PAUNAKTE
(The Book of Proverbs)
1
Paunakte Manneina
1 Israel kumpipa David tapa Solomon ii paunakte ahi hi.Ref 1:1 1 Kum 4:32
2 Hisung a paunakte in ciimna le ngaisutpha khentel natu le a khiakna thuk kamtepteete tel natu in hong hu tu hi.
3 Tuate in pilvangna taw bangbangin nungta tu, bangbangin thumaan tu a, thutang tu, thukhual tu ci in nang hong hil thei tu hi.
4 Tuate in heakna a nei ngawl lai khat pilsak thei tu a, tuaciang in khangnote kicinna a nei thei natu dan hil hi.
5 Hi paunakte in a ciimte ii heakna ngawngawn belap thei a, pilna saang a neite lamlak hi,
6 tuasia ciangin amate in paunakte ii a kiseal khiaknate he thei tu a, mihing ciimte dok thu telhakte zongh tel thei tu uh hi.
Khangmoite Ngaisut Piakna
7 Heakna na nei natu in Topa thasiana na nei phot kul hi. Mihing mawmawte in ciimna awlmawk ngawlin kan nuam ngawl hi.Ref 1:7 Job 28:28; Ps 111:10; Pau 9:10
8 Na pa le na nu hong sonte pha takin nadon in, ka tapa awng.
9 Amate hong hilnate in a et hoi dial khat, khi khat ii na meal hong hoi tuamsak bangin na pianzia hong etlawmsak tu hi.
10 Ka tapa awng, mimawte hong ze et ciangin zui heak in.
11 A zezen in, amate in “Hong pai ta'n; ih thalup tu khat zong ka tawng! Mawna nei ngawl khat cimthoina in ngalvawt sin ve tawng!
12 Amate ih mu tangin nungta a, ciidam hikale amate tungah ih law nop teng ih man zawkciang thi siat tu hi!
13 Hauna namcin le ih innte sia ih sutol vanhte taw a kidim in ih mu tu hi!
14 Hong pai ta'n a hong pawm ta'n, ih nguk theampo ih hawm tek tu hi,” hong ci tu hi.
15 Ka tapa awng, mihing tuabangte taw kithawl heak in. Amate kung pan kiheam in.
16 Amate in a sia khat a vawt tu ngakla hi. Amate in thatlum tu in kinging tawntung hi.
17 Na mat nop vacim sia ii mu tangin thaang nasia hang, bangma phatuam ngawl hi,
18 ahihang mihing tuabangte in amate le amate thaang kisia uh a, tua thaang sungah amate thi tu uh hi.
19 Mihing suamna in a suamte nuntakna siik kik vaciat hi, ngoltolna taw a nungta khat pawpo tungah tuabang ma in tung hi.
Ciimna in hong Sam
20 Ngai in! Ciimna in khuapi lampi liante sung le vanhzuakna phual ah hong sam hi, Ref 1:20-21 Pau 8:1-3
21 khuapi kongpite le mihingte kisiktuana munte ah a nging tatakin hong sam hi:
22 “Mihing mawmawte awng! bang tanvei mawmaw nuam nu ziam? Heakna bang tanvei ciammui vawt tu nu ziam? Heak tu sawm nawn ngawl nu ziam?
23 Kong teih ciangin hong ngai tavun; ngaisutna pha kong pia tu a, ka heaknate kong hawm tu hi.
24 Hong sasam khi hi, hong pai tavun ci in hong thaw khi hi, ahihang hong ngai nuam ngawl nu hi. Kei sia hong nadon nuam ngawl nu hi.
25 Ngaisutna kong piak theampo thusim ngawl nu hi, kong hil kong pau tu zongh nong oai ngei bua uh hi.
26 Tua ahikom ngim na nga ciang, kong nuisan tu hi. Launa lian tatakin nang hong nawk a,
27 na tungah vuipi suangval bangin hong va a, ngimna vuipi hong puak hi, nang sia natna le cimawkna taw na om hun ciangin kong nunau tu hi.
28 Tuaciang ciimna nong kan tu a, ahihang kong zo buatu hi. Mun theampo ah hong zong ka lete zong nong mu buatu hi.
29 Heakna bangma hunin na thusim ngei bua a Topa thu nit tu zongh na nial tawntung hi.
30 Ngaisutna kong piakte na dei ngei bua a, kong hil kong pau ciangin nong nadon bua hi.
31 Tua ahikom, nangma taw a kiphu bangin na nga tu hi, tuaciang nangma ngamtatna ma in na ci hong nasak tu hi.
32 Heakna nei ngeingawlte thi hi, banghang ziam cile amate in ciimna nial uh hi. A mawmawte sia awlmawk a neithei ngawlna in amate lalsak hi.
33 Ahihang a kuama po kei thu hong ngaite in ngammuanna nei tu hi. Ama sia thinmuang in om tu a, a launa tu bangma thu a om buatu hi.”