Psalm Late 144
Zawna nga Kumpipa ii Pathian tungah Lungdamkona
1 Kei hong sungsia pa Topa pok vun!
Ama in ngal kidozia kei hong hil a,
ngalsim tu in hong kingingtasak hi.
2 Ama in kei hong dalpa le hong hungpa ahi hi,
ka belhna le ka ngumpa, ngammuan natu in, ka muanpa ahi hi.
Ama in minamte ka khutnuai ah om tu in hong zawsak hi.
3 Topa awng, nangma in na phaw tham tu in a thithei mihingte bang hi a;
a thithei lelte po banghangin thusim ni ziam? Ref 144:3 Job 7:17-18; Ps 8:4
4 Amate sia vui muut khat taw kibang hi;
amate ii khan sia a kaantan ziau limh khat bang ahi hi.
5 Topa awng, van khentham in hong pai suk ta'n;
mualte tham in, tua hile tuate in meikhu pusua tu hi.
6 Khualeng tee vazalte tha in a, na ngalte thethaang in;
na thaltangte kap in a, amate taikeaksak in.
7 Tungsang panin
hong baansuk ta'n.
Tuithukna pan hong dokto ta'n a,
hong suatak ta'n;
ngamdang mite thahatna panin
hong hun ta'n,
8 amate in thumaan son ngeingawl a,
kiciam napi leilot lai hi.
9 Nang tungah la thak khat kong sak tu hi, Pathian awng;
tengtongh tumin la kong sak tu hi.
10 Kumpipate tungah zawna na pia a,
na naseampa David na suatak hi.
11 A ngilo ka ngalte kung panin hong hun ta'n;
thumaan son ngeingawl a,
kiciamna ngawngawn taw a leilot lai,
ngamdangmite thahatna panin hong suatak ta'n.
12 Ka tapate uh a khanmoi lai in
thahatin a khang thingkungte bang hi tahen.
Ka tanute uh sia kumpi inn kingte a zeam
khuam hoite taw kibang tahen.
13 Ka ansaal uhte an namcin taw kidim tahen a,
ka lo sungah tuute in a tul a then in pung tahen.
14 Ka khuite uh zongh a no tol,
a sumsi om ngawlin ta tam mama nei tahen.
Khua sung ih lampite ah
ngim nga kikona aw nging heak hen.
15 Hi thute bangin a piang minam sia mi nuamsa ahi hi;
Pathian sia Topa in a nei mite in mihing lungdamte ahi uh hi.