Psalm Late 58
Mihing Seksolte Daan Piak tu Thungetna
1 No ngamukte in a maan khensatna na pia ngei uh ziam?
Mihing khat sim ii tungah thutang in thu na khen uh ziam?
2 Khen ngawl nu hi!
a sia na vawt thei tu uh teng bekma na ngaisun uh a,
tuaciang ngam le lei ah ngoltol khialna liante vawt nu hi.
3 Mihing ngilote in
a khan tawntung ngamtatna maan ngawl taw nungta uh hi;
a pian ni pan kipan leilot thuson uh hi.
4 Amate sia ngulte bangin nguu taw kidim hi;
amate in ngulsok nangong bangin a bil uh huh hi,
5 tuate in ngul zol thiamte aw le za ngawl,
mitbum thiamte phuisamna le za ngawl uh hi.
6 Pathian awng,
hi a kiitakhuai tawpite ii hate thiaktan in.
7 Lei sungah tui tum bangin amate mang vadi tahen;
lampi lai lopate bangin kisiikcil tahen.
8 Amate sia buan ii khulup toktolte bang hi tahen;
khuavak a mu ngeingawl
a thisa a suak nausen khat bang hi tahen.
9 Amate in zongh tel man ngawlin lopa bangin kivaattan hi;
a lauhuai thin uukna taw
Pathian in amate a nuntak lai ma in muutkeak tu hi.
10 Mawneite daan a kipiak
a mu uh ciang thutangte lungdam tu hi;
amate in a seksolte ii chisan sung siikin tan tu uh hi.
11 Mihingte in “Thutangte sia thaman kipia takpi hi;
Leitung ah thu a khen Pathian khat om takpi hi,” a ci tu uh hi.