PHILIPPI TE
Tungah Paul ii Laithak
(Paul's Letter to the Philippians)
Philippi te tungah Paul ii laithak sia Rome ukna ngam Macedonia ngamkhen sung ah, Paul ii Europe leitang tung a phu phitbel pawlpi tungah a at hi. Lai a ki at hun in, Paul sia thong sungah om a, ama a nalh a dang Tapidaw naseam pawlkhat ii a nawngkaisak laitak le Philippi pawlpi sungah hilkhialna a om hu in a thin patau laitakin a at hi. Ahizong Paul in Jesus Christ sia thuk takin a up hu bekin lungdamna le thinmuanna awsua taw at hi ci in kitel thei hi.
Laithak a atna thubulpi ahile Philippi Tapidawte in ama ii a kitaangsap laitak a letsong a thaakte hu in lungdamkona ahi hi. Ama in hi hunpha zangh in amate tungah ama haksatnate le, amate haksatnate theampo kawm panin thin letna le thinmuanna a nga thei natu in amate hansua kik hi. Amate kaangsung tupna le kiphatsaknate in uksak ngawl zaw in Jesus ii kiniamkhiak ngamtatna a nei thei natu in ngen hi. Amate upna tungtawnin a nga Christ taw pumkhat in nuntakna a nei uh sia Pathian ii thuthiamna letsong hi a, Jew te thukham ii zeksate a zui zawk uh hang ahi ngawlna thu phawksak hi. Christ taw kipumkhat a, a nungtate tungah Pathian piak lungdamna le thinnopna thute at hi.
Hi laithak sungah lungdamna, thinmuanna, pumkhat hina, Tapidawte upna le nuntakna sungah thuak zawk hatna thute a thupibel in om hi. Philippi pawlpi tungah Paul ii itna thuk mama a neina zongh hi lai taw pualaak hi.
1
1 Christ Jesus ii naseamte ahi Paul le Timothy in —
Christ Jesus taw pumkhat a om pawlpi lampuite le, Husyate a kihel Philippi ah a om Pathian ii mite theampo tungah lai kong thaak uh hi. Ref 1:1 Sawl 16:12
2 Ih Pa Pathian le Topa Jesus Christ in thuthiamna le thinnopna hong pia tahen.
Paul ii Thungetsakna
3 Noma kong ngaisut simin, noma hu in ka Pathian tungah lungdam ka ko hi;
4 tuaciangin no teng theampo atu thu ka nget simin thinnop lungdamna taw thu ka ngen hi,
5 banghang ziam cile ka kipat phit ni pan tu dong lungdamna thu nasepna sungah nong hu zia uhte ka ngaisut hang ahi hi.
6 Tua ahikom no sungah hi nasep pha hong patpui Pathian in nasep a kizaw tu hun Christ Jesus Ni ciang dong na hong seam suak tu ka ci ngam hi.
7 Ka thinsung ah no kong phawk tawntung hi! Tuabangin kong phaw sia kei atu in a kilawm thu ahi hi. Banghang ziam cile, tu laitak thonginn sungah ka om laitak ahizong, lungdamna thu ii a maanna sia huuk tu le kipsak tu in ka suatak laitak ahizong, Pathian ii hong piak hi phattuamna nong saan pui tek uh hi.
8 A thukin no kong phawna sia Christ Jesus mama ii thinsung pan hong luang tatak ahi hunlam ka tetti sia Pathian ahi hi.
9 Ki itna na khantosak seseam natu, heakna maan le thukhenna maan na nei khop thei natu,
10 tua tungtawnin, a phabel sia na teal thei natu in thu kong ngetsak hi. Tuasia ciangin Christ ii Ni hong thet hunin niinnoina teng le mawsiatna theampo taw na kipeal tu uh hi.
11 Pathian minthan natu le ama pok natu in Jesus Christ bek ii piansak thei a maan pilna thiamnate taw na nuntakna uh hong kidim tu hi.
