Psalm Late 142
Hu natu Thungetna Ref 142 Thulu: 1 Sa 22:1; 24:3
1 Hu ngenin Topa ka sam hi;
ama ka maangkaa hi,
2 Ka lungkim ngawlna theampo ama ka puak hi;
ka ngim ngana theampo ama tungah ka son hi.
3 A cimaw hi zo ing ci tu in ka kithoai ciang,
ama in ka ngamtat natu he hi.
Ka lampi totna ah
ka ngalte in kei thaang hong sia ku zo hi.
4 Ka kiim ka paam ka et ciangin
kei hong hu tu kuama ka mu bua hi, kuama hong dal tu a om bua hi.
Kuama in kei hong awlmawk bua hi.
5 Topa awng, nang tungah
hu ngenin kong au hi;
Topa, nangma in kei hong dalpa na hi hi;
hi nuntakna sungah ka dei theampo kicinna in nangma na hi hi.
6 Hu ngen a, kong auna hong ngai ta'n,
banghang ziam cile ka thin kiamcip zo hi.
Ka ngalte kung panin hong hun ta'n;
amate sia kei atu in hat lei hi.
7 Ka thinngimna pan suatakna hong pia ta'n,
tuasia ciang kei tungah nong phatna hangin
na mite kikhopna sungah nang kong pok tu hi.