Psalm Late 49
Haunate tungah Muanna sia Mawmawtna
1 A kuama po in hi thu za vun!
Mun theampo a om mihingte awng,
2 A lian, a no, a hau, a zawng
a kibangin ngai khawm tek vun.
3 Ka ngaisutte kitelthiang tu hi;
ciimna kammalte ka pau tu hi.
4 Paunakte kong zangh tu a
tengtongh ka tum ciang
a khiakna kong sontel tu hi.
5 Ka ngalte in hong kiim uum a,
launa hun sungah ka om ciang ka lau bua hi.
6 A hauna uh muangin a neisate uh a kiphatsakpui
mihing ngilote in hong kiim uum hangin ka kiita buatu hi.
7 Mihing khat in ama le ama kitan thei ngeingawl hi;
a nuntakna ii man Pathian tungah lo zo ngeingawl hi,
8 banghang ziam cile mihing khat ii nuntakna ii a man sia tam leih hi.
9 Thaankuul a thet ngawl natu le
tawntung nuntak natu in ama ii piak thei tute a kicing ngei buatu hi.
10 Mihing mawmawte le a nanghte bangma in
mihing a ciimte zongh thi hi ci in
a kuama theampo ii mu thei ahi hi.
Amate theampo in a hauna uh sia a suan a paalte nusiat hi.
11 Amate in leitangte nei ngei ahihang
Amate ii thaankuulte sia a tawntungin a inn uh hi a;
tua munah a tawntungin teang uh hi.
12 Mihing khat ii letna in
thina panin ama hun thei ngeingawl hi;
ama sia nganhingte bangin thi veve tu hi.
13 A hauna uh taw a lungkimte ii tawpna le
amate le amate a kimuangte bang tawk ziam ci sia en vun —
14 amate sia tuute bangin a thi tu in kisee a,
Thina sia amate tuucing pa a hi tu hi.
Amate pumpi sia manlang takin muatin
amate ii inn taw a kikhuala mithi khua ah a om uh ciang
thutangte in amate tungah zawna mualsua tu hi.
15 Ahihang Pathian in kei hong suatak tu hi;
thina vaangletna panin kei hong hun tu hi.
16 Mihing khat a hau ciang le
ama haunate a khan seseam ciang zongin na thinnuammaw heak vun;
17 ama in a thi ciangin keng thei tuan ngawl hi;
a hauna sia ama in thaan ah
tonpui thei ngawl hi.
18 Mihing khat in hi nuntakna sungah lungkim in
ama zawnate hu in kipok kale,
19 ama in thi in a tawntung khua zingna mun
a taanghpupite kung zuan tu hi.
20 Mihing khat ii letna in
thina panin ama hun zo ngeingawl hi;
ama sia nganhingte bangin thi lai tu hi.