapa nobel Ahaziah simngawl a zite le a tapate theampo paipui in thongtaaksak hi.
18 Hiteng theampo a pian zawkciang Topa in kumpipa sia a bot mama ngilsung natna khat veisak hi.
19 A natna nasia vaial in kum nii dektak zawkciang thuak zo ngawlin thi hi. A khutnuai ngammite ii a taanghpupite atu a vawtsak ngei bangin thina huvau khuangaina lakna in meimang sep ngawl uh hi.
20 Jehoram kum 32 a phak ciang kumpi suak a, Jerusalem khua pan kum liat sung uk hi. A thi ciang kuama khuangai ngawl hi. Amate in ama sia David Khuapi sungah phum ahihang kumpi thaan ah phum ngawl uh hi.