Psalm Late 84
Pathian ii Inn Thangaina
1 Vaanglianbelpa Topa awng,
na Biakinn bangza in thangai khi ziam!
2 Tua munah bangza in om nuam khi ziam!
Topa Biakinn sungah om tu ka thangai hi.
Ka nuntakna buppi taw
a nungta Pathian tungah lungdam in la ka sa hi.
3 Tonbawmte ngawngawn in bu vawt a,
pialpiate in amate buk tek nei hi;
amate in na biaknatau taw a kinaina ah a note keam uh hi,
Vaanglianbelpa Topa ka kumpipa le ka Pathian awng.
4 Na Biakinn sungah teang a, a tawntung nang tungah
pokna la a sate in mi lungdamte ahi uh hi.
5 Nangma kung pan thahatna a ngate le
a thiangtho Zion Mual ah Pathian biak tu a lawpte in bangza in lungdam ziam!
6 Amate in Baca kongaw mualkuam a kaantan uh ciangin
tua mun sia ciktui phulna mun hong suak hi;
tangngam ngua in
tuicin theina munte
dimsak siat hi.
7 Amate a papai uh ciang,
hat vaial a,
amate in pathiante ii Pathian sia
Zion mual tungah a mu tu uh hi.
8 Topa Vaanglianbelpa Pathian awng,
ka thungetna hong za ta'n.
Hong ngai ta'n, Jacob ii Pathian awng!
9 Pathian awng, na tealsa kumpipa
kote kumpipa thupha hong piaksak ta'n.
10 Na Biakinn sungah ni khat hun zakna sia
leidang mun khat pawpo ah kum tulkhat zak sangin phazaw hi;
Mihing seksolte inn sungah ka teen sangin
ka Pathian inn kongkha ah ka ding nuamzaw hi.
11 Topa in ei hong sungsia pa le a minthang kumpipa hi a,
ama in cikna le minphatna taw eite thupha hong pia hi.
A maan a seamte tungah
ama in naphate khat zongh a haza bua hi.
12 Vaanglianbelpa Topa awng,
nang hong muangte in bangza in a lungdam uh ziam!