Psalm Late 112
Mipha khat ii Lungdamna
Topa zakta a, a thupiakte
zui tu nuam a sa sia in mihing lungdam ahi hi.
2 Mihing pha khat ii tate sia a ngam sungah thahat tu uh hi;
ama ii suan le paalte thupha kipia tu hi.
3 Ama ii bangkua sia nei le lamh taw kicing tu a,
ama a tawntungin nuamsa tu hi.
4 Mihing phate, ngual a hesuak theite, a dikte le thutangte atu in
khuazing sungah khuavak a taang hi.
5 Ngual tungah ngo takin sum pukthaak a,
a nasepna thumaanna taw a seam sia in mihing lungdam ahi hi.
6 Mipha khat in lelna thuak ngeingawl tu hi;
ama sia kiphawk tawntung tu hi.
7 Ama in thusia zaak tu a patau bua hi;
ama ii upna kho a, ama in Topa muang hi.
8 Ama sia thinngim ngawlin a lau bua hi;
a ngalte ii a lel tu uh sia ama in mu nanak tu hi.
9 A kitaangsamhte tungah ama in ngo takin pia a,
ama cikna thiamna sia bo ngeingawl hi;
ama thahat tu a, kizakta tu hi. Ref 112:9 2 Cor 9:9
10 Mihing seksolte in hi thu mu in a thin uh uuk hi;
amate in etsatna taw salh in tua teng taw amate a bo uh hi;
amate lametnate a tawntungin mangthang hi.