Psalm Late 97
A lianbel Ukpa Pathian
1 Topa sia kumpipa hi! Leitung awng lungdam in!
Tuipi sungah a om, no tuikulhte awng, lawp tek vun!
2 Meeikaai le khuazing in ama kiim uum hi;
ama in thutang le thukhaikim taw uk hi.
3 Meikuang sia a mai ah pai a,
a kiimkot ah a om a ngalte kaanghtum hi.
4 Ama ii khualeng in simlei taangsak hi;
tuasia leitung in mu in liing hi.
5 Mualte sia Topa ii mai,
leitung theampo ii Topa mai ah khuainun bangin tui tham hi.
6 Vantungte in ama thutang thangsak uh a,
minam theampo in ama ii minthanna mu uh hi.
7 Milim a bia peuma maizum kingasak tu hi;
pathian theampo in Topa mai ah kun uh hi.
8 Zion mite lungdam uh a,
Judah khuapite lawp tek uh hi,
banghang ziam cile na thukhenna hang ahi hi, Topa awng.
9 Vaanglianbelpa Topa awng,
nang sia leitung theampo a ukpa na hi hi;
pathian dangte theampo sangin na lianzaw lai hi.
10 Topa in siatna a ensante it hi;
ama in ama mite ii nuntakna dal hi;
mihing seksolte ii thahatna panin amate suatak hi.
11 Thutangte tungah
khuavak taang a,
miphate tungah
lungdamna om hi.
12 No a thutang theampo awng,
Topa ii a sep sate hu in lungdam vun!
A thiangtho Pathian in bang teng seam zo ci sia phawk vun a,
ama tungah lungdamko vun.