6
Nazirite te atu Ngeina
1 Topa in Moses tungah,
2 a nuai a kihilnate Israel mite a piak tu in thupia hi. Pa ahizong numei ahizong Nazirite mi suak tu khi hi, ci in kiciamna nei a, Topa tungah a ki aap sia in
3 sapittui le kham thei ngui theite ten tu hi. Ama in sapitnga taw dawn tu a kivawt bangma dawn ngawl tu a, sapitnga sia a hingin ahizong a ko in ahizong ne ngawl tu hi.Ref 6:3 Lk 1:15
4 Ama in Nazirite te ahi hun sungin sapitkung pan a piang peuma, sapit mu le a haw dong ciangin ne ngawl tu hi.
5 Ama in Nazirite kiciamna nuai ah a om hun sung theampo a sam meet ngawl tu a, a mul meet ngawl tu hi. Ama Topa tungah a kipiak hun a cin dong kiciamna in heencip ahikom a sam le a khamul hoai tu hi.
6-7 Ama sam sia Pathian tungah ki aapna lim hi a, tua ahiciang mithi luang kung, a nu a pa, a suapuite luang ahi hial zong a neak na taw in ama le ama kininsak ngawl het tu hi.
8 Ama in Nazirite te ahi laiteng Topa tungah a kipum aap ahi hi.
9 Thakhat thu in a thi pa khat ii kungah a om hu in Nazirite pa in a kipum aap sa, a sam a ninsak le ni sali sung ngak nanak tu a, tua zawkciangin a sam le a khamul meet tu hi; tuabangin ama biakna taw kisai a thiang suak tu hi.
10 Ni liat ni in ama in Topa ompuina Puanbuk sung tumna ah a om thiampipa kungah inn vakhu nii ahi buale ngam vakhu nii paipui tu hi.
11 Thiampipa in khat sia mawphel biakpiakna in, a dang khat sia meihal biakpiakna in nei tu a, mithi luang tham ahikom ama thiansua natu in a zeksa teng vawtsak tu hi. Tua ni ma in, ama in a sam pum aap kik tu a,
12 Nazirite ahi na bangin Topa tungah amate hun sia aap kik tu hi. A masa hun teng kisimsak ngawl tu hi, banghang ziam cile a aapsa ama ii sam sia ninsak hi. Ama in khialphel biakpiakna in kum khat a pha tuu khat keng tu hi.
13 Nazirite khat a kiciam hun a cin ciang ama in a zeksa teng vawt tu hi. Ama in Puanbuk tumna ah pai in, Ref 6:13-21 Sawl 21:23-24
14 a mealhem ngawl nganhing thum Topa pia tu hi: meihal biakpiakna in kum khat a pha tuutalno khat, mawphel biakpiakna in kum khat a pha tuula khat, pawlkhop biakpiakna in tuutal khat hi tu hi.
15 Ama in tol saw ngawl anluum law khat : olive thau taw hel in a vawt, anluum saate, olive thau noai in a paa in a vawt anluumte le a kisamh antang le sapittui taw biakpiaknate zongh pia lai tu hi.
16 Thiampipa in hi teng theampo Topa kungah paipui tu a, mawphel biakpiakna le meihal biakpiakna pia tu hi.
17 Ama in pawlkhop biakpiakna in tuutal khat sia Topa tungah anluum law khat taw pia tu hi; ama in antang le sapittui biakpiakna zongh pia tu hi.
18 Puanbuk tumna ah tua nazirite in a sam meet tu a, pawlkhop biakpiakna a kihalna mei tungah tuasia hal tu hi.
19 Tuaciang thiampipa in a kihuan tuutal liang la tu a, anluum saa khat le law sung pan muhphaang khat taw Nazirite ii khut sungah piakhawm tu hi.
20 Tuasia zawkciang thiampipa in tua teng Topa tungah a tuam vilvel letsong in pia tu hi; tuate thiampipa atu in a thiangtho biakpiakna hi a, thukham om bangin thiampipa ii neisa tuutal phei le a awmsa belapna ahi hi. Tua zawkciang Nazirite in sapittui ne thei tu hi.
21 Hite Nazirite mite zui tu ngeina hi a; ahizong Nazirite khat in a kulza sangin a tamzaw piak tu in kiciamna a nei le ama kamciam piak bang linlian in cingsak hamtang tu hi.
Thiampi ii thupha Piakna
22 Topa in Moses tungah,
23 Aaron le a tapate in Israel mite thupha a piak ciang a nuai a kammalte a zak natu a sonsawn tu in thupia hi:
24 Topa in note thupha hong pia in,
hong keamcing tahen;
25 Topa in no tungah dikna le
cikna thiamna hong nei tahen;
26 Topa in note maipha hong pia in,
thinnopna hong pia tahen;
27 Tuaciang Topa in, “Amate in Israel mite tungah thupha piakna in ka min a lo le, keima in amate thupha ka pia tu hi,” ci hi.