Psalm Late 109
A Ngim nga Pasal khat ii Phunna
1 Pathian awng,
nang kong pok hi;
thim om top heak in!
2 Mihing seksolte le leilot theite in kei hong sim hi.
Amate in kei huvau leilot thu son hi,
3 Kei hong siatson hi,
a thu om ngawl bulin kei hong sim hi.
4 Amate it in amate atu
thungetsak ka hi hangin amate in kei hong ngalvawt hi.
5 Amate in kei tungah phatna sia
siatna taw, itna sia etsatna taw hong thuk kik hi.
6 Ka ngalpa tungah thusit tu in
a maan ngawl thukhenpa khat teal in a,
ama ngalte khat ma in ama mawsiatsak in.
7 Ama sia thu kisit in, a maw hunlam kilangh tahen;
ama ii thungetna ngawngawn khialna lian khat bangin kituat tahen!
8 A nuntakna hai ngawlin bo tahen;
midang khat in a nasep lua tahen! Ref 109:8 Sawl 1:20
9 A tate sia tanga suak tahen a,
a zi meingong tahen!
10 A tate inn nei ngawl khutdaw ngente suak tahen;
a siacip sa a teenna pan amate kinot tahen!
11 A leibatnate in a neisa theampo laaksak tahen a,
ama sep thaman theampo khualmite in nga tahen.
12 Kuama in ama tungah dik ngei heak hen a,
ama ii nusiat tangate sia kuama in khoi a keam heak hen.
13 A suan a paal theampo mong tahen a,
khang kik sungah a min kimangil tahen.
14 A taanghpupite ngitlona sia Topa in ciamtee hen a,
a nu mawnate maisak ngei heak hen.
15 Amate mawna sia Topa in
a tawntungin ciamtee tahen a,
ahizong amate sia
16 Tua pa in cikna thiamna ngaisun ngeingawl hi;
ama in a zawng, taangsapna a neite le
a hu tu a nei ngawlte vawtsia in thatlum hi.
17 Ama in ngual tomlaw thanuam ahikom, ama kitomlaw tahen!
Ama in thupha pia nuam ngawlhet ahikom,
kuama in ama thupha pia heak hen!
18 Ama in haamsiatna sia a puansilh bangin ngeina see hi;
haamsiatnate in ama ii pumpi tui bangin tuamh tahen a,
a ngu a taang sungah sathau bangin zenh tahen!
19 Tua haamsiatnate in ama sia puan bangin tuam tahen a,
kawngkhau bangin ama vial top tahen!
20 Topa awng, kei hong langpanin
kamsia a pau ka ngalte tungah tuabangin daan pia in.
21 Ahihang Vaanglianpipa ka Topa awng,
nong kamciamsa bangin kei hong hu ta'n a,
a pha na itna hangin kei hong suatak ta'n.
22 Keima in zawngin ka kitaangsamh hi;
ka thinsung tawngh dongin na hi.
23 Nitak niliap bangin
ka bo dektak hi;
lungno khat bangin
hong kiseamkeak zo hi.
24 Anneak kisap hu in ka khupte huang hi;
keima in vun le ngu bek taw ka om hi.
25 Mihingte in kei hong mu ciangin hong nuisan uh hi;
selnona taw a lu uh hong pei san hi. Ref 109:25 Mt 27:39; Mk 15:29
26 Topa ka Pathian awng, kei hong hu ta'n;
na itna kip hu in hong hun ta'n!
27 Kei hong hunpa sia nangma na hi hunlam
ka ngalte in hesak in.
28 Amate in kei hong tomlaw thei tu ahihang
nangma in thupha nong pia tu hi.
Kei hong vawtsiate in lelna thuak tahen a,
keima, na naseampa hong lungdamsak ta'n.
29 Ka ngalte sia mindaina taw kituam tahen;
amate in a maizumna sia puantual bangin silh tahen.
30 Topa tungah lungdamkona nging takin ka pia tu hi;
mihingte kikhopna sungah ama ka pok tu hi,
31 banghang ziam cile ama in mizawng pa hung a,
a thi natu in a puavawkte kung panin amate suatak hi.