Psalm Late 55
A Lawmpa ii Leeheak thuak khat Thungetna
1 Pathian awng, ka thungetna hong za ta'n;
kong thuumna panin hong nungngat heak in!
2 Hong ngai ta'n a hong zo ta'n;
ka thinngimna taw zawmcip zo khi hi.
3 Ka ngalte hong tawnna hu in ka lau a,
mihing seksolte hong zawthawkna hangin ka topcip zo hi.
Amate in ka tungah ngimna hong puak hi;
amate kei tungah hong thin uukin hong ensan hi.
4 Ka lau mama a, thi tu launa in
hong nengcip hi.
5 Liinna le launa in kei hong lencip hi;
patauna in kei hong zo hi.
6 Vakhu bangin tha nei leng ka uuk hi.
Leangin tawlngakna ka mu tu hi.
7 A khualana ah ka leang tu a,
duisung ah ka teang tu hi.
8 A thin uuk vuipi suangvalte panin
bukna khat manlang takin ka mu tu hi.
9 Topa awng, ka ngalte kampau uh hi bialbualsak in.
Khuapi sungah, ngoltolna le
buainate ka mu hi.
10 Sun taw zan taw tua khuapi kiim uum uh a,
tua khuapi sia khut khialna le ngimna taw kidimsak uh hi.
11 Mun theampo ah lalna om hi;
lampite sia zawthawkna le kitheamna taw kidim hi.
12 Kei hong nunau sia ka ngal khat hile
thuak zo tu khi hi;
kei hong langpan khat ii ka tungah
hong kiphatsakna hile
ama kung panin
ka buu thei tu hi.
13 Ahihang tuasia in ka kitholpui, ka pawl,
ka lawm cii pha ahi nangma hi thong ni hi.
14 Khat le khat sia thu ih kumkhawm a,
Biakinnpi sungah ih bia khawm hi.
15 Ka ngalte sia amate hun a cin ma in thi tahen;
mithi khua ah amate a hingtang in zuansuk tahen!
Siatna sia a inn sung le a thinsung uh ah om hi.
16 Ahihang hong hu tu in Topa Pathian ka sam a,
tuaciang ama in kei hong hun tu hi.
17 Zingsang, sun le zan in
ka thuumnate le ka taunate ama kungah paito a,
tua ahikom ama in ka aw hong za tu hi.
18 Ngal tazata ka simnate pan
ama in kei bit takin hong ciapui kik tu hi.
19 Tawntung hun pan a, hong uk Pathian in kei hong za tu a,
amate a zo tu hi;
banghang ziam cile amate kikheal nuam ngawlin,
20 Tu ma sia a, ka kitholpui pa in a lawmte sim hi;
a kamciamte a peal hi.
21 A kammal ahile noaidiat sangin neal zaw ahihang,
a thinsung ah etsatna om hi;
a kammalte sia sathau bangin neal a,
ahihang tuate in namsau hiamte bangin bantan hi.
22 Na ngimna uh te
Topa nusiat vun,
tua hile ama in hong hung tu hi;
ama in mihing thumaante bangma hunin
lelna thuaksak ngeingawl hi.
23 Ahihang, Pathian awng,
mihing thatte le a leilotte
nangma in amate khanlang a cin ma in
a thaankuulte ah na paipui tu hi.
Kei ka hile nang kong muang tu hi.