KHANG TANGTHU NIINA
(The Second Book of Chronicles)
1
Solomon Kumpipa in Ciimna A nga natu Thungen
( 1 Kumpite 3:1-15 )
1 David kumpipa ii tapa Solomon in Israel kumpi ngam a kho takin uk a, Topa a Pathian in ama thupha pia in a vaang liansak mama hi.
2 Solomon kumpipa in a ngalkap tulkhat a uk le zakhat a uk ngalkapmangte theampo, kumpi naseam ulian theampo, innkuan lutangte theampo le a taanglai mite tungah,
3 Gibeon khua biakna munah ama taw a pai khop natu thupia hi. Amate tua munah a pai uh hi, banghang ziam cile tua mun sia Topa naseampa Moses ii duisung ngampa ah a vawt Topa ompuina Puanbuk omna mun hi.
4 Thuciamna Thingkuang sia ahile David kumpipa ii Kiriath Jearim pan a laak lai in, Jerusalem khua ah a sak puanbuk khat sungah kikeam hi. Ref 1:4 2 Sa 6:1-17; 1 Khang 13:5-14; 15:25—16:1
5 Hur ii tupa, Uri ii tapa Bezalel ii taau taw a vawt biaknatau sia zongh Gibeon khua Topa ompuina Puanbuk mai ah om hi. Tua munah Solomon kumpipa le mipite theampo in Topa bia uh hi. Ref 1:5 Pu 38:1-7
6 Puanbuk mai ah tua biaknatau tungah kumpipa in sangaw biakpiaknate taw Topa bia a; nganno tulkhat ngosakin tuasia tungah a pum bup in haltum hi.
7 Tua zanin Solomon kungah Pathian kilangh a, “Bang hong pia leng na uuk ziam?” ci in dongh hi.
8 Solomon in, “Ka pa David tungah itna lian na lak tawntung a, tuaciang tu in a kumpi za nong laihsak zo hi.
9 Topa Pathian awng, ka pa tungah na kamciamte taangtungsak in. A kisim zo ngawl za dongin a tam mama mite tungah kumpi nong suaksak hi, Ref 1:9 Pian 13:16; 28:14
10 tua ahikom amate ka uk natu in ka taangsap ciimna le heakna hong pia ta'n. Tua hi buathong le, hi za a tam na mipite koibang uk zo tu khi ziam?” ci in zo hi.
11 Topa in Solomon tungah, “A maan sia na teal zo hi. Ka mite uk tu in nangma kumpi in kong teal zo a, tua ka mite na uk thei natu in nei le lamh, sum le vanh manpha, minthanna, na ngalte thi natu, nangma khansau natu nong nget taangin ciimna le heakna nong ngen zaw hi.
12 Keima in ciimna le heakna nang kong pia tu hi. Tua bek dom ngawlin kumpi khat pawpo zongh ii a nei ngeingawl ahibuale a nei kik ngeingawl tu nei le lamh, sum le vanh manpha, le minthanna a tamzaw kong pia tu hi,” ci in zo kik hi.
Solomon Kumpipa ii Vaangletna le Hauna
(1 Kumpite 10:26-29)
13 Tua ahiciang Solomon in Topa ompuina Puanbuk omna ahi Gibeon khua biakna mun nusia in Jerusalem ah heak kik hi. Tua mun panin ama in Israel ngam uk hi.
14 Ama in ngalsim natu in siphu ngalleang 1,400, siphu ngalkap 12,000 khawmtua hi. Tuate pawlkhat sia Jerusalem ah keam in, pawlkhat sia khuapi dang tuatuamte ah koi hi. Ref 1:14 1 Kum 4:26
15 Ama kumpi maan sungin Jerusalem ah ngunn le khamh sia suang bangma in tam a, Judah ngam ah cedar thingkung sia sycomore thingkung thawthong za in tam hi.
16 Kumpipa atu taangmite in Musri le Cilicia pan ngamdang a puak siphu le Ref 1:16 Thkna 17:16
17 Egypt pan ngamdang ah siphu ngalleangte puakna vai zeak uh hi. Amate in Hit te le Syria kumpite tungah siphute le siphu ngalleangte zuakin, siphu ngalleang khat ciang ngunn dangkatang 600 le siphu khat ciang ngunn dangkatang 150 taw veu in zuak uh hi.