Psalm Late 102
Khangno Ngimnga khat ii Thungetna
1 Topa awng, kong thungetna hong ngai ta'n a,
hu ngen a ka auna aw hong za ta'n!
2 Ngim ka nga laitakin hong nungngat heak in!
Kei hong ngai ta'n a
kong biapui ciangin a manlang in hong zo ta'n!
3 Ka nuntakna sia meikhu bangin bo vadi hi;
ka pumpi sia mei bangin kuang hi.
4 Lopa ko bangin hong kivaat hi;
an zongh ka du nawn bua hi.
5 A ngingin ka tau hi;
ka vun le ka ngu bek taw ka om hi.
6 Keima in sennealngam sungah
a om sane vacim khat bang le,
a zaancip a kinusia mun sungah
a om simbu khat bang ka hi hi.
7 Khangciim in ka lum hi;
innkhum tungah om vacim lungzuang khat bang ka hi hi.
8 Nitangtum in ka ngalte in hong selno hi;
kei hong nunaute in keima min tomlawna in zangh uh hi.
9-10 Na thin uukna le
na thinsona hu in, vut sia an in ka nei a,
ka thituite sia ka tuineak taw kihel hi.
Nangma in nong tawm a nong vawk hi.
11 Ka nuntakna in nitak niliap bang hi a,
keima in lopa ko taw ka kibang hi.
12 Ahihang Topa awng,
nangma in kumpipa na hi tawntung hi;
khang theampo in nang hong phawk tu hi.
13 Nangma in tho in Zion tungah mulkimna na nei tu hi;
tua khuapi tungah hesuakna na nei tu hun hong theng zo hi!
Hi sia in a kiciangtan hun hi.
14 Tua khua sia kisusia zo hi napi
na naseamte in it hi,
tuasia zaancip zo ahitazong
amate in khuangaihuai sa hi.
15 Minam tuatuamte in Topa kiita tu hi;
leitung ah kumpite theampo in ama ii vaangletna kiita tu hi.
16 Topa in Zion a sakkik ciangin
ama in ama ii letna pualaak tu hi.
17 A kitaisan sa a mite thungetna
ama in ngai tu a, za tu hi.
18 Mihing a piang ngawl laite in
Topa a pok thei natu,
khangkik te atu in ama sep sate lai taw khum tavun.
19 Topa in a saangna a om ama ii thiangtho mun panin hong ensuk a,
ama in vantung panin simlei ensuk hi.
20 Ama in thongtaakte tauna za a,
thi daan a kipiate suaktasak hi.
21 Tua ahikom ama min sia Zion ah kithangsak tu a,
Jerusalem ah ama kipok tu hi.
22 Topa bia tu in minamte le kumpi ngam tuatuamte
hong kikhop ciangin tuabangin kipok tu hi.
23 Topa in ka khanmoi kimlai ma in hong thazawmsak hi;
ama in ka khan hong tomsak zo hi.
24 Pathian awng, ka huai maa,
tu in kei hong la heak in.
Topa awng, nangma in
a tawntungin na nungta hi;
25 khuangeipi lai in nangma in leitung na bitphua a,
nangma khut mama taw vantungte na vawt hi. Ref 102:25-27 Heb 1:10-12
26 Amate sia bo vangeu tu a, ahihang nang sia na om lai tu hi;
amate in puan bangin tul tu hi.
Nangma in amate puan bangin na vawk tu a,
amate a bo tu hi.
27 Ahihang nangma in a tawntungin na kibang a,
na nuntakna a bo ngei bua hi.
28 Ih tate sia thin muang takin nungta tu a,
nangma ii dalna sungah
amate suan le paalte sia ngammuang tu uh hi.