18
1 Ngual taw a kituiton thei ngawl mihingte sia amate bek a kikinte ahi hi; midangte ii maan hi ci in a heakte a thukim pui buatu hi.
2 Mihing mawmaw khat in na khat a tel le a tel ngawl sia phamaw a sa bua hi; ama ii uuk sia ama bangza in pil khi ziam, ci in a lak nuam hi bek hi.
3 Mawna le maizumna tonkhawm hi; na zatakhuaina taan lete a luangin zawnsakna na nga tu hi.
4 Mihing khat ii kammalte in ciimna ii naak, tuipi bangin a thuk le a thiang luamtui luang bang hi thei hi.
5 A mawte angvan a, a maw ngawlte tungah a kikhaikim in thukhen ngawlna sia maan ngawl hi.
6 A mawmaw khat po in kam kinialna a phuang le, ngual ii vel tu a zong ahi hi.
7 A mawmaw khat a pau ciangin ama le ama kilalsak hi a; ama kampaute taw thaang sungah awk hi.
8 Ngual ngensiatna sia lim mama a, bangza in kivalh suk nuam ziam!
9 A datham mihing khat sia ngual a lalsak thei khat za in sia hi.
10 Topa sia, tausaang kho taw kibang a, thutangte in zuanin ngammuanna nga thei hi.
11 Mihaute ahile amate hauna in, a saang a kho khuapi luphungte bangin, amate dal hi ci in ngaisun hi.
12 A kiniamkhiak ngawlte kuama in a zakta bua hi; mihing a kisatheite sia lalna lampi zuan ahi hi.
13 Ngual kam na zo ma in ngai masa in. Tuabangin na hi buale nang sia mawmaw a, ngual a thusim ngawl na suak hi.
14 Na nat ciangin nuntak nopna thin in nang hong luhaisak thei hi, ahihang tuasia na bosua tha le na lamet khakbel sia bo hi.
15 Mihing pilvangte in lawp tawntung a, pilna sin tu kingingsa in om uh hi.
16 Mihing thupi khat taw na kisi nuam ziam? Letsong khat puak lete ol takin na kisi thei tu hi.
17 Thukhenzum sungah, a pau phitbel pa sia a langkhat pa ii thu a dok mateng a maan son bang hi tawntung hi.
18 Thukhenzum sungah a thahat mihing nii sia thu nei in a kilangpan tan le mee sawksak in thu saatsat thei hi.
19 Na mealheakte hu lete amate in khuapi luphung kho khat bangin nang hong dal tu hi, ahihang amate taw na kihau le a innkha uh hong khasan tu hi.
20 Na ci pawpo taw kizui in thupiangte na nuntakpui kul tu hi.
21 Na kampauna in nuntakna hong keam thei a, tua ahibuale zong hong lalsak thei hi; tua ahikom na kammal tung pan a piang thute lungkimin na thuak kul hi.
22 Zi khat na nei ciang na pha khat mu na hi hi; tuasia in nang tungah Topa pha hi ci in hong lak hi.
23 Mizawng khat in a pau ciangin kamthiam a zak kul hi, ahihang mihau khat in ngual kam a zo ciangin kamkhal zangh hi.
24 Kingualtamhna pawlkhat sia kho ngawl hi, ahihang ngualtamh pawlkhatte ahile suapui laipeete sangin thumaan zaw hi.