26
Biakinnpi a Cingte
1 Hite sia biakinn a cing Levi te ii nasep kiseena ahi hi. Korah bee le phung panin Asaph innkuanpui Kore tapa Meshelemiah om hi.
2 Ama in tapa sali nei a, a piankum zui in: Zechariah, Jediael, Zebadiah, Jathniel,
3 Elam, Jehohanan, le Eliehoenai te ahi hi.
4 Tapa liat piakna taw Pathian ii thupha a piak Obed Edom zongh om a, tua a tapate sia a piankum zui in: Shemaiah, Jehozabad, Joah, Sachar, Nethanel, Ref 26:4-5 2 Sa 6:11; 1 Khang 13:14
5 Ammiel, Issachar, le Peullethai te ahi uh hi.
6-7 Obed Edom ii tapa lianbel Shemaiah in tapa luk nei a: Othni, Rephael, Obed, Elzabad, Elihu, le Semachiah te ahi hi. Amate sia thiamna lian a nei uh hu in a bee le phung sungah mihing thupite ahi hi; a khakte nii sia thiam tuan hi.
8 Hi nasepna ah Obed Edom innkuan in a thiam mama sa mihing a vekpi in 62 pia hi.
9 Meshelemiah ii innkuan in a thiamsa mihing sawm le liat pia hi.
10 Merari bee le phung pan Hosah om in, ama in tapa li nei a: Shimri a tapa lianbel ahi ngawl hang a pa in lampui pia hi,
11 Hilkiah, Tebaliah, le Zechariah te ahi hi. Hosah innkuan sung pan biakinn cingte sia a vekpi in sawm le thum pha hi.
12 Levi dangte bangma in biakinn cingte sia innkuan zui in a pawlin kikhen a, Biakinnpi nasep kisee hi.
13 Kongpi koisia akua in cing tu cisia innkuan tam le tawm ci tuan ngawlin innkuan simin lai meetang sawk hi.
14 Shelemiah in nisuana sang kongpi, tuaciang ngual tungah ngaisutna pha a pia tawntung a tapa Zechariah in saksang kongpi nga hi.
15 Obed Edom sia thangsang kongpi, tuaciang a tapate sia vanh kholna inndoite kicingsak hi.
16 Shuppim le Hosah te sia nitumna sang kongpi le lam tungnung ah a om Shallecheth Kongpite kicingsak hi. Kong cin vaipuak sia a hun a hun in kisee hi.
17 Nisuana sangah ni simin kongcing luk, saksang ah li, tuaciang thangsang ah li kisee hi. Vanh kholna inndoite sia ni sim a cing li kikoi a, inndoi khat mihing nii veu in cing hi.
18 Nitumna sang a om vanh kholna inndoi nai lampi hui ah a cing li om a, inncing tatak sia nii om hi.
19 Hisia Korah le Merari bee le phung te ii kongcing nasep kiseena ahi hi.
A dang Biakinnpi Nasepte
20 A Levi mipui dangte in biakinn sum kholna le Pathian tungah a ki aap letsongte koina inndoite uk hi.
21 Gershon tapate khat ahi Ladan sia innkuan pawl tam mama te ii taanghpupi hi a, a tapa Jehiel ii innkuan zongh kihel hi.
22 Ladan tapa dangte nii ahi Zetham le Joel sia biakinn sum kholna le vanh kholna inndoite uk hi.
23 Amram, Izhar, Hebron, le Uzziel ii suan le paalte tung zongh ah nasepte kisee hi.
24 Moses tapa Gershom bee le phung pan Shebuel sia biakinn sum kholna a sai ulianbel hi.
25 Gershom ii suapui Eliezer taw kisai in ama sia Shelomith taw kimealhe hi. Eliezer sia Jeshiah ii pa ahi Rehabiah ii pa, Joram ii pa, Zichri ii pa, Shelomith ii pa hi.
26 Shelomith le a innkuanpuite in Pathian tungah David kumpipa, bangkua pabelte, bee le phungte ii lampuite le ngalkap bute ii a aaptuam letsongte theampo keamcing hi.
27 Amate in ngalsimna pan a laaksak vanhte pawlkhat la in Biakinnpi ah zak tu in aaptuam uh hi.
28 Shelomith le a innkuan sia Biakinnpi sung zak tu in a ki aaptuam hi vanhte theampo a saipa hi in, tua ii sungah kamsaang Samuel, Saul kumpipa, Ner tapa Abner, le Zeruiah tapa Joab te ii a puak letsongte zongh kihel hi.
A dang Levi te ii Nasepte
29 Izhar ih suan le paalte sung pan Chenaniah le a tapate sia ki ukna nasepte kisee a: thu tepteena laibute kepcingna le Israel mite thu kineinate ah thukhensak nasepte ahi hi.
30 Hebron ii suan le paalte sung pan Hashabiah le a mealheak a kikhai tuam pasal 1,700 te sia Jordan ngun nitumna sang Israel ngam ah biakna paaina vai theampo le mipite ii vai theampo ki ukna ah a vaihawmte ahi hi.
31 Jeriah sia Hebron suan le paalte lampuipa hi. David ii kumpi a sep zawk a kum 40 kum in Hebron ii suan le paal innkuan khangngui a kikat ciang hi innkuan sung pan ngalkap mindok pawlkhat Gilead ngam Jazer khua ah a teen sia kihe hi.
32 David kumpipa in Jeriah mealheakte sung pan a mindok innkuan pabel 2,700 teal a, Jordan ngun nisuana sang Israel ngam — Reuben ngam, Gad ngam le Manasseh nisuana ngam sungah biakna paaina vai le mipite ii vai theampo uksak hi.