Psalm Late 60
Suatak natu Thungetna Ref 60 Thulu: 2 Sa 8:13; 1 Khang 18:12
1 Nangma in kote nong nial zo a,
Pathian awng,
nong zothal zo hi.
Ko tungah na thin uuk zo hi —
ahihang tu in kote hong maingat kik ta'n.
2 Leitangte nangma in na liingsak a na kekthamsak hi;
tu in a keknate kimatsak kik in
banghang ziam cile cimhtham tu in kithoai hi.
3 Na mite nasia takin nong thuaksak hi;
zukham bang keakin ka hoi uh hi.
4 Nang hong thasiate tungah kidop natu thu na pia zo a,
tua taw amate in lalna tu pan suakta thei tu uh hi.
5 Na thahatna taw kote
hong hun ta'n;
na it, na mite a suatak natu in
kong thungetna uh hong zo ta'n.
6 Ama ii a thiangtho mun panin Pathian in,
“Zawna mualsuana taw Shechem ka khentham tu a,
Sukkoth Ngamkuam sia ka mite ka hawmsak tu hi.
7 Gilead sia keima aa hi a,
Manasseh zongh keima aa ahi hi.
Ephraim sia ka thik lukhu hi a,
Judah sia ka kumpi ciangkhut hi.
8 Ahihang Moab sia kisilna kuangin ka zangh tu a,
keima neisa ahi hunlam a kitel natu in
ka peangdap taw Edom ka deang tu hi.
Philistine te in kei tungah
zawna mualsua in au tu ki um ziam?” ci hi.
9 Pathian awng, luphung taw a ki uum khuapi
sungah akua in kei hong paipui tu ziam?
Edom ah akua in kei lam hong pui tu ziam?
10 Kote hong nial takpi zo ni ziam?
Ka ngalkap honte taw hong mainawt pui ngawl tu ni ziam?
11 Ngal hong dopui ta'n;
mihingte hong huna sia mannung ngawl hi.
12 Pathian ei sangah hong pang pole ih zo tu hi;
ama in ih ngalte zo tu hi.