Nuntakna in Christ hi.
12 Suapuite awng, kei tungah hong tung thute sia lungdamna thu khangtosak takpi ahi hunlam na tel tu uh ka dei hi.
13 Tua thute taw kizomin, kumpi inncing ngalkap bup le hi sungah a om a dang teng in kei sia Christ ii naseam ka hi hu a thongtaak ka hi hunlam he siat uh hi. Ref 1:13 Sawl 28:30
14 Thong sungah ka om hu in u le nau a tamzaw in Topa tungah thinmuanna neizaw uh a, tuaciang ngupna thu lau ngawlin hil ngam vaial uh hi.
15 Amate sung panin pawlkhatte ahile eenna le kingal vawtna thin taw Christ thuhil a, ahizong a dangte in thupha deina takpi taw hil uh hi.
16 Pathian ii kei sia lungdamna thu a maanna dinpui tu nasep hong piak hunlam amate in he ahikom hite in ki itna taw ma thu a hil uh hi.
17 A dangte ahile Christ thu sia thinpha taw thangsak ngawl a, amate kaang sung vai tupna thin taw hil uh hi; thonginn sungah ka om laitakin hong nawngkaisak thei zaw tu in ngaisun uh hi.
18 Phamaw ka sa bua hi! Hisia huvau ka lungdam hi — tupna maan taw ahizong, ahi bua zong Christ thu a nanamin kihil hi pole ka lungdam veve hi. Tuaciangin ka lungdamna sia kizom suak tu hi,
19 banghang ziam cile nong thungetsakna uh le Jesus Christ ii Thaa kung pan hong pai huna taw kei hong kisuaktasak tu ci sia ka he hi.
20 Ka deina tatak le ka lametna sia bang ziam cile ka thi zong ka nung zong ka nuntakna buppi taw Christ vaang ka piak thei natu, hun theampo sung, a tuanin tu hun sung teng seseamin, hangsan takin ka panmun ka lel ngeingawl natu thu ahi hi.
21 Nuntakna sia bang ziam? Kei atu in, nuntakna sia Christ hi a, thina sia hamphat zawk natu ahi hi.
22 Ahizong ka nuntak ciangin a thupi nasepte seam thei zaw tu ka hile, thina le nuntakna, ka teal sawn tu ka he vaset bua hi.
23 Kei sia ka lang le ka lang panin hong kikang hi. Hi nuntakna nusia in Christ taw ka omkhawm nuam mama a, tua in a phazaw kan thu ahi hi;
24 ahihang no atu in ci leang a nungta in om lai leng thupi zawlai hi.
25 Hi thu thiangtel ka hikomin a nungta a om tu ka hina ka he hi, upna sungah noma khantona le thinnopna a kibelap natu in no teng taw kong om lai tu hi,
26 tua hile no kungah kong haw kik ciangin Christ Jesus taw kipumkhat in na nuntakna sungah kei nong kiphatsak pui seseam thei natu a hi hi.
27 Tu in a thupi thu in na nuntakna uh sia Christ lungdamna thu ii dei bang tatak ahi natu thu ahi hi, tua hile kei kong pai thei a, kong pai maw zong note tupna kibang khat tungah kip takin a dingte hi a, deina khat bek taw lungdamna thu upna atu ngaldo khawmte na hi hunlam kong za tu hi.
28 Na ngalte na kiita heak vun; na thinlian tawntung tavun, tua hile amate in hong lel tu a, noma in na zo tu uh hi, banghang ziam cile zawna hong pia sia Pathian ahi hi.
29 Ama um bek ngawlin, ama hang a ngimna na thuakna uh taw, Christ atu nasep thei natu in hamphatna nga na hi uh hang hi.
30 Tu in keima taw kopin ngaldona sungah na kihel thei tu uh hi. Tua ngalkidona sia nidang zongin ka do nong mu uh a, tu zongh in na zaak uh bangma in ka do lai hi.Ref 1:30 Sawl 16:19-40