Psalm Late 89
Minam bup Ngimnga Hun a Biakna La Ref 89 Thulu: 1 Kum 4:31
1 Topa awng, nong itna kip sia la in ka sa tawntung tu hi;
na thumaanna a tawntungin ka thangsak tu hi.
2 Na itna in a tawntung atu in
kikhomsuan tu ci in ka he a, na thumaanna in van bangin kip hi.
3 Nangma in, “Ka teal mihing pa taw thuciamna khat ka vawt zo hi;
ka naseampa David tungah kamciam ka pia zo a,
4 ‘Nangma ii suan khat sia kumpi in maang tawntung tu hi;
na kumpi khangngui sia a tawntungin kong kepsak tu hi,’ ka ci hi,” na ci hi. Ref 89:4 2 Sa 7:12-16; 1 Khang 17:11-14; Ps 132:11; Sawl 2:30
5 Vantungte in a lamdang na vawtte la in hong sak hi;
Topa awng amate in na thumaanna la in sa uh hi.
6 Topa awng vantung ah
nang taw a kibang kuama om ngawl hi;
vantung mi a minpiang nang taw a kibang kuama om ngawl hi.
7 Mi thiangthote council kikhopna ah nang hong kikiita hi;
amate theampo in nang hong thasia in ding uh hi.
8 Vaanglianbelpa Topa Pathian awng, nang za in kuama thahat ngawl hi;
Topa awng na theampo ah nang na thumaan hi.
9 A thahat tuipi na uk hi;
tuasia ii a thin uuk tuihualte na thimsak hi.
10 Nganhingpui Rahab sia na sucip a, na thatlum hi;
Na thahatna lianpi taw na ngalte na zothal hi.
11 Vantung in nangma aa hi a leitung zongh nangma neisa ma ahi hi;
simlei le a sung a om theampo nangma vawt hi.
12 Saksang le thangsang
na bitphua hi;
Tabor Mual le Hermon Mualte in
lungdam in nangma la hong sak hi.
13 Bangza in na vaanglian ziam!
Bangza in na thahatna lian ziam!
14 Na kumpi ngam sia
thumaan le thutang tungah kidoppha hi;
itna le thumaanna sia na sep na vawt theampo ii sungah kilangh hi.
15 Lasakna taw nangma
hong biate le
na dikna khuavak sungah
a teangte sia mi lungdamte ahi uh hi.
16 Nangma hangin amate sia sunkhua in lawpna nei uh a,
amate in na phatna hu in nang hong pok uh hi.
17 Nangma in zawna lianpite nong pia hi;
na itna sungah zawna nong mualsuasak hi.
18 Topa awng, nangma in kote hong dalpa nong tealsak hi;
Israel ii a Thiangtho Pathian awng, nangma in ko atu kumpipa nong pia hi.
David tungah Pathian ii Kamciam
19 A thumaan na naseamte tungah taanghlai in
mukholna khat na piak sungah,
“Ngalkap minthang khat huna ka pia zo hi;
mihingte sung pan ka tealsa khat kumpi tokhum ka pia zo hi. Ref 89:20 1 Sa 13:14; Sawl 13:22; 1 Sa 16:12
20 Ka naseampa David sia
sathau thiang noina taw kumpi in ka koi zo hi.
21 Ka thahatna ama taw om tawntung tu a,
ka vaangletna in ama hatsak tu hi.
22 A ngalte in ama
zo ngeingawl tu hi;
mihing seksolte in ama
zo ngawl tu hi.
23 A ngalte ka sucip tu a
ama a ensan theampo ka that tu hi.
24 Ama ka it tu a, ama tungah ka thumaan tu hi;
ngalzo tawntung tu in ama ka siam tu hi.
25 Mediterranean panin
Euphrates ngun dong a kumpi ngam ka keau tu hi.
26 Ama in kei tungah
‘Nangma in ka pa le ka Pathian na hi hi;
nangma in kei hong dalpa le hong ngumpa na hi hi’ hong ci tu hi.
27 Ama sia ka tapaciil in ka vawt tu a,
kumpi theampo sung pan a lianbel hi tu hi. Ref 89:27 Tpl 1:5
28 Ama tungah ka kamciam ka kholet tu a,
ama taw ka thuciamna sia a tawntungin a kikhomsuan tu hi.
29 Ama ii kumpi khangngui sia van bangin kip tu hi;
ama ii suan khat sia kumpi in maang tawntung tu hi.
30 “Ahihang a suan a paalte in ka thukham a ni bua a,
ka thupiakte bangin a nungta bua uh le,
31 amate in ka hilnate a melsia a,
ka thupiakte a len bua ahile,
32 amate mawnate huvau in daan ka pia tu hi;
amate khialnate huvau in ka thuaksak tu hi.
33 Ahihang David ka itna ka bosak buatu a,
ama tungah ka kamciam ka peal buatu hi.
34 Ama taw ka thuciamna ka tatsak buatu a,
a tungah ka piak ka kamciamsa khat zongh ka dok kik buatu hi.
35 “A tawntung atu in khatvei lian,
ka min thiangtho taw kamciam ka vawt zo a:
David tungah ka leilot ngei buatu hi.
36 Ama in suan le paal nei tawntung tu a,
ni a taan lai theampo in keima in a kumpi ngam ka etsak tu hi.
37 Tuasia in van ah a om
thumaan tetti a pang soltha bangin kip tu hi.” na ci hi.
Kumpipa Ngallelna Kaa la
38 Ahihang na tealsa kumpipa tungah na thin uuk hi;
ama taisan in na nil hi.
39 Na naseampa taw na thuciamna sia na tatsak zo a,
a kumpilukhu sia buan sungah na vawk zo hi.
40 Nangma in a khuapi luphungte na sutham zo a
a kulhpite a cimh sa in na nusiat hi.
41 Kaantan in a pai po in a neisate nguksak hi;
a innpaamte theampo in ama nui san uh hi.
42 Ama ngalte sia ngalzawna na pia zo hi;
amate theampo a lung na damsak hi.
43 Ama ngalhiamte a luithong na suaksak zo a,
ngal kidona sungah na lelsak zo hi.
44 A kumpi ciangkhut na laaksak zo a,
a kumpi tokhum sia lei denna in na neizo hi.
45 A hun ngawlin ama na huaisak zo a,
maimawlna taw ama na tuam hi.
Kitat natu Thungetna
46 Topa awng, nangma le nangma a tawntungin kiseal tu ni ziam?
Na thin uukna bang tanvei mei bangin kuang tu ziam?
47 Ka nuntakna bangza in
tom ziam ci sia hong phawsak ta'n;
kote theampo sia a thithei tu a nong bitphua ahi hunlam phawk in!
48 Akua thi ngeingawlin, nungta thei tu ziam?
Mihing in thaankhuk pan bangbangin
ama le ama kikeam thei tu ziam?
49 Topa awng, tu ma sia a,
na itna tetti te koisung om ziam?
David tung kamciam na vawtte koisung om ziam?
50 Kei na naseampa hong kilan zazaanna le
Pathian he ngawlte hong haamsiatna ka thuakte hong makngilsak heak in.
51 Topa awng, thaankhuk panin na ngalte in na tealsa kumpipa selno zazaan hi!
a paina po ah amate in selno zazaan uh hi.
52 A tawntungin Topa pok vun!