4
Ciimna ii Phattuamna
1 Ka tapa awng, na pa hong hilnate ngai in. Pha takin nadon lete telthiamna na nei tu hi.
2 Nang kong hil sia pha ahikom a vekpi in ciamtee in.
3 Ka nu le ka pa ii tapa khat bek ahi keima ka patangno lai in,
4 ka pa in hong hil hi. Ama in, “Ka ci theampo ciamtee in a, mangil ngei heak in. Kong sawl bangin ngamta in, tua hile na nungta tu hi.
5 Ciimna le thuthuk mu theina kan in! Kong cite sia mangil heak in a, awlmawk ngawlin om heak in.
6 Ciimna taisan heak in; tua hile tuasia in nang hong hung tu hi; ama it in, tua in nang hong keamcing tu hi.
7 Ciimna ngana sia na vawt thei sung pan a thupibel ahi hi. A dang theampo na nga tazong thuthuk muna ma kan in.
8 Ciimna thangai in, nang hong liansak tu hi. Ciimna pom in, minphatna hong pia tu hi.
9 Ciimna in na minthanna lukhu ahi tu hi,” hong ci hi.
10 Ka tapa awng, hong ngai ta'n. Kong son tute thupi laak in, tua hile khansau in na nungta tu hi.
11 Ciimna le a maan lampi taw nuntakzia hong hil zo khi hi.
12 Ciim takin kal na suan le bangma in na lampi hong khak ngawl tu a, na tai ciangin na lutu buatu hi.
13 Na sinsate a tawntungin ciamtee in. Na sin pilna sia na nuntakna ahi hi — pha takin keamcing in.
14 Mi ngilote paina ah pai heak in. Mi seksolte ngamtatna ettee in zui heak in.
15 Tuabangin vawt heak in! Siatna pan kikeam in! Nial in a, na pai ngei bangin pai in.
16 Mi seksolte sia a maan ngawl ngamtatna khat peuma a vawt bua uh le mutthip thei ngawl uh hi. Khat po a liamsua bua uh le amate mutthip thei ngawl uh hi.
17 Seksolna le ngoltolna sia amate atu in an le tui bang ahi uh hi.
18 Thutangte tot lampi sia sun dongin, a taang vaial nisuak taw kibang hi.
19 Mi seksolte lampi ahile zan bangin zing hi. Amate in liik ahihang bang tungah, lutu ziam ci in a mu thei bua uh hi.
20 Ka tapa awng, ka ci teng pha takin nadon in. Ka kammalte ngai in.
21 Tuate in nangma taisansak heak in. Tuate ciamtee in a, na thinsung ah keam in.
22 Tuate in a tel theite tungah nuntakna le ciidamna pia tu hi.
23 Na khua ngaisut dan kidawm in; na nuntakzia sia na khua ngaisutna in zeam hi.
24 A maan ngawl peuma bangma son ngei heak in. Ngual theamna le leilot thu peuma zangh heak in.
25 Citak kimuanna taw maisang mitsuan in; maizumna taw kun heak in.
26 Na sep po pha takin ngeal phot in, tua hile nasep theampo a maan suak tu hi.Ref 4:26 Heb 12:13
27 Siatnate pial in a, tang takin mai sangah kalsuan in. A maan lampi panin kal khat zongh pial heak in.