6
Thiampi Lianbelte ii Innkuan Khangsimna
1 Levi in tapa thum nei a: Gershon, Kohath, le Merari te ahi hi.
2 Kohath in tapa li nei a: Amram, Izhar, Hebron, le Uzziel te ahi hi.
3 Amram in tapa nii, Aaron, Moses, le tanu khat, Miriam nei hi.
Aaron in tapa li nei a: Nadab, Abihu, Eleazar, le Ithamar te ahi hi.
4 Eleazar ii suan le paalte khang khat pan khang khat a nuai a bang hi a: Phinehas, Abishua,
5 Bukki, Uzzi,
6 Zerahiah, Meraioth,
7 Amariah, Ahitub,
8 Zadok, Ahimaaz,
9 Azariah, Johanan,
10 Azariah Jerusalem ah Solomon kumpipa ii sak Biakinnpi sungah naseam pa
11 Amariah, Ahitub,
12 Zadok, Shallum,
13 Hilkiah, Azariah,
14 Seraiah, Jehozadak te ahi hi.
15 Nebuchadnezzar kumpipa in Jehozadak sia Topa ii saltaang tu in a puak Judah le Jerusalem pan midangte taw a ngam pan not khawm hi.
Levi Suan le Paal Dangte
16 Levi in tapa thum nei a: Gershon, Kohath, le Merari te ahi hi. Ref 6:16-19 Pu 6:16-19
17 Amate zongh in tapa nei tek uh hi. Gershon sia Libni le Shimei ii pa hi;
18 Kohath sia Amram, Izhar, Hebron, le Uzziel ii pa hi;
19 Merari sia Mahli le Mushi ii pa ahi hi.
20 Hite sia Gershon ii khang khat pan khang khat a suan a paalte hi a: Libni, Jahath, Zimmah,
21 Joah, Iddo, Zerah, Jeatherai te ahi hi.
22 Hite sia Kohath ii khang khat pan khang khat a suan a paalte hi a: Amminadab, Korah, Assir,
23 Elkanah, Ebiasaph, Assir,
24 Tahath, Uriel, Uzziah, Shaul te ahi hi.
25 Elkanah in tapa nii nei a, Amasai le Ahimoth ahi uh hi.
26 Hite sia Ahimoth ii khang khat pan khang khat a suan a paalte hi a: Elkanah, Zophai, Nahath,
27 Eliab, Jeroham, Elkanah te ahi hi.
28 Samuel in tapa nii nei a: a upa sia Joel hi in a naupa sia Abijah ahi hi.
29 Hite sia Merari ii khang khat pan khang khat a suan a paalte hi a: Mahli, Libni, Shimei, Uzzah,
30 Shimea, Haggiah, Asaiah te ahi hi.
Biakinn Music thiamte
31 Hi mite sia Jerusalem ah Thuciamna Thingkuang a kikhiin zawkciang Jerusalem biakna munah music tumtheite a uk tu in David kumpipa ii a koi pasalte ahi uh hi.
32 Solomon kumpipa ii Biakinnpi a sak ma hunsung in Topa ompuina Puanbuk sungah amate in a huhun in kilaih a, vaipuak la uh hi.
33 Hi zum a len amate ii innkuan khangsimna sia a nuai a bang hi a:
Kohath bee le phung sung panin: Joel ii tapa Heman sia lasa pawl khatna lampui pa ahi hi. Heman ii innkuan khang ngui sia a nuai a bangin Jacob dong kilee sim a: Heman, Joel, Samuel,
34 Elkanah, Jeroham, Eliel, Toah,
35 Zuph, Elkanah, Mahath, Amasai,
36 Elkanah, Joel, Azariah, Zephaniah,
37 Tahath, Assir, Ebiasaph, Korah
38 Izhar, Kohath, Levi, Jacob te ahi hi.
39 Asaph sia lasa pawl niina lampui pa ahi hi. Ama innkuan khang ngui sia a nuai a bangin Levi dong kilee sim a: Asaph, Berechiah, Shimea,
40 Michael, Baaseiah, Malchijah,
41 Ethni, Zerah, Adaiah,
42 Ethan, Zimmah, Shimei,
43 Jahath, Gershon, Levi te ahi hi.
44 Merari bee le phung sung pan Ethan in lasa pawl thumna lampui pa ahi hi. Ama innkuan khang ngui sia a nuai a bangin Levi dong kilee sim a: Ethan, Kishi, Abdi, Malluch,
