6
A tamzaw lai Kidop natu
1 Ka tapa awng, ngualdang khat ii leibatte vaipuak la tu in kamciam na vawt ngei ziam?
2 Nangma kammal ma in hong man kik ngei a, nangma kamciam in thaang hong sia ngei ziam?
3 Tua ahile ka tapa awng, nang sia tua mihing pa khut sungah om ni hi, ahihang hisia vai taw na kipeal natu a manlang in ama va zuan ta'n a, hong maap natu in hesuak ngen ta'n.
4 Nangma le nangma sia mut hun ahizong tawlngak hun ahizong kipia heak in.
5 Savaipa thaang panin vacim ahizong, sangai ahizong a suatak bangin tua thaang panin pusuak in.
6 Mihing dathamte in mitsate nuntakzia tung pan sin tahen.
7 Amate in lampui ahizong, hausa, ukpi ahizong nei ngawl hi,
8 ahihang amate in phalbi sung atu a kinginna in khaal lai in an koikhol hi.
9 Mihing datham pa in bang tanvei lupna tungah lum tu ziam? Bang hun ciang hong tho peetma tu ziam?
10 Ama in, “Tawmvei mu zok tong, leekoai in tawmvei sung tawlnga sin tong” ci hi.Ref 6:10-11 Pau 24:33-34
11 Ahihang a mut lanin zawnna in hiamh toai ngualsuamte bangin ama sim tu hi.
12 Mihing ngautaak ngawl, mi seksolte in leilot thu sonin vak kawkoai hi.
13 Amate nang hong theam natu in a mit suukin a khut uh vik hi,
14 tuasung theampo ah siatna taw kidim in a khel thinsung taw mun theampo ah nawngkaina piangsak tu in hol kawkoai hi.
15 Hi thu hangin amate heakkhol ngawlin lalna in amate vaat tu a, tuaciangin amate sia thi theina ciang dongin liam tu uh hi.
16-19 Topa ii a etsat le a dual zawk ngawl thu nam sali om hi:
Kiphatsakna maipuak,
a theam thei leei,
mawnei ngawlte a thatlum khut,
seksol sawmin a ngaisun thinsung,
siatna vawt tu a,
a zuan ngang peangte,
leilot thu khat zawkciang khat a son tetti,
lawm le ngual sungah buaina pian natu a heltua pa cite ahi hi.
Palngulna huvau Kidop natu
20 Ka tapa awng, na pa hong sonte vawt in a, na nu hong hilte mangil ngei heak in.
21 Amate ii kammalte phawk tawntungin a, na thinsung ah kip takin ciamtee in.
22 Amate hong hilnate in khual na haw ciangin hong hu tu hi, zanin hong hung tu hi, tuaciang sunin ngaisutna pha hong pia tu hi.
23 Amate hong hilnate sia a taang khuavak hi; amate hong teknate in nuntakzia hong hil thei hi.
24 Tua hilnate in numei pha ngawlte kung panin hong keam tu hi; midangte zite ii zolna kammalte pan hong keam tu hi.
25 Amate mealphatna ip la heak in. Amate sikvil mit hana sungah awk heak in.
26 Pasal khat in anluum khat man za taw pumpi zuak numei khat nga thei hi, ahihang palngul mawna in a neisa theampo bosak tu hi.
27 Na puan kaangh ngawl hetin na awm ah meikuang na toai thei tu ziam?
28 Na peang kaangh ngawl hetin meikam tungah na pai thei tu ziam?
29 Ngual zi a luppui sia tuabangza ma in lauhuai hi. Tuabang a ngamta theampo in ngimna thuak tu hi.
30 A ngilkial laitak a, an a ngu nguta khat sia mihingte in zawngsak ngawl hi;
31 ahitazong ama a kiman le a see sali in liau tu hi — a neisa theampo a piak siat kul tu hi.
32 Ahihang palngul mawna a vawt mihing khat in ngaisut kaakna nei ngawl ahi hi. Ama le ama a kilalsua hi lel hi.
33 Ama a min kisiasak tu a, kivelpheang tu hi; a tawntungin maimawl tu hi.
34 Pasal khat in a zi a muan nawn ngawl ciang a thin uuk za sangin a thin uuk zawk hun om ngawl hi; ama ii thuk kikna in ciangtan nei ngawl hi.
35 Ama in liausum bangma a saang buatu hi; letsong bangza po in a tam ta zongin a thin uukna thai zo ngawl tu hi.