28
Biakinnpi atu David ii Hilnate
1 David kumpipa in Israel ngamsung ulian theampo Jerusalem ah a kikhop natu in thupia hi. Tua ahikom a nam sim ii uliante, kumpi ngamsung nasep uk uliante, bee le phung lampuite, kumpipa le a tapate ii neisa vanhte le ngannote a cing a keamte theampo — a tatakin kumpi inn ah uliante, ngalkap lampuite le mihing thupi theampo — Jerusalem ah kikhawm uh hi.
2 David in amate mai ah ding a, amate tungah, “Ka ngammite awng hong ngai tavun. Topa ih Pathian peang ngakna Thuciamna Thingkuang koi natu in a om tawntung tu inn kip khat sa nuam khi hi. Pathian patoaina in biakinn khat sa tu ka kinging zo hi, Ref 28:2-7 2 Sa 7:1-16; 1 Khang 17:1-14
3 ahizong keima in ngalkap khat hi a, chisan tam mama ka luansak hu in Topa in tua sia ka sep tu hong khaam hi.
4 Topa Israel te ii Pathian in Israel a uk tawntung tu in keima le ka suan ka paalte hong teal hi. Ama in a lampui tu in Judah nam teal a, Judah nam sung pan ka pa teal hi. Tua innkuan bup sung pan ama uuk bangin kei hong laa a, Israel ngam theampo a uk kumpi hong suaksak hi.
5 Ama in tapa tam hong pia a tuate theampo sung pan Topa ii kumpi ngam Israel uk tu in Solomon teal hi.
6 “ Topa in kei tungah, ‘Ka Biakinnpi a sa tu pa sia na tapa Solomon hi. Ama ka ta tu in ka teal zo a, keima a pa ka hi tu hi.
7 Ka thukhamte le ka thupiakte theampo tu a, a zui bangin pha tak a zui zom le a kumpi ngam sia a tawntungin ka khomsuansak tu hi,’ hong ci hi.
8 “Tua ahikom tu in ka mite awng, hi ngampha sia na nei tawntung thei natu le khang khat zawk khang khat a kizomin na nei suak thei natu, Topa ih Pathian ii thupiakte theampo pha takin na zui natu in ih Pathian mai le Topa ii mi, Israel mite theampo kikhopna ah thu kong pia hi,” ci hi.
9 Tua ciang Solomon tungah ama in, “Ka tapa awng, na pa ii Pathian sia thusim in a, lungkaa ngawlin uuk tatakna taw ama na seam in. Ama in ih thinsung tawngh le ih ngaisutna theampo he siat hi. Ama kung na zuan le ama in nang hong saang tu a; na taisan le a tawntungin nang hong nungngat tu hi.
10 Topa in ama Biakinnpi thiangtho a sa tu in nang hong teal zo ahi hunlam na tel kul hi. Tua nasep sia tu in seam in — citakna taw seam in,” ci hi.
11 David in Solomon tungah biakinn saknate, vanh kholna inndoite, inndoi dangte theampo ngealna le mawmaisakna Thiangthobel Mun atu ngealnate pia hi.
12 Ama ngaisut sate theampo ahi leitualte le a kiimkot ah a om inndoite, biakinn vanh le Topa tungah a ki aaptuam letsongte kholna inndoite atu ngealnate zongh pia hi.
13 Thiampite le Levi te kikaikhawm in a vawt tu nasepte ahi Biakinnpi ah a nasep tute le biakinn vanh ankuang anbealte theampo kepthiam natu ngealnate zongh David in pia hi.
14 Ama in kuang le bealte vawt natu in ngunn le khamh bangza zangh tu a,
15 meiinn le a detna khuam khat sim atu,
16 ngunn sabuaite le Pathian a kipia anluumte koina khamh sabuai khat sim atu in ngunn le khamh bangza zak kul tu ci in ngealnate pia hi.
17 Ama in thikkeaukaate, kuangte le thawl ngong neite atu khamh ciitak bangza, pakante vawt natu in ngunn le khamh bangza kizangh tu,
18 tuaciang ngimnamtui halna biaknatau le Topa Thuciamna Thingkuang tungah a thate phalin a om Cherubim tona leang vawt natu in khamh ciitak bangza kizangh tu cisia thupia hi.
19 David kumpipa in, “Hiteng theampo sia Topa ama mama in ka sep ka vawt tu hong sawl na bang zui in a ki at sa ngealna sia sungah om hi,” ci hi.
20 David kumpipa in a tapa Solomon tungah, “Kimuang in na thin takkha in. Nasep kipan in a, bangma in khaktansak heak in. A na ka sep Topa Pathian sia nang taw hong omkhawm tu hi. Ama in nang hong nusia ngawl tu a, ama Biakinnpi nasep teng na man dong nang taw hong omkhawm tu hi.
21 Thiampite le Levi mite sia Biakinnpi sungah a nasep tute kiseesak zo hi. Thiamna namkim a nei naseamte sia nangma hong hu tu sia thalawp a, mite theampo le a lampuite sia nangma sawl babang seam tu in om uh hi,” ci hi.