45 Hashabiah, Amaziah, Hilkiah,
46 Amzi, Bani, Shemer,
47 Mahli, Mushi, Merari, Levi te ahi hi.
48 Amate ii a mipui Levi mite sia biakna munah nasep dangte theampo a kiseamsakte ahi uh hi.
Aaron ii Suan le paalte
49 Aaron le a suan a paalte in ngimnamtui biakpiaknate pia in biaknatau tungah a kihal sangaw biakpiaknate pia uh hi. Thiangthobel Mun ah biakna theampo atu le Pathian ii Israel te mawna khialna a maisak natu in sangaw biakpiaknate atu sia amate nasep hi. Amate in hi nasep teng sia Pathian naseampa Moses ii thupiak nate bangin seam uh hi.
50 Aaron ii suan le paalte khang ngui sia: Eleazer, Phinehas, Abishua,
51 Bukki, Uzzi, Zerahiah,
52 Meraioth, Amariah, Ahitub,
53 Zadok, Ahimaaz te ahi hi.
Levi te Teenna Mun
54 Hi ngam sia Kohath ii bee le phung, Aaron ii suan le paalte tungah a kipia ngam hi. Amate in Levi te tungah hawmtel a kipia masabel leitang sia nga uh hi.
55 Judah ngamsung Hebron le a kiim a om nganthana munte hi sungah kihel hi.
56 Ahitazong khuapi neisa lote le khuanote sia Jephunneh ii tapa Caleb pia uh hi.
57-59 A nuai a khua teng Aaron suan le paalte kipia a: bukna khuapi khat ahi Hebron, Jattir le Libnah, Eshtemoa, Hilen, Debir, Ashan, le Beth Shemesh khuate hi a, tuate nganthanate zongh taw ahi hi.
60 Benjamin ngam sungah amate atu in a nuai a khuate, a nganthana munte taw kipia khawm a: Geba, Alemeth, le Anathoth te ahi hi. Amate innkuan teng theampo ten natu in a vekpi in khua sawm le khua thum pha hi.
61 Manasseh nitumna ngam sungah a om khua sawm sia Kohath ii bee le phung a taanglaite tungah innkuan zui in lai meetang sawksak a kipia hi.
62 Gershon bee le phungte tungah innkuan zui in Issachar, Asher, Naphtali le Bashan ngam ah Manasseh nisuana ngamte sungah a om khua sawm le khua thum kipia hi.
63 Tuabang ma in Merari bee le phungte tungah a innkuan zui in Reuben, Gad, le Zebulun ngam te sungah a om khua sawm le khua nii kipia hi.
64 Hi bangin Israel mite in Levi te tungah a ten natu in khuate le a kiim ah a om nganthana munte taw pia khawm uh hi.
65 A tungah a kison Judah, Simeon le Benjamin ngam te sungah a om khuate zongh lai meetang sawkin kihawmsak hi.
66 Kohath bee le phung innkuan pawlkhatte tungah Ephraim ngam ah a om khuate le nganthana munte kipia a:
67 Ephraim mualtung a om bukna khuapi ahi Shechem, Gezer,
68 Jokmeam, Beth Horon,
69 Aijalon, le Gath Rimmon te ahi hi.
70 Amate sia Manasseh Nitumna ngam sungah Aner le Bileam khuate le a kiim a om nganthana munte kipia hi.
71 Gershon bee le phung innkuante tungah a nuai a khuate le a kiim a om nganthana munte kipia a:
Manasseh Nisuana ngamsung pan: Bashan ah Golan le Ashtaroth khua ahi hi.
72 Issachar ngam sungah: Kedesh, Daberath,
73 Ramoth le Anem khua ahi hi.
74 Asher ngam sungah: Mashal, Abdon,
75 Hukok, le Rehob khua ahi hi.
76 Naphtali ngam sungah: Galilee pan Kedesh, Hammon, le Kiriathaim khua ahi hi.
77 A taanglai Merari bee le phung innkuante tungah a nuai a khuate le a kiim a om nganthana munte kipia a:
Zebulun ngam sungah: Rimono le Tabor khua ahi hi.
78 Reuben ngamsung pan, Jericho ngalkhat Jordan ngun nisuana sang ah: Jahzah mualzaangtam tungah a om Bezer,
79 Kedemoth, le Mephaath ahi hi.
80 Gad ngamsung pan: Gilead ah Ramoth, Mahanaim,
81 Heshbon le Jazer ahi hi.