Psalm Late 118
Zawna hu a Lungdamko Thungetna
1 Topa tungah
lungdamko vun,
banghang ziam cile ama pha hi,
tuaciang ama hong itna in a tawntung kip hi. Ref 118:1 1 Khang 16:34; 2 Khang 5:13; 7:3; Ezra 3:11; Ps 100:5; 106:1; Ps 107:1; 136:1; Jer 33:11
2 Israel te in:
“Ama ii itna kip tawntung hi” ci tahen.
3 Pathian thiampite in
“Ama ii itna kip tawntung hi” ci tahen.
4 Ama a bia theampo in
“Ama ii itna kip tawntung hi” ci tahen.
5 Ka ngim ngana sungah Topa ka biakpui hi;
ama in hong zo a hong suaktasak hi.
6 Topa in keima taw hong omkhawm a, kei ka lau buatu hi;
akua in kei bang hong law thei tu ziam? Ref 118:6 Heb 13:6
7 Topa sia kei hong hu pa hi a,
ka ngalte ii lelna a thuak sia ka mu tu hi.
8 Topa muanna in
mihing suan tu sangin
phazaw hi.
9 Topa muanna in
mihing lampuite suan tu sangin
10 Ngal tam mamate
ka kiim ah om hi;
ahihang Topa vaang taw
amate ka susia hi!
11 Amate ka kiimkot mun theampo ah a om uh hi;
ahihang Topa vaang taw amate ka susia hi!
12 Ka kiimkot panin amate in khuai bangin hong uumci hi,
ahihang lingkung kawm kaanghmei bangin amate kaanghtum paih hi;
Topa vaang taw
amate ka susia hi.
13 Kei sia nasia takin hong kisim a hong zo uh hi,
ahihang Topa in kei hong hu hi.
14 Topa in vaang hong pia a hong hatsak hi;
ama in kei hong hun zo hi. Ref 118:14 Pu 15:2; Is 12:2
15 Pathian mite tuipuan bukte sungah
zawna lungdamna taw a auna ngai vun:
“ Topa vaanglet thahatna in tu a bang a suaksak hi!
16 Kidona sungah ama vaanglet thahatna in
eite zawna ah hong then zo hi!” ci uh hi.
17 Kei ka thi buatu hi;
ka nungta zaw tu a, Topa sepsate ka thangsak tu hi.
18 Ama in nasia takin kei daan hong pia zo hi,
ahihang ama in kei hong thisak bua hi.
19 Biakinn kongpite kei hong hon tavun;
a sungah tumin, Topa tungah lungdam ka ko tu hi!
20 Hisia in Topa kongpi hi;
thutangte bek tum thei hi.
21 Topa awng, nang kong pok hi,
banghang ziam cile nangma in ka aw nong za a,
zawna nong pia zo hi. Ref 118:22 Lk 20:17; Sawl 4:11; 1 Pe 2:7
22 Inn sate in mannung sa ngawl a,
a nil suangtum sia a thupibel hong suak hi. Ref 118:22-23 Mt 21:42; Mk 12:10-11
23 Hisia in Topa ii sepsa ahi hi;
tua in bangza mu nop huai ziam!
24 Hisia in Topa zawna ni ahi hi;
lungdam in poai vawt tawng!
25 Hong hun ta'n, Topa awng, hong hun ta'n!
Kote zawna hong pia ta'n, Topa awng! Ref 118:25 Mt 21:9; Mk 11:9; Jn 12:13
26 Topa min taw hong pai pa,
Pathian in thupha pia tahen!
Topa Biakinn panin
nang thupha kong pia uh hi. Ref 118:26 Mt 21:9; 23:39; Mk 11:9; Lk 13:35; 19:38; Jn 12:13
27 Topa sia Pathian hi;
ama in ei tungah hong pha hi.
Na khut sung uh ah thingsawlte toai in
poai khaamna kipan vun a,
biaknatau kiimkot in pai vun.
28 Nangma in ka Pathian na hi a, lungdam kong ko hi;
na letna ka thangsak tu hi.
29 Topa tungah lungdamko vun,
banghang ziam cile ama pha hi,
tuaciang ama ii itna a tawntungin kip hi.