Psalm Late 47
A Lianbel Ukpa
1 Lungdamin na khut uh beang vun,
mihing theampo awng!
A nging lasaknate taw Pathian pok vun!
2 Topa a Saangbel Pa sia kiitak tu ahi hi;
Ama in leitung theampo a uk kumpilian pa ahi hi.
3 Ama in mihingte tungah zawna ei hong pia hi;
minamte hong uksak hi.
4 Hong it ama mihingte ii kiphatsakpui tu neisa ahi
ih teenna leitang sia ama in hong tealsak hi.
5 Pathian in ama ii kumpi tokhum zuan to hi.
Topa a pai to laitak lungdamna taw auna le lemle awte nging hi.
6 Pathian tungah pokna lasa vun;
ih kumpipa tungah pokna lasa vun!
7 Pathian in leitung theampo ii kumpipa ahi hi;
lasaknate taw ama pok vun.
8 Pathian in ama ii kumpi tokhum thiangtho tungah to hi;
ama in minamte uk hi.
9 Minam tuatuam a ukte in
Abraham ii Pathian ii mite taw hong kikhawm uh hi.
Ngalkap hon theampo sangin ama thahat zaw hi;
a lianbel in ama maang hi.