Psalm Late 132
Biakinnpi Pokna
1 Topa awng, David le
ama ii thuak haksatnate mangil heak in.
2 Topa awng, a vaanglian Jacob ii Pathian, nangma tungah
hong kamciamna, hong kiciamnate phawk in:
3 “Inn ah ka cia buatu a, lupna ka zuan buatu hi;
4 Topa atu mun khat,
a vaanglian Jacob ii Pathian teenna tu inn khat, ka piak mateng,
5 ka tawlnga buatu a, ka mu buatu hi,” ci hi.
6 Bethlehem khua ah
Thuciamna Thingkuang huvau ka za uh a,
Jearim lote sungah tua thingkuang ka mu uh hi. Ref 132:6-10 2 Khang 6:41-42
7 “ Topa inn ah pai tawng;
a kumpi tokhum mai pan bia tawng” ka ci uh hi. Ref 132:7 1 Kum 11:36
8 Topa awng, na vaangletna lim ahi, na Thuciamna Thingkuang taw
na Biakinnpi sungah hong pai ta'n a,
hi sungah a tawntungin hong om ta'n.
9 Na thiampite in a maan sepnate vawt tawntung tahen;
na mihingte in lungdamna taw au tahen!
10 Na naseampa David tungah kamciamna khat na pia hi;
Topa awng, na tealsa kumpipa nial heak in.
11 David tungah ciliap huai takin kamciamna khat na pia hi;
tua kamciam sia na dawk kik tu in na piak ahi bua hi;
“Na tapate sung panin
khat kumpi ka suaksak tu a, ama in nang zawkciang ngam a uk tu hi. Ref 132:11 2 Sa 7:12-16; 1 Khang 17:11-14; Ps 89:3-4; Sawl 2:30
12 Na tate in ka thuciamna sungah thumaan a,
amate tungah ka piak thute
a zui le, amate ii tate zongh in
a tawntungin kumpi suakin
na za hong lua tu hi,” na ci hi.
13 Topa in Zion sia teal zo hi;
ama teenna tu in vawt nuam hi.
14 “Hi sia in a tawntungin, ka teen natu mun ahi hi;
hi mun in ka uk nopna mun ahi hi.
15 Zion tungah ama kisap theampo kicing takin ka pia tu hi;
a mizawngte an pia in ka lungkimsak tu hi.
16 A thiampite sia a sepna theampo ah thupha ka pia tu a,
ama mihingte in lasa in
lungdamna taw a au tu uh hi.
17 Hi sungah David ii suan khat sia
kumpi lian khatin ka siam tu hi;
hi sungah ka tealsa kumpipa ukna ka keamcing tu hi. Ref 132:12 1 Kum 11:36
18 A ngalte sia maizumna taw ka tuam tu a,
ahizong ama ii kumpingam khangto in nuamsa tu hi,” na ci hi.