Psalm Late 148
Vaannuai ii Pathian A pok natu Sapna
No, tungsang a saangna a teangte awng,
vantung panin Topa pok vun.
2 Ama ii vantunglalang theampo,
ama ii vantung ngalkaphonpi theampo awng, ama pok vun.
3 Ni le tha awng, ama pok vun;
a taang aksite awng,
ama pok vun.
4 A saangbel vantungte le
van ii tungsia a om tuite awng, ama pok vun.
5 Amate theampo in Topa ii min pok tek tahen!
Ama in thupia a, amate kibitphua hi;
6 Ama thupiakna taw amate sia
a om na sasan tek ah a tawntungin kikoi a,
tuaciang amate in a thu ni ngawlin a om thei bua hi.
7 Leitung panin Topa pok vun,
tuipi nganhingpuite le tuipi thukte;
8 a thupiak a zui khualeng le ngialte, vuuk le meeite,
9 Pok vun, mualniamte le mualsaangte,
a nga thei thingkungte le taamthingte;
10 innsa ngamsa nganhing theampo,
a awmtaal nganhingte le vacimte awng.
11 Ama pok vun, kumpipate le mihing theampo,
kumpi tate le a dang ngamukte;
12 ngaknunote le tangvalnote,
khanghaamte le patangnote zongh in pok vun.
13 Amate theampo in Topa ii min pok tek tahen!
Ama ii min in a dang theampo sangin lianzaw hi;
ama ii minthanna in van le lei ii tungsia ahi hi.
14 Ama ii a it mama Israel mite ahi
ama mite theampo in ama a pok natu in
ama in ama ii minam thahatsak hi.