Psalm Late 12
Hu natu Thungetna
1 Topa awng, ko hong hu ta'n.
Mipha khat zongh kikhe nawn ngawl hi;
mihing thumaante kimu zo nawn ngawl hi.
2 Amate in khat le khat kitheam uh hi;
Amate in khat le khat kisial pokna taw kitheam uh hi.
3 Topa awng, sialpok thei te ii leeite na thimsak in!
Hi bang a, kihisakna taw a paute ii kam na huksak in.
4 “Ka kammal uh taw ka dei uh po nga khu hi.
Ka uuk bang po in ka pau lel tu uh a,
kuama in hong khaam thei ngawl tu hi,” ci uh hi.
5 “Ahihang tu in hong pai tu khi hi,” Topa in ci hi,
“Banghang ziam cile a cimawte kizothaw a,
vawtsiatna a thuakte in na a sakna taw tau uh hi.
Amate ii dei ngammuanna ka pia tu hi.”
6 Topa kamciamte in muanhuai hi;
tuate in pummei sungah salivei a kithiangsak
ngunn tatakte taw kibang hi.
7-8 Mi seksolte mun theampo ah om uh a,
tuaciangin a kuama theampo in ngitlona sia pok uh hi.
Topa awng, ko hong keam tawntung ta'n a,
tuabang mihingte ii kung panin hong keam ta'n.